ລາວ-ຫວຽດນາມຮ່ວມມືພັດທະນາພະລັງງານໄຟຟ້າ

  ໃນລະຫວ່າງວັນທີ 16-19 ກຸມພາ 2019 ທ່ານ ຄຳມະນີ ອິນທິລາດ ລັດຖະມົນຕີກະຊວງພະລັງງານ ແລະບໍ່ແຮ່ພ້ອມຄະນະໄດ້ເດີນທາງຢ້ຽມຢາມ ແລະເຮັດວຽກຢູ່ ສສ ຫວຽດນາມ ໂດຍໄດ້ມີການປະຊຸມຄະນະນຳ ແລະວິຊາການຂອງກະຊວງ  ອຸດສາຫະກຳ ແລະການຄ້າຫວຽດນາມກ່ຽວກັບການຢັ້ງຢືນຄືນຈຸດເຊື່ອມໂຍງການຊື້-ຂາຍພະລັງງານໄຟຟ້າຮ່ວມກັນແຕ່ພາກເໜືອລົງຮອດພາກໃຕ້ ຊຶ່ງມີຈຸດເຊື່ອມໂຍງທັງໝົດ 9 ຈຸດໃນນັ້ນ ມີທັງລະບົບສາຍສົ່ງ 220, 230 ແລະ 500 ກິໂລໂວນ.

 ພາຍຫຼັງເຮັດວຽກຮ່ວມກັບຄະນະກະ ຊວງອຸດສາຫະກຳ ແລະການຄ້າຫວຽດ ນາມ ທ່ານ ຄຳມະນີ ອິນທິລາດ ລັດຖະ ມົນຕີກະຊວງພະລັງງານແລະບໍ່ແຮ່ ກໍໄດ້ ເຂົ້າຢ້ຽມຂໍ່ານັບທ່ານຈິງດິງຢຸງ ຮອງ ນາຍົກລັດຖະມົນຕີຫວຽດນາມເພື່ອລາຍງານຜົນການຮ່ວມເຮັດວຽກກັບກະຊວງອຸດສາຫະກຳ ແລະການຄ້າຫວຽດນາມ ແລະຮັບຟັງການໃຫ້ທິດຊີ້ນຳເພື່ອ ຊຸກຍູ້ການຈັດຕັ້ງປະຕິບັດວຽກງານຂະ ແໜງພະລັງງານ-ບໍ່ແຮ່ ແລະອຸດສາຫະກຳ-ການຄ້າຫວຽດນາມໂດຍສະເພາະແມ່ນການກະກຽມຄວາມພ້ອມໃນການ ລົງນາມບັນດາໂຄງການຮ່ວມມືລະຫວ່າງ ສອງກະຊວງ ແລະສັນຍາການຊື້-ຂາຍ ໄຟຟ້ານ້ຳຊຳກໍຄືໂຄງການອື່ນໆຊຶ່ງຄາດວ່າຈະໄດ້ເຊັນສັນຍາ 2 ໂຄງການໃນໂອ ກາດທີ່ເລຂາທິການໃຫຍ່ປະທານປະເທດ ສສ ຫວຽດນາມ ເດີນທາງຢ້ຽມຢາມ ສັນຖະວະໄມຕີ ສປປ ລາວ ທ້າຍເດືອນ ກຸມພານີ້.

  ທ່ານ ຈິງດິງຢຸງ ຮອງນາຍົກລັດຖະມົນຕີຫວຽດນາມຢືນຢັນວ່າການຮ່ວມມືຂະແໜງພະລັງງານມີບົດບາດສຳຄັນ ພື້ນຖານຈຳເປັນ ຊຶ່ງບໍ່ພຽງແຕ່ຈະນຳເອົາ ຜົນປະໂຫຍດທາງດ້ານເສດຖະກິດເທົ່າ ນັ້ນແຕ່ມີຄວາມໝາຍສຳຄັນທາງດ້ານການເມືອງ, ຄວາມໝັ້ນຄົງພ້ອມກັນນັ້ນ ກໍເປັນການສະແດງໃຫ້ເຫັນເຖິງການແບ່ງປັນ, ການຊ່ວຍເຫຼືອເຊິ່ງກັນ ແລະກັນລະຫວ່າງລາວ-ຫວຽດນາມ, ບົນພື້ນຖານດັ່ງກ່າວທ່ານຮອງນາຍົກລັດຖະມົນຕີໄດ້ຕີລາຄາສູງຕໍ່ກະຊວງອຸດສາຫະ ກຳ ແລະ ການຄ້າຫວຽດນາມ ແລະກະຊວງພະລັງງານ ແລະບໍ່ແຮ່ຂອງລາວທີ່ພວມເອົາໃຈໃສ່ປຶກສາຫາລືຄົ້ນຄວ້າສັນຍາຮ່ວມມືລະຫວ່າງລັດຖະບານສອງປະ ເທດກ່ຽວ ກັບໂຄງການກໍ່ສ້າງເຂື່ອນໄຟຟ້າ, ໂຄງການພະລັງງານທົດແທນ ແລະຂຸດຄົ້ນແຮ່ທາດເພື່ອສະເໜີການນຳຂັ້ນສູງຂອງສອງປະເທດຕົກລົງເພື່ອຈະໄດ້ພ້ອມກັນ ຈັດຕັ້ງປະຕິບັດໃນເວລາອັນໃກ້ໆນີ້.

แชร์