ເຈດີບີ ທົບທວນຜົນດຳເນີນທຸລະກິດ 9 ເດືອນຜ່ານມາ

  ໃນວັນທີ 6 ຕຸລາ 2020 ຢູ່ທີ່ສໍານັກງານໃຫຍ່ທະນາຄານຮ່ວມພັດທະນາ ຫຼື JDB ໄດ້ເປີດກອງປະຊຸມທົບທວນຜົນການດໍາເນີນທຸລະກິດ 9 ເດືອນ ຂອງປີ 2020 ແລະຄາດຄະເນ 3 ເດືອນທ້າຍປີ 2020, ໂດຍການເປັນປະທານຂອງທ່ານ ເອກະພັນ ພະພິທັກ ປະທານສະພາບໍລິຫານທະນາຄານຮ່ວມພັດທະນາມີຄະນະສະພາຜູ້ບໍລິຫານ, ຜູ້ອໍານວຍການໃຫຍ່, ຄະນະອໍານວຍການ, ຄະນະພະແນກ, ຕະຫຼອດເຖິງຫົວໜ້າສູນບໍລິການ ແລະໜ່ວຍບໍລິການກໍໄດ້ເຂົ້າຮ່ວມຢ່າງພ້ອມພຽງ.

  ກອງປະຊຸມໄດ້ສະຫຼຸບຜົນການດໍາເດີນທຸລະກິດໃນໄລຍະ 9 ເດືອນຜ່ານມາ ແລະຄາດຄະເນ 3 ເດືອນ 2020 ເຫັນວ່າໄດ້ຕາມແຜນການທີ່ວາງໄວ້ຢ່າງໜ້າເພີ່ງພໍໃຈເຖິງວ່າຈະມີສະພາບການແຜ່ລະບາດຂອງໂຄວິດ-19 ກໍຕາມ, ຊຶ່ງເຮັດໃຫ້ລາຍຮັບຈາກການນໍາໃຊ້ບັດ ATM,VISA, Master Card,UPI, JDB Yes, ເຄື່ອງຮູດບັບ EDC ແລະຜະລິດຕະພັນອື່ນໆຫຼຸດລົງຍ້ອນບໍ່ມີນັກທ່ອງທ່ຽວເຂົ້າມາໃນປະເທດຂອງພວກເຮົາ.

   ທ່ານ ວິໄລ ສີພະພອນ ຜູ້ອໍານວຍການໃຫຍ່ທະນາຄານຮ່ວມພັດທະນາພ້ອມດ້ວຍຜູ້ບໍລິຫານທຸກຄົນພາຍໃຕ້ການຊີ້ນໍາຂອງທ່ານ ເອກະພັນ ພະພິທັກ ປະທານສະພາບໍລິຫານທະນາຄານຮ່ວມພັດທະນາໄດ້ຫັນວິກິດໃຫ້ເປັນໂອກາດໂດຍການເລັ່ງປ່ອຍສິນເຊື່ອເຂົ້າໃນການຟື້ນຟູເສດຖະກິດ, ໄດ້ອອກຜະລິດຕະພັນສິນເຊື່ອໂດຍສະໜອງຄວາມຕ້ອງການໃຫ້ເຂົ້າເຖິງກຸ່ມລູກຄ້າເປົ້າໝາຍທັງພາກລັດ ແລະເອກະຊົນ, ເງິນກູ້ເພື່ອນັກສຶກສາພາຍໃນ ແລະຕ່າງປະເທດ, ເງິນກູ້ພະນັກງານ, ລັດຖະກອນ, ເງິນກູ້ຫັນຊັບເປັນທຶນ, ເງິນກູ້ SME, ເງິນກູ້ Corporate ແລະອື່ນໆ, ຄາດວ່າ 3 ເດືອນທ້າຍປີ 2020 ຈະໃຫ້ມີ ຜົນກໍາໄລບັນລຸເປົ້າໝາຍທີ່ກໍານົດໄວ້ໃນແຜນການປີ2020.

   ໃນກອງປະຊຸມຄັ້ງນີ້ໄດ້ປັບປຸງການຈັດຕັ້ງໃໝ່ຂອງທະນາຄານຮ່ວມພັດທະນາໃຫ້ແທດເໝາະກັບການຂະຫຍາຍຕົວຂອງທະນາຄານ, ໂດຍປະຕິບັດຕາມກອງປະຊຸມຜູ້ຖືຮຸ້ນໄດ້ແຕ່ງຕັ້ງທ່ານ ເອກະພັນ ພະພິທັກ ເປັນປະທານສະພາບໍລິຫານອີກວາລະນຶ່ງ ແລະໄດ້ແຕ່ງຕັ້ງຜູ້ກວດສອບມາຈາກຂ້າງນອກ 1 ທ່ານ, ມາເປັນສະມາຊິກສະພາບໍລິຫານເພື່ອໃຫ້ຖືກຕ້ອງຕາມກົດໝາຍ, ໄດ້ແຕ່ງຕັ້ງທ່ານຮອງຜູ້ອໍານວຍການໃຫຍ່ເພີ່ມອີກ 1 ທ່ານ ເພື່ອຊ່ວຍວຽກບໍລິຫານຕ່າງໆ ແລະໄດ້ແຕ່ງຕັ້ງປັບປຸງສະ ພາບໍລິຫານຂອງ JDB  ໃຫ້ດີຂຶ້ນກວ່າເກົ່າເພື່ອຊີ້ນໍາ-ນໍາພາທະນາຄານຮ່ວມພັດທະນາໃຫ້ກ້າວໄປຢ່າງບໍ່ຢຸດຢັ້ງ.

   ປະຈຸບັນທະນາຄານຮ່ວມພັດທະນາໄດ້ຮ່ວມມືກັບຫຼາຍອົງກອນ ແລະຫຼາຍບໍລິສັດເພື່ອບໍລິການດ້ານການເງິນທີ່ຄົບວົງຈອນໃຫ້ກັບລູກຄ້າທຸກລະດັບຢ່າງເທົ່າທຽມກັນປະຕິບັດນະໂບຍາຍຕ່າງຝ່າຍມີຜົນປະໂຫຍດຕາມຄໍາຂວັນທີ່ວ່າ :“ ເຕີບໃຫຍ່ໄປພ້ອມກັນ”.

__________

ຂ່າວ: ຄໍາຕົ້ນ ວໍລະຈັກ

ຮູບພາບ: #ຫນັງສືພິມເສດຖະກິດສັງຄົມ

แชร์