ກາງ-ໃຕ້ລະວັງຝົນຕົກໜັກ ຂະນະທີ່ວິລະບູລີ ແລະເຊໂປນນໍ້າຖ້ວມຫຼາຍຈຸດ

 ກົມອຸຕຸນິຍົມ ແລະອຸທົກກະສາດແຈ້ງໃຫ້ກຽມຮັບມື ແລະເຝົ້າລະວັງໄພທຳມະຊາດເນື່ອງຈາກວ່າຄວາມກົດດັນອາກາດສູງຈາກປະເທດຈີນຍັງສືບຕໍ່ຈະເຮັດໃຫ້ມີອາກາດເຢັນມີລົມແຮງ, ຝົນຕົກຟ້າຮ້ອງຟ້າເຫຼື້ອມ ແລະຝົນຕົກປານກາງຫາໜັກຢູ່ພາກກາງຫາພາກໃຕ້ນັບແຕ່ໄລຍະວັນທີ 9-11 ຕຸລາ 2020 ນີ້.

  ອີງຕາມແຈ້ງການກົມອຸຕຸ ແລະອຸທົກກະສາດໃຫ້ຮູ້ວ່າ: ເນື່ອງຈາກຄວາມກົດດັນອາການສູງຈາກປະເທດຈີນຍັງສືບຕໍ່ແຜ່ລົງມາປົກຄຸມເຂດພາກເໜືອຂອງລາວ, ສ່ວນພາກກາງ ແລະພາກໃຕ້ປົກຄຸມດ້ວຍຄວາມກົດດັນອາກາດຕໍ່າທີ່ມີກຳລັງແຮງເພີ່ມຂຶ້ນສົມທົບກັບລົມຕາເວັນອອກ-ຕາເວັນອອກສຽງເໜືອພັດປົກຄຸມເປັນສ່ວນໃຫຍ່ຊຶ່ງຈະເຮັດໃຫ້ອາກາດເຢັນລົງໃນຕອນເຊົ້າ ແລະຈະມີຟ້າຝົນຕົກຟ້າຮ້ອງຟ້າເຫຼື້ອມໃນລະດັບຄ່ອຍຢູ່ໃນແຕ່ລະພາກ ແລະຝົນຕົກປານກາງຫາໜັກພ້ອມຈະມີລົມພັດຢູ່ບາງແຂວງພາກກາງ ແລະພາກໃຕ້,

ດັ່ງນັ້ນກົມຕຸນິຍົມຈຶ່ງແຈ້ງເຕືອນເຖິງປະຊາຊົນບັນດາເຜົ່າ ແລະອົງການປົກຄອງທຸກພາກສ່ວນທີ່ອາໄສຢູ່ແຂວງພາກກາງ ແລະພາກໃຕ້ເຊັ່ນ ແຂວງບໍລິຄຳໄຊ, ຄຳມ່ວນ, ສະຫວັນນະເຂດ, ສາລະວັນ, ຈຳປາສັກ, ເຊກອງ ແລະອັດຕະປື ຈຶ່ງມີສະຕິລະມັດລະວັງຕໍ່ສະພາບຝົນຕົກ ແລະລົມພັດແຮງທີ່ຈະມາເຮັດມີຕົ້ນໄມ້ຫັກ ແລະເສົາໄຟຟ້າລົ້ມ, ເຮືອນເປ່ເພນໍ້າຖ້ວນ, ດິນເຈື່ອນ ແລະມີນໍ້າອັ່ງພ້ອມນີ້ກໍ່ມີຕິດຕາມການແຈ້ງເຕືອນໄພຈາກອຸຕຸນິຍົມ ແລະອຸທົກກະສາດຢ່າງຕໍ່ເນື່ອງ.

  ຢ່າງໃດກໍຕາມໃນວັນທີ 8 ຕຸລາຜ່ານມາທີ່ເມືອງວິລະບູລີ ແລະເມືອງເຊໂປນ ແຂວງສະຫວັນນະເຂດ ກໍ່ໄດ້ເກີດມີສະພາບນໍ້າຖ້ວມຫຼາຍຈຸດຕໍ່ເນື່ອງມາຈາກຝົນຕົກໜັກສືບຕໍ່ກັນ.

แชร์