ຸຖວທ ອອກຄຳແນະນຳຈໍຕິດຕາມຮ້ານບັນເທີງ ແລະອະນຸມັດຈັດງານບຸນ, ທ່ຽວເປັນກຸ່ມ

   ເນື່ອງຈາກປະຈຸບັນສະພາບການແຜ່ລະບາດຂອງພະຍາດໂຄວິດ-19 ຍັງ ສືບຕໍ່ຂະຫຍາຍເປັນວົງກວ້າງໃນຫຼາຍປະເທດທົ່ວໂລກ, ສືບຕໍ່ມີກໍລະນີຕິດເຊື້ອ ແລະເສຍຊີວິດເພີ່ມຂຶ້ນໃນແຕ່ລະວັນ. ສະນັ້ນເພື່ອປ້ອງກັນສະກັດກັ້ນບໍ່ໃຫ້ມີການຕິດເຊື້ອ ແລະແຜ່ລະບາດຕື່ມຢູ່ ສປປ ລາວ ກະຊວງຖະແຫຼງຂ່າວ, ວັດທະນະທໍາ ແລະ ທ່ອງ ທ່ຽວໄດ້ອອກຄຳແນະນຳສະບັບເລກທີ 351/ຖວທ ເຖິງ: ພະແນກ ຖວທ ນະຄອນຫຼວງ, ແຂວງ, ຫ້ອງການ ຖວທ ເມືອງ ແລະພາກສ່ວນທີ່ກ່ຽວຂ້ອງທົ່ວປະເທດ ຊຶ່ງມີລາຍລະອຽດດັ່ງລຸ່ມນີ້:

1. ໃຫ້ພະແນກ ຖວທ ນະຄອນຫຼວງ, ແຂວງ, ຫ້ອງການ ຖວທ ເມືອງເປັນເຈົ້າການປະສານສົມທົບກັບກໍາລັງປ້ອງກັນຄວາມສະຫງົບ ແລະຄະນະສະເພາະກິດຂອງນະຄອນຫຼວງ, ແຂວງ, ເມືອງຕິດຕາດກວດກາຮ້ານບັນເທີງ, ຄາຮາໂອເກະໃຫ້ສືບຕໍ່ປິດ, ກໍລະນີພົບຜູ້ລະເມີດໃຫ້ປະຕິບັດວິໄນຕາມລະບຽບການ.

2. ການຈັດງານບຸນປະເພນີ ແລະເທສະການຕ່າງໆໃຫ້ປະຕິບັດຕາມມາດຕະການປ້ອງກັນການຕິດເຊື້ອ ແລະການແຜ່ລະບາດໃນຊຸມຊົນທີ່ຄະນະສະພາະກິດວາງອອກຢ່າງຖືກຕ້ອງ ແລະເຂັ້ມງວດເປັນຕົ້ນ: ປະຕິບັດຫຼັກການສຸຂານາໄມ, ແທກອຸນນະພູມ, ໃສ່ຜ້າປິດປາກ-ດັງ, ໃສ່ເຈວລ້າງມື ແລະຫຼີກລ້ຽງຄວາມແອອັດ.

3. ການຈັດງານດອງໃຫ້ເອົາການສູ່ຂວັນຕາມປະເພນີ ແລະຈົດທະບຽນສົມລົດເປັນຫຼັກ, ສະເພາະງານລ້ຽງໃຫ້ຈັດແບບກະທັດຮັດ, ປະຢັດ ແລະໃຫ້ປະຕິບັດຕາມມາດຕະການປ້ອງກັນການຕິດເຊື້ອ ແລະການແຜ່ເຊື້ອໃນຊຸມຊົນທີ່ຄະນະສະເພາະກິນວາງອອກຢ່າງຖືກຕ້ອງ ແລະເຂັ້ມງວດເປັນຕົ້ນ: ປະຕິບັດຫຼັກການສຸຂານາໄມ, ແທກອຸນນະພູມ, ໃສ່ຜ້າປິດປາກ-ດັງ, ໃສ່ເຈວລ້າງມື ແລະຫຼີກລ້ຽງຄວາມແອອັດ.

4.​ ການທ່ອງທ່ຽວເປັນກຸ່ມສໍາລັບນັກທ່ອງທ່ຽວທີ່ມາຈາກປະເທດທີ່ບໍ່ມີການລະບາດຂອງພະຍາດໂຄວິດ-19 ໃນຊຸມຊົນໃຫ້ປະຕິບັດຄື: ສະມາຄົມທ່ອງທ່ຽວ, ບໍລິສັດທ່ອງທ່ຽວເປັນຜູ້ຂົນຂວາຍ, ເຕົ້າໂຮມນັກທ່ອງທ່ຽວ ແລະ ດໍາເນີນຕາມຂັ້ນຕອນການຂໍອະນຸຍາດຈາກຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19.

แชร์