ສາມັກຄີໄຊ ຕະຫຼາດມາດຕະຖານແຫ່ງທຳອິດ

   ພິທີເປີດຕະຫຼາດຕະຫຼາດສາມັກຄີໄຊເປັນຕະຫຼາດມາດຕະຖານແຫ່ງທີ I ຂອງນະຄອນໄກສອນ ພົມວິຫານ ແຂວງສະຫວັນນະເຂດ ໄດ້ຈັດຂຶ້ນໃນວັນທີ 30 ກັນຍາຜ່ານມານີ້, ທີ່ຫ້ອງການຈັດສັນຕະຫຼາດດັ່ງກ່າວໂດຍການເຂົ້າຮ່ວມຂອງ ທ່ານ ແສງທອງ ວັງແກ້ວມະນີ ເຈົ້ານະຄອນໄກສອນ ພົມວິຫານ, ທ່ານ ໂພສີສອຍ ກຸທິລາດ ຫົວໜ້າພະແນກອຸດສາຫະກຳ ແລະການຄ້າແຂວງ, ທ່ານ ຄຳສີເພັດ ໄຊຍະວົງຫົວໜ້າຫ້ອງ ການອຸດສາຫະກຳ ແລະການຄ້ານະຄອນ,ທ່ານ ນາງ ຄອນຄຳ ອິນສີຊຽງໃໝ່ຜູ້ອຳນວຍການຕະຫຼາດສາມັກຄີໄຊ, ມີພະແນກການອ້ອມຂ້າງແຂວງ-ນະຄອນ, ແຂກຖືກເຊີນ ແລະພາກສ່ວນກ່ຽວຂ້ອງເຂົ້າຮ່ວມ.

 ທ່ານລວມຕາງໜ້າໃຫ້ເຈົ້າຂອງຕະຫຼາດສາມັກຄີໄຊໄດ້ຂຶ້ນລາຍງານໃຫ້ຮູ້ວ່າ: ຕະຫຼາດສາມັກຄີໄຊຕັ້ງຢູ່ບ້ານດົງດວນເປັນຕະຫຼາດປະເພດກາງໂດຍຂຶ້ນກັບການຄຸ້ມຄອງຂອງຫ້ອງການອຸດສາຫະກຳ ແລະການຄ້ານະຄອນຊຶ່ງສ້າງຕັ້ງຂຶ້ນໃນປີ 1998, ມີຄະນະບໍລິຫານ 3 ຄົນ, ຍິງ 1 ຄົນ, ມີຄະນະຈັດສັນຕະຫຼາດທັງໝົດ 11 ຄົນ, ມີມູນຄ່າການກໍ່ສ້າງທັງໝົດ 3,19 ຕື້ກີບ, ປະກອບມີອາຄານໃຫຍ່ 1 ຫຼັງ, ຫ້ອງການຈັດສັນຕະຫຼາດ 1 ຫຼັງ, ມີຫ້ອງນໍ້າລວມ 10 ຫ້ອງ ຊຶ່ງພາຍໃນຕະຫຼາດອ້ອມ ດ້ວຍຮົ້ວຊີມັງທັງ 3 ດ້ານ ແລະມີທາງເຂົ້າ-ອອກກວ້າງ 4 ແມັດ, ມີ 2 ເສັ້ນທາງ ຊຶ່ງປະຈຸບັນ, ພາຍໃນຕະຫຼາດມີຫ້າງຮ້ານຂະໜາດ 3x3 ແມັດ 120 ຮ້ານໃນນີ້ໄດ້ຂຶ້ນທະບຽນວິສາຫະກິດ 72 ຫົວ ໜ່ວຍ,ມີໂຕະວາງຂາຍສິນຄ້າຂະໜາດ 1x1,5 ແມັດ ຈຳນວນ 300 ໜ່ວຍ ແລະໄດ້ແບ່ງເຂດບໍລິການຄື: ໝວດຂາຍເຄື່ອງນຸ່ງຮົ່ມ, ເກີບ, ກະເປົ໋າ, ໂທລະສັບ, ເຄື່ອງໃຊ້ໄຟຟ້າ, ເຄື່ອງໃຊ້ຄົວເຮືອນມີ 23  ຮ້ານ, ຂາຍເຄື່ອງຍ່ອຍທົ່ວໄປ ມີ 70 ຮ້ານ, ຂາຍຜັກຊະນິດ ຕ່າງໆມີ 100 ຮ້ານ, ຂາຍຊີ້ນ ແລະ ຜະລິດຕະພັນສັດມີ 20 ຮ້ານ, ຂາຍປາ, ເປັດ, ໄກ່ຄົວແລ້ວມີ 10 ຮ້ານ ແລະໝວດຂາຍໝາກໄມ້ທົ່ວໄປ 70 ຮ້ານ.

  ນອກນັ້ນ, ຍັງມີສະຖານທີ່ບ່ອນຈອດລົດໃຫຍ່ 1 ບ່ອນ ສາມາດຈອດໄດ້ 100 ຄັນ, ບ່ອນຈອດລົດຈັກ-ລົດຖີບ 2 ບ່ອນ ຮັບຮອງໄດ້ 500 ຄັນ, ສາງເກັບມ້ຽນສິນ ຄ້າ ແລະເຄື່ອງໃຊ້ຕ່າງໆ 1 ສາງ ບັນຈຸໄດ້ 100 ໂຕນ, ບ່ອນເກັບມ້ຽນຂີ້ເຫຍື້ອ 1 ບ່ອນ.

   ໄລຍະຜ່ານມາ, ໂດຍໄດ້ຮັບການແນະນຳຈາກພາກສ່ວນກ່ຽວຂ້ອງເປັນຕົ້ນແມ່ນວິຊາການຈາກຫ້ອງການອຸດສາຫະກຳ ແລະການຄ້ານະຄອນກໍຄືຄະນະກຳມະການ ຄຸ້ມຄອງ ແລະຈັດສັນຕະຫຼາດທີ່ໄດ້ລົງມາຕິດຕາມຊຸກຍູ້ໃຫ້ມີການປັບປຸງແກ້ໄຂຕາມລະບຽບການຕ່າງໆທີ່ກ່ຽວຂ້ອງເຮັດໃຫ້ພາຍໃນຕະຫຼາດສາມັກຄີໄຊມີຄວາມປອດໄພ, ມີຄວາມສະອາດເປັນລະບຽບຮຽບຮ້ອຍດີ, ສາມາດແກ້ໄຂລະບົບຄອງຮ່ອງນໍ້າເປື້ອນໄດ້, ມີບ່ອນກຳຈັດຂີ້ເຫຍື້ອ ແລະມີຈຸດ ບໍລິການວັດແທກ-ຊັ່ງຜອງສິນຄ້າທີ່ໄດ້ຕິດຕັ້ງຊີງກາງຈຳນວນ 4 ຈຸດ ພ້ອມນີ້ກໍ່ມີຈຸດການກວດກາຄຸນນະພາບອາຫານສົດ, ຄຸນນະພາບສິນຄ້າ, ສຸຂະອະນາໄມພືດ ແລະສັດ 1 ຈຸດ ແລະມີລະບົບປ້ອງກັນອັກຄີໄພຄົບຊຸດ.  

  ໃນພິທີກໍ່ໄດ້ຜ່ານບົດລາຍງານຜົນການລົງກວດກາຕະຫຼາດເພື່ອສ້າງເປັນຕະຫຼາດມາດຕະຖານ ແລະຜ່ານຂໍ້ຕົກລົງວ່າດ້ວຍການມອບໃບຢັ້ງຢືນໃຫ້ຕະຫຼາດສາມັກຄີໄຊ ເປັນຕະຫຼາດມາດຕະຖານແຫ່ງທຳອິດຂອງນະໄກສອນ ພົມວິຫານຈາກນັ້ນ, ກໍ່ໄດ້ມີການມອບໃບຢັ້ງຢືນຕະຫຼາດມາດຕະຖານໃຫ້ຕະຫຼາດສາມັກຄີໄຊຢ່າງເປັນທາງ ການ.

__________

ຂຽນໂດຍ: ສະຫວັນ, ຮູບພາບ: #ຫນັງສືພິມເສດຖະກິດສັງຄົມ

แชร์