ສົງຄາມເຕີບໃຫຍ່ທ່າມກາງຊົນນະບົດ

  ສະຫາຍສົງຄາມສີຫາພົນ,ອາຍຸ 27 ປີ ຊຶ່ງເປັນລູກຫຼານຂອງຊາວແຂວງຫົວພັນວິລະຊົນ;ສະຫາຍເຂົ້າເຮັດວຽກຢູ່ທະນາຄານນະໂຍບາຍໃນເດືອນຕຸລາ 2013 ແລະປະຈຸບັນປະຕິບັດໜ້າທີ່ຢູ່ຂະແໜງສິນເຊື່ອທະນາຄານນະໂຍບາຍສາຂາຫົວພັນ; ສະຫາຍ ສົງຄາມສີຫາ ພົນໄດ້ໃຫ້ຮູ້ວ່າ: ນັບແຕ່ເລີ່ມຕົ້ນເຂົ້າເຮັດວຽກເປັນພະນັກງານຢູ່ທະນາຄານນະໂຍບາຍແມ່ນເອົາໃຈໃສ່ປະຕິບັດໜ້າທີ່ຂອງຕົນຕາມການມອບໝາຍຈາກຂັ້ນເທິງໂດຍສະເພາະຈັດຕັ້ງປະຕິບັດການສະໜອງສິນເຊື່ອແກ້ໄຂຄວາມທຸກ ຍາກໃຫ້ປະຊາຊົນບັນດາເຜົ່າ; ໃນ ປີ 2014-2018 ມາປະຈຳການຢູ່ເມືອງແອດຊຶ່ງພ້ອມກັບເພື່ອນຮ່ວມງານໄດ້ນຳເອົາແຫຼ່ງທຶນເຂົ້າເຖິງປະຊາຊົນໃນເຂດຕົນເອງຮັບ ຜິດຊອບຈຳນວນ 5 ກຸ່ມບ້ານ, 34 ບ້ານ, ເຂົ້າເຖິງ 863 ຄອບຄົວໃນນີ້ມີຄອບຄົວທຸກຍາກ 194 ຄອບຄົວ.

  ມາຮອດເດືອນ 8 ປີ 2018  ຫາ ເດືອນ 9 ປີ 2019 ສະຫາຍ ໄດ້ຮັບການສັບຊ້ອນມາປະຈຳການຢູ່ໜ່ວຍບໍລິການເມືອງວຽງໄຊ ແລະຮັບຜິດຊອບການກວດກາເອກະສານ, ວິເຄາະລາຍກຸ່ມ, ລາຍບຸກຄົນ, ຄິດໄລ່ດອກເບ້ຍ, ແຈ້ງເຕືອນການທວງໜີ້ ແລະ ວຽກງານ ຄໍແບ້ງຄິງ ຊຶ່ງຮັບຜິດຊອບ 5 ກຸ່ມບ້ານ, 35 ບ້ານ, 545 ຄອບຄົວ ແລະ ໃນເດືອນ 10/2019 ຖືກສັບຊ້ອນຍົກຍ້າຍມາປະຈຳການຢູ່ຂະແໜງສິນເຊື່ອສາຂາຫົວພັນຈົນເຖິງປະຈຸບັນ, ຊຶ່ງຮ່ວມກັບໝູ່ຄະນະຮັບຜິດຊອບ 17 ບ້ານ, 289 ຄອບຄົວຕະຫຼອດໄລຍະການເຄື່ອນໄຫວແມ່ນຍ້ອນມີການຊີ້ນຳ-ນໍາພາຈາກຄະນະພັກຂັ້ນເທິງໂດຍສະເພາະຄະນະສາຂາ, ຄະນະກຳມະການສິນເຊື່ອຂັ້ນແຂວງ, ຂັ້ນເມືອງ, ໝູ່ເພື່ອນສະຫາຍ, ອຳນາດການປົກຄອງທ້ອງຖິ່ນ ແລະດ້ວຍຄວາມພະຍາຍາມຂອງຕົນເອງທີ່ໄດ້ທຸ້ມເທສະຕິປັນຍາ, ເຫື່ອແຮງເອົາໃຈໃສ່ປະຕິບັດຕາມລະບຽບຫຼັກການ-ຄູ່ມືຂອງວຽກງານສິນເຊື່ອເຜີຍແຜ່ແນວທາງ, ລະບຽບ-ຫຼັກການ ຂອງທະນາຄານນະໂຍບາຍໃຫ້ປະຊາຊົນຮັບຮູ້-ເຂົ້າໃຈ, ເກັບກຳຂໍ້ມູນຕົວຈິງກັບປະຊາຊົນທີ່ມີຄວາມຮຽກຮ້ອງຕ້ອງການຢາກກູ້ຢືມແທ້, ເອົາໃຈໃສ່ໃນການວິເຄາະຢ່າງລະອຽດກ່ອນປ່ອຍສິນເຊື່ອ;ຜ່ານມາສະຫາຍຊຶ່ງຍາມໃດກໍ່ຢຶດໝັ້ນຕໍ່ການນຳພາຂອງພັກ, ນຳເອົາຄວາມຮູ້, ຄວາມສາມາດຂອງຕົນປະກອບສ່ວນໃນການປະຕິບັດໜ້າທີ່ໄດ້ຮັບມອບໝາຍຢ່າງມີຜົນສຳເລັດ.

   ດ້ວຍຄວາມເອົາໃຈໃສ່, ບຸກບືນຫ້າວຫັນຕໍ່ໜ້າທີ່ວຽກງານເຮັດໃຫ້ການຈັດຕັ້ງພັກໄວ້ເນື້ອເຊື່ອໃຈຈົນໄດ້ຮັບເຂົ້າເປັນສະມາຊິກພັກປະຊາຊົນປະຕິວັດລາວໃນວັນທີ 21 ມີນາ 2017, ໃນການເຂົ້າຮ່ວມເຄື່ອນໄຫວວຽກງານຢູ່ທ້ອງຖິ່ນ, ໄດ້ເຄື່ອນໄຫວວຽກງານອົງການຈັດຕັ້ງມະຫາຊົນຊຶ່ງເປັນສະມາຊິກອົງການຈັດຕັ້ງຊາວໜຸ່ມ, ກຳມະ ບານ,ນອກຈາກການຈັດຕັ້ງປະຕິບັດໜ້າທີ່ວຽກງານລວມແລ້ວຕົນເອງໄດ້ສ້າງເສດຖະກິດຄອບຄົວຢຶດໜັ້ນທັດສະນະຂອງພັກທີ່ວ່າ “ສ້າງຄວາມເຂັ້ມແຂງດ້ວຍຕົນເອງ, ເພິ່ງຕົນເອງ, ກຸ້ມຕົນເອງ” ການເພີ່ມພູນຜະລິດຜົນ, ລ້ຽງສັດເປັນສິນຄ້າເຊັ່ນ: ລ້ຽງໝູລາດສ້າງລາຍຮັບສະເລ່ຍ 30 ລ້ານກີບຕໍ່ປີ; ລ້ຽງປາສ້າງລາຍຮັບ 10 ລ້ານກີບຕໍ່ປີ; ເກັບຊື້ຜົນຜະລິດສາລີ, ໝາກເດືອຍເພື່ອສົ່ງອອກຕ່າງປະເທດປີໜຶ່ງປະມານ 1.000 ໂຕນ, ນອກນັ້ນໄດ້ລ້ຽງໄກ່-ເປັດຈຳນວນໜຶ່ງ.

   ສະຫາຍເລຂາຄະນະພັກຮາກຖານ, ຜູ້ອຳນວຍການທະນາຄານນະໂຍບາຍຢັ້ງຢືນວ່າ: ສະຫາຍສົງຄາມສີຫາພົນເປັນພະນັກງານ-ສະມາຊິກພັກໜຸ່ມນ້ອຍທີ່ຢຶດໝັ້ນໃນ ຕໍ່ແນວທາງຂອງພັກ, ມີສະຕິລະບຽບວິໃນ, ເຄົາລົບລະບຽບ, ກົດໝາຍ, ມີຄຸນທາດການເມືອງ, ມີຄຸນສົມບັດສິນທໍາປະຕິວັດ, ກໍາໄດ້ລະບຽບ, ຫຼັກການວຽກງານສິນ ເຊື່ອທະນາຄານນະໂຍບາຍ, ຮູ້ພັດທະນາຄວາມຮູ້-ຄວາມສາມາດຂອງຕົນເອງ, ເປັນສະມາຊິກພັກ- ພະນັກງານທີ່ຫ້າວຫັນ, ປະຕິບັດໜ້າທີ່ວຽກງານດ້ວຍຄວາມຮັບຜິດຊອບ, ໃຫ້ການຊ່ວຍເຫຼືອເພື່ອນມິດສະຫາຍບໍ່ວ່າຈະເປັນວຽກໜັກຫຼືເບົາກໍ່ທຸ່ມເທເຫື່ອແຮງ, ຄວາມຮູ້-ຄວາມສາມາດຂອງຕົນເຮັດໃຫ້ວຽກງານມີຜົນສໍາເລັດ.

   ຍ້ອນຄຸນງາມຄວາມດີໃນການເຄື່ອນໄຫວຕະຫຼອດໃນໄລຍະຜ່ານມາ, ສະຫາຍໄດ້ຮັບການຍ້ອງຍໍ 4 ໃບຈາກອົງການຈັດຕັ້ງພັກ, ລັດ, ອົງການຈັດຕັ້ງຊາວໜຸ່ມ ແລະກຳມະບານ, ສະຫາຍໄດ້ຮັບການຄັດເລືອກເປັນສະມາຊິກພັກແຂງ, ຮັບຄວາມໄວ້ເນື້ອເຊື່ອໝັ້ນຈາກການຈັດຕັ້ງຂັ້ນເທິງໂດຍສະເພາະໄດ້ຮັບຄວາມນັບຖືຮັກແພງຢ່າງຈິງ ໃຈຈາກອຳນາດການປົກຄອງ ແລະປະຊາຊົນສະເໝີມາສົມກັບຄຳວ່າ: ເປັນລູກປະຊາຊົນ, ມາຈາກປະຊາຊົນເພື່ອປະຊາຊົນ ແລະປະກອບສ່ວນຢ່າງໝົດໃຈຮັບໃຊ້ປະຊາ ຊົນບົນຈິດໃຈຢຶດໝັ້ນທະນາຄານນະໂຍບາຍເປັນຂອງປະຊາຊົນຕາມແນວທາງຂອງພັກ ແລະລັດຖະບານ.

____________

ຂ່າວ: ຣັດສະໝີ ດວງສັດຈະ

ຮູບພາບ: #ຫນັງສືພິມເສດຖະກິດສັງຄົມ

แชร์