ໄຟໄໝ້ເຮືອນຢູ່ບ້ານປາກຫາງເສຍຫາຍ 800 ລ້ານກວ່າກີບ

   ເມື່ອເວລາປະມານ 3:45 ໂມງ ຂອງວັນທີ 13 ກັນຍາຜ່ານມາໄດ້ເກີດເຫດໄຟໄໝ້ເຮືອນປະຊາຊົນຢູ່ບ້ານປາກຫາງ ເມືອງທຸລະຄົມ ແຂວງວຽງຈັນ ອຳນາດການປົກຄອງບ້ານໄດ້ລະດົມພໍ່ແມ່ປະຊາຊົນພາຍໃນບ້ານຊ່ວຍດັບມອດໄຟແຕ່ບໍ່ສາມາດມອດໄດ້ຈຶ່ງໄດ້ໂທລະສັບແຈ້ງຕໍ່ເຈົ້າໜ້າກອງຮ້ອຍປະຈຳການພາຍຫຼັງເຈົ້າໜ້າທີ່ຕຳ ຫຼວດພະແນກສະກັດກັ້ນ ແລະຕ້ານອັກຄີໄພ ປກສ ແຂວງວຽງຈັນໄດ້ຮັບແຈ້ງຂ່າວຈາກພົນລະເມືອງດີວ່າມີໄຟໄໝ້ເຮືອນປະຊາຊົນຢູ່ບ້ານປາກຫາງ ເຈົ້າໜ້າທີ່ວິຊາສະ ເພາະພວກເຮົາຈຶ່ງໄດ້ນຳໃຊ້ລົດມອດໄຟຈຳນວນ 1 ຄັນ ພ້ອມດ້ວຍພະນັກງານວິຊາສະເພາະຈຳນວນ 4 ສະຫາຍ ໄປຊ່ວຍມອດໄຟຊຶ່ງໄດ້ສົມທົບກັບເຈົ້າໜ້າທີ່ ປກສ ເມືອງທຸລະຄົມ ແລະປະຊາຊົນພາຍໃນບ້ານເຂົ້າຊ່ວຍດັບມອດໄຟໂດຍໃຊ້ເວລາປະມານ 1 ຊົ່ວໂມງ ຈຶ່ງສາມາດຄວບຄຸມແປວໄຟໄວ້ໄດ້.

   ຜູ້ເຫັນເຫດການໃຫ້ຮູ້ວ່າ: ໃນເບື້ອງຕົ້ນໄຟໄດ້ລຸກໄໝ້ເຮືອນບູຮານຊຶ່ງມີອາຍຸປະມານ 100 ປີ ມີຂະໜາດ 8x9 ແມັດ ທາງໃນເປັນຫ້ອງໂລ່ງບໍ່ມີຄົນອາໄສຢູ່ມີແຕ່ເຄື່ອງຂອງຈຳນວນໜຶ່ງເຊັ່ນ: ລົດໄຖນາ 1 ຄັນ, ເຂົ້າເປືອກ 13 ເປ໋ົາ ແລະມັດເຟືອງຈຳນວນໜຶ່ງຫຼັງຈາກນັ້ນແປວໄຟໄດ້ລຸກລາມໄປໄໝ້ເຮືອນຫຼັງທີ 2 ຊຶ່ງເປັນເຮືອນ 2 ຊັ້ນ ຂະໜາດ 10x 13 ແມັດ ບໍ່ມີຄົນອາໄສຢູ່ຖືກໄຟໄໝ້ເປັນສ່ວນຫຼາຍເຮືອນຈຳນວນດັ່ງກ່າວແມ່ນເຮືອນຂອງປະຊາຊົນ ຢູບ້ານຮ່ອງແກ ເມືອງໄຊເສດຖາ ນະຄອນຫຼວງວຽງຈັນ.

   ຫຼັງຈາກນັ້ນມື້ຕໍ່ມາເຈົ້າໜ້າທີ່ຕຳຫຼວດສະກັດກັ້ນ ແລະຕ້ານອັກຄີໄພ ປກສ ແຂວງວຽງຈັນ ໄດ້ສົມທົບກັບພາກສ່ວນທີ່ກ່ຽວຂ້ອງລົງກວດກາຊັນນະສູດສະຖານທີ່ເກີດເຫດ ເຫັນວ່າມີຊັບສິນ ແລະເຄື່ອງຂອງທີ່ມີຄ່າໄດ້ຮັບຜົນເສຍຫາຍຄື: ເຮືອນບູຮານ 1 ຫຼັງ, ລົດໄຖນາ 1 ຄັນ, ເຂົ້າເປືອກ 13 ເປົ໋າ, ເຮືອນ 2 ຊັ້ນ 1 ຫຼັງ (ຖືກໄຟລາມໄປໄໝ້ສ່ວນຫຼາຍ) ປະເມີນມູນຄ່າຜົນເສຍຫາຍໃນເບື້ອງຕົ້ນປະມານ 826,9 ລ້ານກີບ ສ່ວນສາເຫດຂອງການເກີດອັກຄີໄພໃນຄັ້ງນີ້ແມ່ນບໍ່ສາມາດຢັ້ງຢືນໄດ້ວ່າເກີດຂຶ້ນຍ້ອນຫຍັງເນື່ອງຈາກບໍ່ມີຂໍ້ມູນຫຼັກຖານຊັດເຈນແຕ່ກໍ່ໂຊກດີບໍ່ມີຜູ້ໄດ້ຮັບບາດເຈັບ ແລະເສຍຊີວິດ.

_________

ຂ່າວ: ກົງສະເດັດ, ໜັງສືພິມເສດຖະກິດ-ສັງຄົມ

แชร์