ກົມກວດກາ ກະຊວງ ຖວທ ລົງຊີ້ນຳວຽກຢູ່ໄຊຍະ

   ໃນວັນທີ 6 ຕຸລາ 2020 ນີ້ ທ່ານນາງ ສຸພາລັກ ທິລະວົງ ປະທານກວດກາພັກ, ຫົວໜ້າກົມກວດກາກະຊວງ ຖວທ ພ້ອມດ້ວຍຄະນະໄດ້ລົງຊຸກຍູ້ວຽກງານຮອບດ້ານ ແລະໂອ້ລົມຕໍ່ການນໍາຮາກຖານພະແນກ ຖວທ ແຂວງໄຊຍະບູລີ ທີ່ຫ້ອງປະຊຸມພະແນກ ຖວທ ແຂວງໂດຍມີ ທ່ານ ນາງ ບົວຈັນ ພັນທະວົງ ຫົວໜ້າພະແນກ ຖວທ ແຂວງ, ມີຫົວໜ້າ, ຮອງຫົວໜ້າຂະແໜງການ ແລະກອງວິຊາການເຂົ້າຮ່ວມ.

    ທ່ານ ນາງ ບົວຈັນ ພັນທະວົງ ໄດ້ລາຍງານຫຍໍ້ວຽກຮອບດ້ານໃນໄລຍະ 9 ເດືອນຜ່ານມາໄດ້ຍົກໃຫ້ເຫັນດ້ານດີ, ດ້ານອ່ອນ ແລະບົດຮຽນທີ່ຖອດຖອນໄດ້ພ້ອມທັງວາງທິດທາງແຜນການ 3 ເດືອນ ທ້າຍປີ. ພະແນກ ຖວທ ແຂວງ ມີພະນັກງານລັດຖະກອນທັງໝົດ 86 ຄົນ, ຍິງ 42 ຄົນ, ອາສາສະໝັກ 9 ຄົນ, ຍິງ 5 ຄົນ, ມີ 6 ຂະແໜງການ, 3 ກອງວິຊາການ. ໃນ 9 ເດືອນຜ່ານມາສາມາດຜະລິດໃບຂ່າວປະຈໍາອາທິດໄດ້ 266 ຄັ້ງມີ 613 ສະບັບ, ມີ 241 ຂ່າວ, ຮັບຂ່າວຈາກບັນດາເມືອງ ແລະພະແນກການອ້ອມຂ້າງແຂວງໄດ້ 397 ຂ່າວ. ທົ່ວແຂວງມີສະຖານີວິທະຍຸ FM ຈໍານວນ 4 ແຫ່ງ, ສະຖານີວິທະຍຸໂທລະພາບໄດ້ລົງເຄື່ອນໄຫວເກັບກໍາຂ່າວໄດ້ 962 ຂ່າວ,ຂ່າວສຽງ 327 ສຽງ.ສ້າງຄອບຄົວວັດທະນະທໍາໄດ້ 636 ຄອບຄົວ ເທົ່າ 42,2%; ປະຈຸບັນທົ່ວແຂວງມີຄອບຄົວວັດທະນະທໍາແລ້ວ 67.157 ຄອບຄົວ ເທົ່າກັບ 90% ຂອງຄອບຄົວທັງໝົດ, ສ້າງບ້ານວັດທະນະທໍາໄດ້ 5 ບ້ານ ປະຈຸບັນມີບ້ານວັດທະນະທໍາທັງໝົດ 383 ບ້ານ ເທົ່າກັບ 89%. ມີບໍລິສັດທ່ອງທ່ຽວທັງໝົດ 16 ບໍລິສັດ, ໂຮງແຮມ 7 ແຫ່ງ, ເຮືອນພັກ 180 ແຫ່ງ, ລີສອດ 4 ແຫ່ງ, ຮ້ານອາຫານ 94 ແຫ່ງ, ຮ້ານບັນເທີງ 20 ຮ້ານ, ຮ້ານກິນດື່ມ 33 ແຫ່ງ, ມີແຫຼ່ງທ່ອງທ່ຽວທັງໝົດ 96 ແຫ່ງ, ທໍາມະຊາດ 71 ແຫ່ງ, ວັດທະນະທໍາ 18 ແຫ່ງ, ປະຫວັດສາດ 7 ແຫ່ງ, ມີນັກທ່ອງທ່ຽວເຂົ້າມາຜ່ານແຂວງໄຊ ຍະບູລີ 9 ເດືອນຜ່ານມາທັງໝົດ 49 ພັນກວ່າຄົນ ສາມາດສ້າງລາຍຮັບໄດ້ຈາກ ການທ່ອງທ່ຽວ 2 ລ້ານກວ່າໂດລາ.

 ຈາກນັ້ນຕາງໜ້າຂະແໜງການໄດ້ປະກອບຄໍາຄິດຄໍາເຫັນ ແລະສະເໜີບາງວຽກງານທີ່ຈໍາເປັນເພື່ອເຮັດໃຫ້ວຽກງານຖະແຫຼ່ງຂ່າວ, ວັດທະນະທໍາ ແລະທ່ອງທ່ຽວໃຫ້ດີຂຶ້ນ.

   ພ້ອມນີ້ ທ່ານ ນາງ ສຸພາລັກ ທິລະວົງ ກໍໄດ້ໃຫ້ກຽດໂອ້ລົມເຊິ່ງກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຄະນະພັກຮາກຖານພະແນກ ຖວທ ຍາດໄດ້ຜົນງານຫຼາຍດ້ານທີ່ໜ້າເພິ່ງພໍໃຈແຕ່ແນວໃດກໍ່ຕາມເມື່ອທຽບໃສ່ຄວາມຮຽກຮ້ອງຕ້ອງການໜ້າທີ່ການເມືອງໃນໄລຍະໃໝ່ແລ້ວພວກເຮົາຈະຕ້ອງໄດ້ສືບຕໍ່ສຶກສາອົບຮົມການເມືອງແນວຄິດໃຫ້ສະມາຊິກພັກ-ພະນັກງານ-ລັດຖະກອນໃຫ້ມີແນວຄິດອຸ່ນອ່ຽງທຸ່ນທ່ຽງປະຕິບັດໜ້າທີ່ໆໄດ້ຮັບການມອບໝາຍໃຫ້ສໍາເລັດ, ເອົາໃຈໃສ່ເພີ່ມທະວີຄວາມສາມັກຄີພາຍໃນໃຫ້ໜັກແໜ້ນ, ປະສານສົມທົບກັບພາກສ່ວນທີ່ກ່ຽວຂ້ອງກວດກາ ແລະໃຫ້ຄໍາປຶກສາໃນການໂຄສະນາ ຫຼືການສົ່ງຂ່າວທາງອອນລາຍໃຫ້ຖືກຕ້ອງຕາມ ຄວາມເປັນຈິງ. ທັງໝົດນັ້ນກໍເພື່ອເຮັດໃຫ້ການຊີ້ນໍາ-ນໍາພາວຽກງານຖະແຫຼ່ງຂ່າວ, ວັດທະນະທໍາ ແລະທ່ອງທ່ຽວແຂວງໄຊຍະບູລີ ມີບາດກ້າວຂະຫຍາຍຕົວ ແລະ ມີໃບໜ້າໃໝ່ຍິ່ງໃຫຍ່ກວ່າເກົ່າເພື່ອກາຍເປັນທີ່ຍອມຮັບຂອງສັງຄົມ.

__________

ຂ່າວ: ບຸນທີ, ຮູບພາບ: #ຫນັງສືພິມເສດຖະກິດສັງຄົມ

แชร์