ບໍລິຄຳໄຊ ຫາລືວຽກເຕັກໂນໂລຊີ, ຂໍ້ມູນຂ່າວສານ ແລະດີຈີຕອລ

 ກອງປະຊຸມສໍາມະນາທາງດ້ານວຽກງານເຕັກໂນໂລຊີ, ຂໍ້ມູນຂ່າວສານ ແລະດີຈີຕອລ ລະຫວ່າງ ບໍລິສັດ ສະຕາໂທລະຄົມ ຈໍາກັດ ແລະແຂວງບໍລິຄໍາໄຊໄດ້ໄຂຂຶ້ນໃນວັນທີ 6 ຕຸລາ 2020 ນີ້, ທີ່ແຂວງດັ່ງກ່າວ, ໂດຍການເປັນປະທານຂອງທ່ານ ບຸນເສັງ ປະທໍາມະວົງ ຮອງເຈົ້າແຂວງບໍລິຄໍາໄຊ,ພ້ອມນີ້ກໍມີ ທ່ານ ບຸນມີ ມາລາວົງ ຄະນະອໍາ ນວຍການບໍລິສັດສະຕາໂທລະຄົມ ຈໍາກັດ, ມີຄະນະອໍານວຍການ 3 ບໍລິສັດ ໂທລະຄົມສາຂາແຂວງບໍລິຄໍາໄຊ, ພະນັກງານພາກສ່ວນທີ່ກ່ຽວຂ້ອງ, ນັກສໍາມະນາກອນທີ່ມາຈາກບັນດາພະແນກການອ້ອມຂ້າງແຂວງເຂົ້າຮ່ວມ.

    ກອງປະຊຸມບັນດານັກວິທະຍາກອນໄດ້ພັດປ່ຽນກັນຂຶ້ນນໍາສະເໜີກ່ຽວກັບຢູອ໋ອບຟິສ (U-office), ວີດີໂອຄອນ ເຟີເລັນ (Video conference), ຢູມັນນີ (U-money) ຊຶ່ງໄດ້ນໍາສະເໜີຜະລິດຕະພັນສໍາເລັດຮູບ, ທາງເລືອກດ້ານລະບົບໄອທີ, ຜະລິດຕະພັນທີ່ໄດ້ສະໜອງ, ບາງຜົນງານດ້ານການບໍລິການ, ແນະນໍາລະ ບົບທີ່ນໍາໃຊ້ໄດ້ເລີຍ, ໃນນັ້ນຢູອ໋ອບຟິສ (U-office) ແມ່ນໝາຍເຖິງລະບົບຫ້ອງການ ແລະເອກະສານເອເລັກໂຕຣ ນິກ ທີ່ນໍາໃຊ້ຜ່ານລະບົບຄຣາວ Cloud ຫຼືເຊີບເວີຂອງອິນເນັດທີ່ນໍາມາໃຊ້ເຂົ້າໃນການຈັດການເອກະສານ, ເກັບຮັກສາເອກະສານ, ການຄົ້ນຫາເອກະສານ, ການສົ່ງຕໍ່ເອກະສານ, ການສົ່ງເຊັນເອກະສານຜ່ານເອເລັກໂຕຣນິກໃຫ້ມີຄວາມສະດວກ, ທັນສະໄໝ, ປະຢັດເວລາ ແລະຄ່າໃຊ້ຈ່າຍຕ່າງໆ ທີ່ເໝາະແກ່ບັນດາອົງການຈັດຕັ້ງລັດຖະບານ, ບັນດາກະຊວງທະບວງກົມ, ບັນດາຫົວ ໜ່ວຍທຸລະກິດ. ບັນດາທະນາຄານ, ສໍາລັບການປະຊຸມທາງໄກ ຫຼືວີດີໂອຄອນເຟີເລັນ Video conference ແມ່ນເປັນລະບົບທີ່ນໍາໃຊ້ເພື່ອຈັດກອງປະຊຸມທາງໄກແບບທັນສະໄໝ, ສາມາດຈັດກອງປະຊຸມໄດ້ຢ່າງວ່ອງໄວໄດ້ທຸກທີ່ທຸກເວລາທຸກບ່ອນມີສັນຍານອິນເຕີເນັດ,ເຮັດໃຫ້ຫຼຸດຜ່ອນຄ່າໃຊ້ຈ່າຍໃນການກະກຽມກອງປະຊຸມຊ່ວຍປະຢັດການລົງທຶນ ແລະການບໍລິຫານ, ໂດຍນໍາໃຊ້ໄດ້ຜ່ານໂທລະສັບມືຖື, ເດດທ໋ອບ,ໂນ໊ດບຸກ ແລະຄອມພິວເຕີຕັ້ງໂຕະການບໍລິການຕ່າງໆຍັງຮັບປະກັນຄວາມລັບ ແລະມີຄວາມປອດໄພສູງ.


  ນອກນັ້ນຍັງໄດ້ນໍາສະເໜີກ່ຽວກັບຜະລິດຕະພັນຢູມັນນີ ( U-money)ທະນາຄານເທິງມືຖືຂອງຄົນລາວຢູມັນນີແມ່ນຜະລິດຕະພັນໜຶ່ງທີ່ຂຶ້ນກັບບໍລິສັດ ສະຕາໂທລະຄົມ ເຮັດໜ້າທີ່ບໍລິການດ້ານການເງິນຜ່ານມືຖືທີ່ອໍານວຍຄວາມສະດວກໃຫ້ແກ່ການດໍາລົງຊີວິດຂອງຜູ້ຊົມໃຊ້, ເປັນຕົ້ນແມ່ນການໂອນເງິນ, ການຖອນເງິນ, ການສໍາລະຄ່າໂທລະສັບ, ຄ່າອິນເຕີເນັດ, ການຊື້ເຄື່ອງອຸປະໂພກ-ບໍລິໂພກ, ຊື້ຫວຍ, ການເບີກຈ່າຍເງິນເດືອນໃຫ້ພະນັກງານ ແລະບໍລິການອື່ນໆ, ຢູມັນນີນອກຈາກຈະເຮັດໃຫ້ຜູ້ຊົມໃຊ້ມີຄວາມທັນສະໄໝ, ສະດວກສະບາຍແລ້ວ, ຍັງຫຼຸດຜ່ອນຄວາມສ່ຽງໃນການເດີນທາງ, ຫຼຸດຜ່ອນຄວາມສ່ຽງໃນການຖືກໂຈລະກໍາປຸ້ນຈີ້, ຊີງຊັບ,ເປັນລະບົບທີ່ມີຄວາມປອດໄພສູງເພາະຈະມີຂໍ້ຄວາມແຈ້ງເຕືອນເພື່ອຢືນຢັນທຸກໆການເຄື່ອນໄຫວເຮັດທຸລະກໍາຂອງທ່ານ,ທີ່ປະຊຸມບັນດານັກສໍາມະນາກອນຍັງໄດ້ພ້ອມກັນປະກອບຄໍາຄິດຄໍາເຫັນ ແລະສອບຖາມຂໍ້ຂ້ອງໃຈຫຼາຍບັນຫາສໍາຄັນ.

 ໂອກາດດຽວກັນທ່ານ ບຸນມີ ມາລາວົງ ກ່າວວ່າ: ປະຈຸບັນການນໍາໃຊ້ເອເລັກໂຕຣນິກ, ຂໍ້ມູນຂ່າວສານ ແລະດີຈີຕອລແມ່ນມີຄວາມສໍາຄັນຫຼາຍໃນການດໍາລົງຊີວິດ,ການບໍລິຫານຈັດການອົງກອນແມ່ນມີຄວາມສໍາຄັນຫຼາຍຍ້ອນເຫັນໄດ້ຄວາມໝາຍຄວາມສໍາຄັນດັ່ງກ່າວ ທາງບໍລິສັດຈຶ່ງໄດ້ມາເປີດຝຶກອົບຮົມໃຫ້ບັນດາທ່ານໄດ້ຮັບຮູ້ເຂົ້າໃຈ ແລະນໍາເອົາໄປໝູນໃຊ້ເຂົ້າໃນໜ້າວຽກຕົວຈິງຂອງທ່ານແນໃສ່ເຮັດໃຫ້ທຸກວຽກງານຂອງທ່ານ, ມີຄວາມທັນສະໄໝ, ສະດວກວ່ອງໄວ, ປະຫຍັດເວລາ ແລະຮັບປະກັນຄວາມປອດໄພ.

__________

ຂ່າວ: ພອນສະຫວັນ

ຮູບພາບ: #ຫນັງສືພິມເສດຖະກິດສັງຄົມ

แชร์