ໜ່ວຍງານອົງການ ໄອຍະການບໍລິຄຳໄຊ ສະຫຼຸບວຽກປະຈຳ 3 ເດືອນ

  ກອງປະຊຸມສະຫຼຸບວຽກງານການຊີ້ນໍາ-ນໍາພາຂອງຄະນະໜ່ວຍພັກຮາກຖານອົງການໄອຍະການປະຊາຊົນ ແຂວງບໍລິຄໍໄຊ ປະຈໍາ 3 ເດືອນຄື: ກໍລະກົດ, ສິງຫາ ແລະກັນຍາປີ 2020 ໄດ້ໄຂຂຶ້ນໃນວັນທີ 1 ຕຸລາຜ່ານມາ ໂດຍການເປັນປະທານຂອງສະຫາຍ ທອງໃບ ພຽນວົງ ເລຂາ ໜ່ວຍພັກຮາກຖານຫົວໜ້າອົງການໄອຍະການປະຊາຊົນແຂວງ, ມີຄະນະໜ່ວຍພັກຮາກຖານ, ແຂກຖືກເຊີນ, ພ້ອມດ້ວຍສະມະຊິກພັກ ສໍາຮອງ-ສົມບູນເຂົ້າຮ່ວມ.

  ສະຫາຍ ບຸນຜັນ ທໍາມະວົງ ຮອງເລຂາໜ່ວຍພັກຮາກຖານ ຮອງຫົວໜ້າອົງການໄອຍະການປະຊາຊົນແຂວງ ໄດ້ຜ່ານບົດສະຫຼຸບການຊີ້ນໍາ-ນໍາພາ ຂອງຄະນະໜ່ວຍພັກໃນໄລຍະ 3 ເດືອນຜ່ານມາ, ຊຶ່ງໄດ້ສະຫຼຸບຕີລາຄາຄືນການຊີ້ນໍາ-ນໍາພາຂອງຄະນະໜ່ວຍພັກ, ການຈັດຕັ້ງປະຕິ ບັດວຽກງານວິຊາສະເພາະ, ດ້ານດີ, ດ້ານອ່ອນ, ຂໍ້ຂົງຄ້າງ ແລະບົດຮຽນທີ່ຖອດຖອນໄດ້ເຊັ່ນ: ດ້ານການເມືອງແນວຄິດໄດ້ຖືເອົາການສຶກ ສາອົບຮົມການເມືອງ-ແນວຄິດເປັນສໍາຄັນຕົ້ນຕໍ, ນໍາພາຮ່ວມຊີວິດພັກປະຈໍາເດືອນເປັນປົກກະຕິຕໍ່ເນື່ອງໂດຍຕິດພັນກັບຄໍາຂັວນ 3 ມີ 4 ຮັບປະກັນຂອງອົງການໄອຍະການປະຊາຊົນສູງສຸດວາງອອກ, ເຮັດໃຫ້ສະມາຊິກພັກ, ພະນັກງານລັດຖະກອນມີແນວຄິດອຸ່ນອ່ຽນທຸ່ນທ່ຽງ, ມີຄຸນສົມບັດສີນທໍາປະຕິວັດ, ເຊື່ອໝັ້ນຕໍ່ແນວທາງນະໂຍບາຍຂອງພັກ, ເຄົາລົບລະບຽບກົດໝາຍຂອງລັດ, ຍົກສູງສະຕິລະວັງຕົວຕໍ່ກົນ ອຸບາຍຫັນປ່ຽນຂອງອິດທິກໍາລັງປໍລະປັກ, ມີຄວາມສາມັກຄີພາຍໃນ ແລະພາຍນອກ ພ້ອມກັນເຮັດສໍາເລັດທຸກໜ້າທີ່ວຽກງານທີ່ການຈັດ ຕັ້ງຂັ້ນເທິງມອບໝາຍໃຫ້, ວຽກງານຝືກອົບຮົມໂຄສະນາ ແລະວາລະສານ: ໄດ້ຈອງວາລະສານກວດກາ, ໜັງສືພິມຕ່າງໆໃຫ້ສະມາຊິກພັກ, ພະນັກງານ-ລັດຖະກອນ ໄດ້ສຶກສາຄົ້ນຄວ້າກໍາແໜ້ນຕໍ່ແນວທາງນະໂຍບາຍຂອງພັກ, ລະບຽບກົດໝາຍ ຂອງລັດ, ບັນດາມະຕິ, ຄໍາສັ່ງ, ຄໍາແນະນໍາເພື່ອເປັນບ່ອນອີງໃນການຈັດຕັ້ງປະຕິບັດວຽກງານໃຫ້ຖືກຕ້ອງຕາມກົດໝາຍ, ມີຈັນຍາບັນ, ຈັນຍາທໍາ, ຮັບໃຊ້ປະຊາຊົນດ້ວຍຄວາມຊື່ສັດບໍລິສຸດ, ວຽກງານກວດກາພັກ-ກວດກາລັດ: ໄດ້ຖືເປັນວຽກງານໜຶ່ງທີ່ສໍາຄັນເພາະໃນເມື່ອມີການຊີ້ນໍາ-ນໍາພາກໍ່ຕ້ອງມີການກວດກາ, ເພື່ອກະຕຸກຊຸກຍູ້ໃຫ້ທຸກຂົງເຂດໄດ້ປະຕິບັດຖືກຕ້ອງຕາມລະບຽບກົດໝາຍ, ເອົາໃຈໃສ່ຕິດຕາມກວດກາການປະຕິບັດກົດ ໝາຍ, ການສັ່ງຟ້ອງ ຜູ້ຖືກຫາຂຶ້ນສານ ແລະການປະຕິບັດງານຂອງເຈົ້າໜ້າທີ່ຕໍາຫຼວດ.

  ດ້ານວຽກງານວິຊາສະເພາະ: ໄດ້ຮັບຄໍາຮ້ອງຟ້ອງ ແລະຄໍາສະເໜີ 5 ສະບັບ, ແກ້ໄຂແລ້ວ 100%; ອອກຄໍາສັ່ງຈັບຕົວ, ຄໍາສັ່ງກັກຂັງ ພາງ, ຄໍາສັ່ງກວດຄົ້ນ ແລະຄໍາສັ່ງປ່ອຍຕົວ ຈໍານວນ 161 ສະບັບ, ລົງສັນນະສູດສະຖານທີ່ເກີດເຫດໄດ້ 7 ຄັ້ງ, ໄດ້ຮັບຄະດີແພ່ງ 16 ເລື່ອງ, ແກ້ໄຂແລ້ວ 16 ເລື່ອງ, ໄດ້ຮັບຄະດີອາຍາ 110 ເລື່ອງ, ແກ້ໄຂແລ້ວ 110 ເລື່ອງ; ເປີດ ກອງປະຊຸມຮ່ວມກັບສານປະຊາ ຊົນ ແລະອົງການສືບສວນ-ສອບສວນເຈົ້າໜ້າທີ່ຕໍາຫຼວດໄດ້ 12 ຄັ້ງ, ລົງກວດກາສະຖານທີ່ກັກຕົວ, ຄ້າຍຄຸມຂັງ-ດັດສ້າງ ໄດ້ 9 ຄັ້ງ, ເຂົ້າຮ່ວມປະຊຸມສານໄດ້ 16 ຄັ້ງ, ສົມທົບກັບຂະແໜງປະຕິບັດຄໍາຕັດສີນຂອງສານລົງກວດກາ, ປະເມີນລາຄາຊັບສີນຂອງຈໍາເລີຍເພື່ອຂາຍມາໃຊ້ແທນຄ່າເສຍຫາຍຕ່າງໆໄດ້ 2 ຄັ້ງ, ວຽກງານກໍ່ສ້າງພັກ ໄດ້ເອົາໃຈໃສ່ນໍາພາກໍ່ສ້າງພັກ ໂດຍຍຶດໝັ້ນຕາມ 5 ຫຼັກການ 3 ທິດນໍາ, ເອົາໃຈໃສ່ຕີລາຄາຄຸນ ນະພາບຂອງສະມາຊິກພັກໃນນັ້ນ ໄດ້ສະເໜີມະຫາຊົນຜູ້ກ້າວໜ້າເຂົ້າເປັນສະມາຊິກພັກ 3 ສະຫາຍ, ຍິງ 2 ສະຫາຍ, ຕິດຕາມມະຫາຊົນກ້າວໜ້າເພື່ອຮຽນສະໜັບສະໜູນ 2 ສະຫາຍ; ດ້ານແບບແຜນການນໍາພາ: ເອົາໃຈໃສ່ປັບປຸງແບບແຜນວິທີນໍາພາ-ວິທີເຮັດວຽກໂດຍຢຶດຖືປະຕິບັກຕາມຫຼັກການລວມສູນປະຊາທິປະໄຕ, ປຶກສາຫາລືເປັນໝູ່ຄະນະ, ແບ່ງວຽກໃຫ້ບຸກ ຄົນຮັບຜິດຊອບ, ມີການວາງແຜນການຊຸກ ຍູ້, ຕີລາຄາປະເມີນຜົນ, ປະຕິບັດລະບອບສ່ອງແສງລາຍງານໃຫ້ຄະນະພັກຂັ້ນເທິງຢ່າງ ເປັນປົກກະຕິ ໂອກາດດຽວກັນກອງປະຊຸມຍັງໄດ້ຈັດພິທີຮັບເອົາມະຫາຊົນຜູ້ກ້າວໜ້າທີ່ຄົບມາດຖານເງື່ອນໄຂຄົບຖ້ວນຕາມກົດລະບຽບຂອງພັກປະຊາຊົນປະຕິວັດລາວວາງອອກເຂົ້າເປັນສະ ມາພັກສໍາຮອງ ຈໍານວນ 2 ສະຫາຍ, ຍິງ 2 ສະຫາຍຕື່ມອິກ.

  ຕອນທ້າຍກອງປະຊຸມ ສະຫາຍ ທອງໃບ ພຽນວົງ ໄດ້ສະແດງຄໍາຍ້ອງຍໍຊົມເຊີຍຄະນະໜ່ວຍພັກ, ສະມາຊິກພັກທຸກສະຫາຍ ທີ່ສາມາດເຮັດສໍາເລັດທຸກໜ້າທີ່ວຽກງານທີ່ການຈັດຕັ້ງຂັ້ນເທິງມອບໝາຍໃຫ້, ພ້ອມທັງເໜັ້ນໜັກໃຫ້ສະມາຊິກພັກໃໝ່ຈົ່ງສືບຕໍ່ຕັ້ງໜ້າຝຶກຝົນຫຼໍ່ຫຼອມຕົນເອງໃນທຸກດ້ານເພື່ອກາຍເປັນສະມາຊິກພັກຜູ້ທີ່ມີຄວາມກ້າວໜ້າ ແລະເປັນແບບຢ່າງຮອບດ້ານໃຫ້ແກ່ມະຫາຊົນ.

________

ຂ່າວ: ພອນສະຫວັນ 

แชร์