ກາສີ ຈັດງານຕະຫຼາດນັດວາງສະແດງສິນຄ້າ

   ວັນທີ 2 ຕຸລາຜ່ານມາ, ເມືອງກາສີ ແຂວງວຽງຈັນ ໄດ້ຈັດງານຕະຫຼາດນັດວາງສະແດງສິນຄ້າຢູ່ທີ່ກຸ່ມບ້ານຜາເຈົ້າ, ໂດຍການໃຫ້ກຽດເປັນປະທານຂອງທ່ານ ແພງຄຳ ຈັນທະມຸງຄຸນ ຮອງເລຂາພັກເມືອງປະທານກວດກາພັກ-ລັດເມືອງກາສີ, ທ່ານ ຄຳເພັດ ທອງປະດິດ ຮອງຫົວໜ້າພະແນກອຸດສາຫະກຳ ແລະການຄ້າແຂວງວຽງ ຈັນ ພ້ອມດ້ວຍທີມງານຂັ້ນແຂວງ, ມີຄະນະປະຈຳ-ກຳມະການພັກເມືອງ, ມີຫົວໜ້າ-ຮອງຫົວໜ້າຫ້ອງການ, ມີພະນັກງານ ວິຊາການ, ມີການຈັດຕັ້ງບ້ານພາຍໃນກຸ່ມຜາເຈົ້າ, ພ້ອມດ້ວຍພໍ່ແມ່ປະຊາຊົນຕະຫຼອດຮອດບັນດານັກທຸລະກິດພໍ່ຄ້າຊາວຂາຍເຂົ້າຮ່ວມຢ່າງພ້ອມພຽງ.

 ທ່ານ ຈັນປະເສີດ ບຸດດາວົງ ຮັກສາການຫົວໜ້າຫ້ອງການອຸດສາຫະກຳ ແລະການຄ້າເມືອງກາສີໄດ້ຂຶ້ນຜ່ານບົດລາຍງານໂດຍຫຍໍ້ກ່ຽວກັບການກະກຽມງານຕະຫຼາດນັດ, ຊຶ່ງມີເນື້ອໃນບາງຕອນວ່າ: ການຈັດງານຕະຫຼາດນັດຄັ້ງນີ້ແມ່ນເພື່ອຊ່ວຍໂຄສະນາທ່າແຮງບົ່ມຊ້ອນຄວາມອຸດົມສົມບູນທາງດ້ານສີນຄ້າກະສິກຳ, ສີນຄ້າສຳເລັດຮູບ, ເປັນການໂຄສະນາດ້ານເອກະລັກວັດທະນະທຳ ແລະຄວາມຫຼາກຫຼາຍທາງດ້ານຮີດ ຄອງປະເພນີເພື່ອໃຫ້ນັກທຸລະກິດ, ຜູ້ປະກອບການ, ຜູ້ລົງທຶນ ແລະ ພໍ່ແມ່ປະຊາຊົນໄດ້ມີໂອກາດພົບປະແລກປ່ຽນຊື້-ຂາຍສີນຄ້າເຊິ່ງກັນ ແລະກັນ, ການວາງສະແດງສີນຄ້າຄາດວ່າ ມີປະມານ 19 ຮ້ານ, 23 ຫົວໜ່ວຍ ໃນນັ້ນຕົວແທນພາກລັດມີ 3 ຫົວໜ່ວຍ ມູນຄ່າ 6 ລ້ານກວ່າກີບ, ຫົວໜ່ວຍທຸລະກິດທົ່ວໄປ 17 ຫົວໜ່ວຍ ມູນຄ່າ 418 ລ້ານກວ່າກີບ.

  ໃນຕອນທ້າຍ ທ່ານ ແພງຄຳ ຈັນທະມຸນຄຸນ ຮອງເລຂາພັກເມືອງປະທານກວດກາພັກ-ລັດກໍ່ໄດ້ມີຄຳເຫັນໂອລົມຕໍ່ພິທີຊຶ່ງທ່ານໄດ້ກ່າວສະແດງຄວາມຍ້ອງຍໍຊົມເຊີຍຕໍ່ຄະນະຮັບຜິດຊອບໃນການຈັດງານຕະຫຼາດນັດວາງສະແດງ ແລະ ຈຳໜ່າຍສິນຄ້າໃນຄັ້ງນີ້, ຊຶ່ງເປັນການຍົກສະຖານະບົດບາດທ່າແຮງດ້ານການຜະລິດກະສິກຳ, ຜະ ລິດຕະພັນປຸງແຕ່ງ, ຫັດຖະກຳຈັກສານ,ຕໍ່າຫູກທໍໄໝ ແລະສິນຄ້າທົ່ວໄປຂອງປະຊາຊົນບັດດາເຜົ່າໃຫ້ໄດ້ຮັບການວາງສະແດງບໍລິການຄ້າຂາຍໃນງານຕະຫຼາດນັດເພື່ອເປັນການສົ່ງເສີມ ແລະແກ້ໄຂຊີວິດການເປັນຢູ່ຂອງປະຊາຊົນໃຫ້ດີຂຶ້ນ, ທັງນີ້ກໍ່ເພື່ອເປັນການສ້າງຜົນງານຄຳນັບຮັບຕ້ອນກອງປະຊຸມໃຫ່ຍອົງຄະນະພັກຂອງແຂວງຄັ້ງທີ VI ທີ່ຈະໄຂຂຶ້ນໃນຕໍ່ໜ້ານີ້ໃຫ້ມີເນື້ອໃນອັນເລີກເຊິ່ງ ແລະເປັນຂະບວນການຟົດຟື້ນຍິ່ງຂຶ້ນ.

  ພ້ອມກັນນັ້ນ ທ່ານ ແພງຄຳ ຈັນທະມຸນຄຸນ ກໍ່ໄດ້ເປີດງານຕະຫຼາດນັດຢ່າງເປັນທາງການ, ພ້ອມທັງເດີນທ່ຽວຊົມງານວາງສະແດງສິນຄ້າຢ່າງມີບັນຍາກາດຟົດຟື້ນ.

--------------

ໜັງສືພິມເສດຖະກິດ-ສັງຄົມ

แชร์