ເມືອງຫົງສາ ປະກວດເຮືອໄຟງາມ ໃນງານບຸນອອກພັນສາ

  ໃນຕອນຄໍ່າຂອງວັນທີ 2 ຕຸລາ ຜ່າມາ 2020 ເມືອງຫົງສາແຂວງໄຊຍະບູລີ ໄດ້ຈັດງານປະກວດເຮືອໄຟງາມ, ຈູດບັ້ງໄຟດອກ ແລະສະແດງສີລະປະດົນຕີພື້ນເມືອງໃນງານບຸນອອກພັນສາປະວໍລະນາປະຈໍາປີ ພສ 2563 ຂຶ້ນ, ທີ່ຜາມໄຊທ່າຊ່ວງເຮືອນໍ້າແກນ, ໃຫ້ກຽດເຂົ້າຮວ່ມຂອງທ່ານ ຄໍາຫຼ້າ ຜີວວັນນາເຈົ້າເມືອງໆຫົງສາ, ມີການນໍາຂອງເມືອງ, ຫົວໜ້າ-ຮອງຫົວໜ້າຫ້ອງການ, ພະນັກງານຫຼັກແຫຼ່ງ, ອົງການປົກ ຄອງບ້ານເທສະບານເມືອງ, ແຂກຖືກເຊີນ ແລະມວນຊົນເຂົ້າຮ່ວມຢ່າງຫຼວງຫຼາຍ.

  ທ່ານ ແຫຼ້ ອອ່ນສົມບູນ ຮອງເຈົ້າເມືອງຫົງສາປະທານຈັດງານໄດ້ກ່າວວ່າການຈັດງານໃນຄັ້ງນີ້ກໍ່ເພື່ອເປັນການອະນຸລັກປົກປັກຮັກສາວັດທະນະທໍາຮີດຄອງປະເພນີອັນດີງາມຂອງປະຊາຊົນລາວບັນດາເຜົ່າເວົ້າລວມເວົ້າສະເພາະກໍ່ຄືຊາວເມືອງຫົງສາທີ່ໄດ້ສືບທອດກັນມາ, ທັງເປັນການເຕົ້າໂຮມສາມັກຄີທັງພາຍໃນພາຍນອກໃຫ້ແໜ້ນແຟ້ນຍິ່ງຂຶ້ນ, ເຮັດໃຫ້ຄົນຮຸ່ນໜຸ່ມໄດ້ສືບສານຮຽນຮູ້ຮີດຄອງປະເພນີອັນດີງາມຂອງລາວທີ່ໄດ້ຢຶດຖືກັນມາໃນແຕ່ລະປີ ແລະອີກດ້ານໜຶ່ງເພື່ອເປັນການຊຸກຍູ້ສົ່ງເສີມ ການທ່ອງທຽ່ວພາຍໃນເມືອງໃຫ້ມີທ່າຂະຫຍາຍຕົວດີຂຶ້ນ.

  ການຈັດງານໃນຄັ້ງນີ້ເມືອງຫົງສາໄດ້ຈັດໃຫ້ມີຫຼາຍກິດຈະກໍາເປັນຕົ້ນການຈັດຕັ້ງພິທີທາງສາສະໜາການວຽນທຽນອ້ອມພຸດທະສິມມາວັດບ້ານສີບຸນເຮືອງ, ຈູດທູບທຽນບູຊາເຮືອໄຟບົກຢູ່ແຄມແມ່ນໍ້າແກນ, ຊົມການໄຫຼເຮືອໄຟງາມ, ຊົມການແຂ່ງຂັນບັ້ງໄຟດອກ, ການຄົບງັນມ່ວນຊື່ນຕາມປະເພນີ, ການປະກວດໃນຄັ້ງນີ້ມີເຮືອໄຟນໍ້າເຂົ້າຮ່ວມແຂ່ງຂັນທັງໝົດ 10 ລໍາມາຈາກບ້ານ ຈຳນວນ 10 ບ້ານ, ມີບັ້ງໄຟດອກເຂົ້າຮ່ວມແຂ່ງຂັນ 17 ບັ້ງ ທີ່ມາຈາກບ້ານ ແລະສໍານັກງານຫ້ອງການ.

  ຜ່ານການແຂ່ງຂັນເຮືອໄຟງາມຊະນະເລີດອັນດັບທີ 1 ແມ່ນບ້ານໂພນໄຊ ໄດ້ຮັບເງິນສົດ 1,2 ລ້ານກີບ, ອັນດັບທີ 2 ບ້ານສີມຸງຄຸນໄດ້ຮັບເງິນສົດ 1 ລ້ານກີບ, ອັນດັບທີ 3 ແມ່ນບ້ານສີບຸນເຮືອງໄດ້ຮັບເງິນສົດ 8 ແສນກີບ ແລະລາງວັນຊົມເຊີຍໄດ້ຮັບເງິນສົດ 5 ແສນກີບ, ການແຂ່ງຂັນບັ້ງໄຟດອກຊະນະເລີດ ອັນດັບທີ 1 ແມ່ນບ້ານໂພນໄຊ ໄດ້ຮັບເງິນສົດ 8 ແສນກີບ, ອັນດັບທີ 2 ແມ່ນບ້ານວຽງແກ້ວໄດ້ຮັບເງິນສົດ 6 ແສນກີບ, ທີ່ 3 ແມ່ນບ້ານນາແກ່ນຄໍາໄດ້ຮັບເງິນສົດ 4 ແສນກີບ, ສ່ວນລາງວັນຊົມເຊີຍໄດ້ຮັບເງິນສົດຈໍານວນ 2 ແສນກີບໃຫ້ກຽດມອບລາງວັນໃນຄັ້ງນີ້ ໂດຍແມ່ນທ່ານ ເຈົ້າເມືອງຫົງສາພ້ອມດ້ວຍຄະນະຮັບຜິດຊອບຂອງເມືອງ.

----

ຮຽບຮຽງໂດຍ: ບຸນປອນ

แชร์