ຜົນກອງປະຊຸມໃຫຍ່ອົງຄະນະພັກ ແຂວງຫຼວງພະບາງ ຄັ້ງທີ VIII

   ກອງປະຊຸມໃຫຍ່ອົງຄະນະພັກແຂວງຫຼວງພະບາງຄັ້ງທີ VIII ໄດ້ດຳເນີນໃນວັນທີ 2-3 ຕຸລາ 2020 ທີ່ຫ້ອງປະຊຸມໃຫຍ່ຫ້ອງວ່າການປົກຄອງແຂວງ, ໂດຍການເປັນປະທານຂອງສະຫາຍ ຄຳຂັນ ຈັນທະວີສຸກ, ກຳມະການສູນກາງພັກ, ເລຂາຄະນະບໍລິຫານງານພັກແຂວງ, ເຈົ້າແຂວງໆຫຼວງພະບາງ ແລະໃຫ້ກຽດເຂົ້າຮ່ວມຂອງສະຫາຍ ທອງລຸນ ສີສຸລິດ, ກຳມະການກົມການເມືອງສູນກາງພັກ, ນາຍົກລັດຖະມົນຕີ,ມີຜູ້ຕາງໜ້າຫ້ອງວ່າການສູນກາງພັກ,ຄະນະຈັດຕັ້ງສູນກາງພັກ ແລະຄະນະກວດກາສູນກາງພັກ,ຜູ້ແທນສົມບູນຈຳນວນ 264 ສະຫາຍ, ຍິງ 30 ສະຫາຍ ທີ່ເປັນຕົວແທນໃຫ້ແກ່ສະມາຊິກພັກໃນທົ່ວແຂວງຈຳນວນ 23.909 ສະຫາຍ ພ້ອມດ້ວຍແຂກຖືກເຊີນເຂົ້າຮ່ວມ.

  ເນື້ອໃນຂອງກອງປະຊຸມໃຫຍ່ຄັ້ງນີ້ແມ່ນສຸມໃສ່ພິຈາລະນາ ແລະຮັບຮອງເອົາຮ່າງລາຍງານການເມືອງ, ບົດສຳຫຼວດການນຳພາຂອງຄະນະບໍລິຫານງານພັກແຂວງສະ ໄໝທີ VII, ແຜນພັດທະນາເສດຖະກິດ-ສັງຄົມ 5 ປີ (2021-2025); ຮັບຟັງການປະກອບຄຳເຫັນຈາກຂະແໜງການ, ກົມກອງ, ຄອບຄົວຕົວແບບຈຳນວນໜຶ່ງ,ພ້ອມທັງດຳເນີນການປ່ອນບັດເລືອກຕັ້ງເອົາຄະນະບໍລິຫານງານພັກແຂວງສະໄໝທີ VIII ແລະເລືອກເອົາຜູ້ແທນໄປເຂົ້າຮ່ວມກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XI.

   ສຳລັບການປ່ອນບັດເລືອກຕັ້ງເອົາຄະນະບໍລິຫານງານພັກແຂວງສະໄໝທີ VIII ມີຜູ້ສະໝັກຮັບເລືອກຕັ້ງຈຳນວນ 42 ສະຫາຍ, ຍິງ 5 ສະຫາຍ, ເລືອກເອົາ 37 ສະຫາຍໃນນີ້ເລືອກໄດ້ ຍິງ 4 ສະຫາຍ, ຜ່ານການ ເລືອກຕັ້ງ ແລະດຳເນີນກອງປະຊຸມຄັ້ງປະຖົມມະລຶກຂອງຄະນະບໍລິຫານງານພັກ ແຂວງສະໄໝທີ VIII ໄດ້ເປັນເອກະສັນກັນເລືອກເອົາຄະນະປະຈຳພັກແຂວງຈຳນວນ 11 ສະຫາຍ (ຍິງ 1 ສະຫາຍ) ປະກອບມີ: ສະຫາຍຄຳຂັນ ຈັນທະວີສຸກ, ສະຫາຍ ວົງສະຫວັນ ເທບພະ ຈັນ, ສະຫາຍ ສຸກັນ ບຸນຍົງ, ສະຫາຍ ສິງຕັນ ໄຊລືຊົ່ງ, ສະຫາຍ ຄຳຫຼ້າ ລຽນປະດິດ, ສະຫາຍ ມອນໄຊ ລາວມົວຊົ່ງ, ສະຫາຍ ພົນຈັດຕະວາ ສົມຈັນ ແກ້ວຈັນດາ, ສະຫາຍ ນາງ ວຽນວິໄລ ດີລະພັນ, ສະຫາຍ ວຽງທອງ ຫັດສະຈັນ, ສະຫາຍ ຄຳຄ່ອງ ພົມມະປັນຍາ ແລະສະຫາຍ ບຸນເລື່ອມ ມະນີວົງ ພ້ອມນັ້ນກໍ່ໄດ້ເປັນເອກະສັນກັນເລືອກເອົາ ສະຫາຍ ຄຳຂັນ ຈັນທະວີສຸກເປັນເລຂາຄະນະບໍລິຫານງານພັກແຂວງ, ສະຫາຍ ວົງສະຫວັນ ເທບພະຈັນ ແລະສະຫາຍ ສຸກັນ ບຸນຍົງ ເປັນຮອງເລຂາຄະນະບໍລິ ຫານງານພັກແຂວງ, ເລືອກເອົາສະຫາຍ ຄຳຫຼ້າ ລຽນປະດິດ ເປັນປະທານຄະນະກວດກາພັກແຂວງ, ສະຫາຍ ສົມໝາຍ ສຸທິວົງ, ສະຫາຍ ຄຳພວງ ດວງມະນີ ແລະສະຫາຍ ນາງ ສົມໝາຍ ມິນາກອນ ເປັນຮອງປະທານກວດກາພັກແຂວງ, ໃນຂະນະດຽວກັນກອງປະຊຸມໃຫຍ່ໄດ້ເລືອກເອົາຜູ້ແທນສົມບູນຈຳນວນ 31 ສະຫາຍ (ຍິງ 4 ສະຫາຍ) ແລະສຳຮອງ 3 ສະຫາຍ ເພື່ອເຂົ້າຮ່ວມກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XI.

 ອັນສຳຄັນກອງປະຊຸມໄດ້ຮັບຟັງການໂອ້ລົມ ແລະໃຫ້ທິດຊີ້ນຳຈາກສະຫາຍ ທອງລຸນ ສີສຸລິດ ຊຶ່ງກ່ອນອື່ນໝົດສະຫາຍໄດ້ສະແດງຄວາມຊົມເຊີຍຜົນງານອັນໃຫຍ່ຫຼວງ ແລະຫຼາຍດ້ານທີ່ຄະນະພັກແຂວງກໍຄືຄະນະພັກ ແລະອົງການປົກຄອງຂັ້ນຕ່າງໆຍາດມາໄດ້ໃນໄລຍະ 5 ປີຜ່ານມາ, ພ້ອມກັນນີ້ສະຫາຍໄດ້ເນັ້ນໜັກບາງບັນຫາສຳຄັນ ເພື່ອໃຫ້ຄະນະບໍລິຫານງານພັກແຂວງຊຸດໃໝ່ ແລະຜູ້ແທນກອງປະຊຸມນຳໄປຄົ້ນຄວ້າ, ຫັນເປັນທິດທາງ ແລະ ແຜນການລະອຽດຂອງຄະນະພັກຂັ້ນຂອງຕົນໝູນໃຊ້ ແລະຈັດຕັ້ງຜັນຂະຫຍາຍໃຫ້ປາກົດຜົນເປັນຈິງເປັນຕົ້ນສືບຕໍ່ຢຶດໝັ້ນ ແລະເດັດດ່ຽວນໍາພາພາລະກິດປົກປັກຮັກສາທ້ອງຖິ່ນຂອງຕົນດ້ວຍການຜັນຂະຫຍາຍແນວທາງປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນຮອບດ້ານ, ຮັບປະກັນໃຫ້ແຂວງມີສະຖຽນລະພາບທາງ ດ້ານການເມືອງຢ່າງໜັກແໜ້ນ, ສັງຄົມມີຄວາມສະຫງົບປອດໄພ ແລະເປັນລະບຽບຮຽບຮ້ອຍຢ່າງຕໍ່ເນື່ອງ, ຮັບປະກັນບໍ່ໃຫ້ມີບັນຫາຮ້າຍແຮງເກີດຂຶ້ນ, ຄົ້ນຄວ້າບັນດາມາດຕະການຕົວຈິງ ເພື່ອເສີມຂະຫຍາຍກໍາລັງແຮງຂອງບັນດາພາກສ່ວນເສດຖະກິດເຂົ້າໃນການຂຸດຄົ້ນຄວາມອາດສາມາດບົ່ມຊ້ອນ ແລະທ່າແຮງໄດ້ປຽບຂອງແຂວງ, ເຮັດໃຫ້ເສດຖະກິດມະຫາພາກຂອງແຂວງມີຄວາມໝັ້ນທ່ຽງ, ຖືກທິດ, ແກ້ໄຂຄວາມແຕກໂຕນກັນກ່ຽວກັບລະດັບການພັດທະນາ ແລະ ລະດັບຊີວິດການເປັນຢູ່ລະຫວ່າງເຂດຕົວເມືອງກັບເຂດຊົນນະບົດໃຫ້ໄດ້ເທື່ອລະກ້າວ, ບັນລຸຄາດໝາຍກ່ຽວກັບການລຶບລ້າງຄວາມທຸກຍາກ, ເອົາໃຈໃສ່ເພີ່ມຂຶ້ນຕໍ່ວຽກງານສຶກສາໂດຍລົງເລິກກວດກາຄຸນນະພາບຂອງໂຮງຮຽນ ແລະສະຖາບັນການສຶກສາຕ່າງໆ, ຊຶ່ງຂະແໜງສຶກສາ, ຂະແໜງແຮງງານ ແລະຂະແໜງແຜນການໃຫ້ຮີບຮ້ອນປຶກສາຫາລືກັນເພື່ອປັບປຸງແຜນພັດທະນາຊັບພະຍາກອນມະນຸດໃຫ້ຕິດແທດ ແລະຮັບໃຊ້ໂດຍກົງຕໍ່ຄວາມຕ້ອງການຕົວຈິງຂອງການພັດທະນາແຂວງຫຼວງພະບາງກໍຄືບັນດາ ແຂວງພາກເໜືອ, ເອົາໃຈໃສ່ເຊີດຊູນໍ້າໃຈຮັບຜິດຊອບແລະນໍ້າໃຈຮັບໃຊ້ປະຊາຊົນຂອງອົງການບໍລິຫານລັດທຸກຂັ້ນກໍຄືຂອງ ພະນັກງານ, ລັດຖະກອນທຸກຄົນໃຫ້ສົມກັບລັດເຮົາແມ່ນລັດຂອງປະຊາຊົນ, ໂດຍປະຊາຊົນ ແລະເພື່ອປະຊາຊົນ, ປະຕິບັດຄຳຂວັນ “ຍົກສູງຄວາມສາມາດນໍາພາ ແລະຄວາມເປັນແບບຢ່າງນໍາໜ້າຕໍ່ສູ້ຂອງທົ່ວອົງຄະນະພັກ, ເຮັດໃຫ້ແຂວງຫຼວງພະບາງນັບມື້ນັບໜັກແໜ້ນ, ພັດທະ ນາຕໍ່ເນື່ອງ,ມີຄວາມຍືນຍົງ,ກ້າວສູ່ທັນສະໄໝ ແລະຍຸຕິທໍາ ”ແລະທິດທາງລວມຮອດປີ 2025 “ສືບຕໍ່ບຸກທະລຸທັງ 4 ດ້ານຢ່າງແຂງແຮງ, ເຮັດໃຫ້ແຂວງໄດ້ຮັບການພັດທະນາຢ່າງຕໍ່ເນື່ອງ,ຍືນຍົງ ແລະມີພື້ນຖານອັນໜັກແໜ້ນກ້າວຂຶ້ນເປັນຫົວໜ່ວຍຍຸດທະສາດໜຶ່ງທີ່ເຂັ້ມແຂງ,ຊີວິດການເປັນຢູ່ທາງດ້ານວັດຖຸ ແລະຈິດໃຈຂອງປະ ຊາຊົນບັນດາເຜົ່ານັບມື້ນັບດີຂຶ້ນ, ສັງຄົມມີຄວາມສະຫງົບ, ຍຸຕິທໍາ ແລະສີວິໄລສົມກັບເປັນເມືອງມໍລະດົກໂລກ, ແຂວງທີ່ມີຊື່ລືຊາ, ມີມູນເຊື້ອຕໍ່ສູ້ ແລະມູນເຊື້ອປະຕິວັດຢ່າງແທ້ຈິງ.

   ສຸດທ້າຍສະຫາຍ ທອງລຸນ ສີສຸລິດ ໄດ້ຮຽກຮ້ອງມາຍັງຄະນະບໍລິຫານງານພັກແຂວງຊຸດໃໝ່ຈົ່ງເຊີດຊູຄວາມຮັບຜິດຊອບການເມືອງຂອງຕົນໃຫ້ສູງຂຶ້ນ,ເຊີດຊູຄວາມເປັນແບບຢ່າງໃນການປະຕິບັດກົດລະບຽບຂອງພັກແລະກົດໝາຍຂອງລັດ, ມີຄວາມສາມັກຄີເປັນເອກະພາບພາຍໃນສູງເພື່ອເປັນໃຈກາງແຫ່ງຄວາມສາມັກຄີເປັນເອກະ ພາບຂອງທົ່ວອົງຄະນະພັກ ແລະປວງຊົນບັນດາເຜົ່າຂອງແຂວງຫຼວງພະບາງ, ຮຽກຮ້ອງມາຍັງຄະນະພັກ ແລະ ສະມາຊິກພັກທຸກສະຫາຍຈົ່ງຕັ້ງໜ້າຝຶກຝົນຫຼໍ່ຫຼອມດ້ານຄຸນສົມບັດສິນທຳປະຕິວັດ, ເຊີດຊູນໍ້າໃຈຟົດຟື້ນປະຕິວັດ, ອອກແຮງຊອກຮູ້ຮໍ່າຮຽນກຳແໜ້ນທິດສະດີແນວທາງນະໂຍບາຍຂອງພັກ ແລະກົດໝາຍຂອງລັດ ແລະເຊີດຊູນໍ້າໃຈຮັບໃຊ້ປະຊາຊົນ.

--------------

ຂ່າວ: ກົມປະຊາສຳພັນ ຫສນຍ

ຮູບພາບ: #ຫນັງສືພິມເສດຖະກິດສັງຄົມ

แชร์