ອັດຕາການຫວ່າງວຽກຂອງຍີ່ປຸ່ນເພີ່ມຂຶ້ນ 3%

  ອັດຕາການຫວ່າງວຽກຂອງຍີິ່ປຸ່ນເພີ່ມຂຶ້ນ 3% ໃນເດືອນສິງຫາທີ່ຜ່ານມາ ຖືເປັນສະຖິຕິສູງສຸດນັບຕັ້ງແຕ່ໄລຍະກາງປີ 2017 ຊຶ່ງເປັນຜົນມາຈາກການແຜ່ລະບາດຂອງເຊື້ອພະຍາດໂຄວິດ-19.

  ຕາມຂ່າວຕ່າງປະເທດລາຍງານວ່າ: ຕະຫຼາດແຮງງານຂອງຍີ່ປຸ່ນຕ້ອງປະເຊີນກັບຄວາມເຄັ່ງຕຶງ ຂະນະທີ່ນາຍຈ້າງພະຍາຍາມຈ້າງວຽກ ແຕ່ປະຊາກອນຊາວໜຸ່ມກັບຫຼຸດລົງ ເພາະຍີ່ປຸ່ນເຂົ້າສູ່ສັງຄົມຜູ້ສູງອາຍຸ ອະດີດນາຍົກລັດຖະມົນຕີຍີ່ປຸ່ນ ຊິນໂຊ ອາເບະ ພະຍາຍາມທີ່ຈະແກ້ໄຂບັນຫາດັ່ງກ່າວ, ໂດຍວາງແຜນນໍາແມ່ຍິງ ແລະຜູ້ສູງອາຍຸກັບເຂົ້າມາໃນລະບົບແຮງງານ ລວມທັງການຫຼຸດຜ່ອນມາດຕະການເຂັ້ມງວດຂອງນະໂຍບາຍຮັບຄົນ ເຂົ້າເມືອງຂະນະທີ່ທ່ານ ໂຍຊິຮິເດະ ຊູງະ ນາຍົກລັດຖະມົນຕີຍີ່ປຸ່ນທີ່ເຂົ້າຮັບຕຳແໜ່ງຕໍ່ຈາກທ່ານ ຊິນໂຊ ອາເບະ ໃນ 2 ເດືອນກ່ອນໃຫ້ ສັນຍາວ່າ ຈະສານຕໍ່ແຜນງານດັ່ງກ່າວໃຫ້ສຳເລັດ.

  ກ່ອນໜ້ານີ້ ຍີ່ປຸ່ນປະເຊີນກັບຜົນກະທົບຮຸນແຮງຈາກໄພທຳມະຊາດ ແລະພາສີຜູ້ບໍລິໂພກທີ່ເພີ່ມສູງຂຶ້ນ ພ້ອມທັງການແຜ່ລະບາດຂອງເຊື້ອພະຍາດໂຄວິດ-19 ທີ່ທຳລາຍສະພາບເສດຖະກິດທົ່ວໂລກ ຫຼັງຈາກພົບການແຜ່ລະບາດຄັ້ງທຳອິດລັດຖະບານຍີ່ປຸ່ນບໍ່ໄດ້ໃຊ້ຄຳສັ່ງປິດປະເທດ ແຕ່ຂໍໃຫ້ປະຊາຊົນກັກຕົວຢູ່ໃນເຮືອນ ຊຶ່ງໄດ້ຮັບຄວາມຮ່ວມມືເປັນຢ່າງດີ ແຕ່ການໃຊ້ມາດຕະການປິດຊາຍແດນເຮັດໃຫ້ອຸດສາຫະ ກຳການທ່ອງທ່ຽວການໃຊ້ຈ່າຍຂອງຜູ້ບໍລິໂພກ ແລະອຸດສາຫະກຳບໍລິການໄດ້ຮັບຜົນກະທົບຢ່າງໜັກ.

----

ໜັງສືພິມ ເສດຖະກິດ-ສັງຄົມ

แชร์