ຕ່າງປະເທດທ່ຽວກຳປູເຈຍຫຼຸດລົງ 76%

  ຖະແຫຼງການຂອງອັງກໍ ເອນເທີໄພສ ຂອງກຳປູເຈຍລະບຸວ່າ ອຸທິຍານບູຮານນະຄະດີອັງກໍ ຫຼື ນະຄອນວັດມີຈໍານວນນັກທ່ອງທ່ຽວຕ່າງປະເທດ 396.241 ຄົນ ໃນໄລຍະ 9 ເດືອນທຳອິດຂອງປີນີ້ ຫຼຸດລົງ 76% ເມື່ອທຽບກັບໄລຍະເວລາດຽວກັນຂອງປີກ່ອນ.

  ຕາມຂ່າວຕ່າງປະເທດລາຍ ງານວ່າ ນະຄອນວັດມີຍອດຈຳໜ່າຍບັດເຂົ້າຊົມໃນເດືອນມັງກອນ ເຖິງເດືອນກັນຍາຂອງປີນີ້ 18,45 ລ້ານໂດລາສະຫະລັດ ຫຼຸດລົງເຖິງ 75% ເມື່ອທຽບກັບໄລຍະເວລາດຽວກັນຂອງປີກ່ອນ ຂະນະທີ່ເດືອນກັນຍາມີນັກທ່ອງທ່ຽວຕ່າງປະເທດພຽງ 2.948 ຄົນ ແລະສ້າງລາຍໄດ້ຈາກການຈຳໜ່າຍບັດພຽງ 124.296 ໂດລາ ຫຼຸດລົງ 97,3% ແລະ 97,4% ຕາມລໍາດັບເມື່ອທຽບກັບເດືອນດຽວກັນຂອງປີກ່ອນ ຊຶ່ງຈໍານວນນັກທ່ອງທ່ຽວຕ່າງປະເທດຫຼຸດລົງ ເປັນຜົນມາຈາກການແຜ່ລະບາດຂອງເຊື້ອໂຄວິດ-19 ທີ່ເຮັດໃຫ້ທາງ ການກຳປູເຈຍຕ້ອງໃຊ້ມາດຕະການເຂັ້ມງວດຈຳກັດການເດີນທາງຂອງນັກທ່ອງທ່ຽວຕ່າງປະເທດຕັ້ງແຕ່ເດືອນມີນາທີ່ຜ່ານມາຖະແຫຼງການຂອງກະຊວງສາທາລະນະສຸກກຳປູເຈຍລະບຸວ່າ ກໍາປູເຈຍມີຄົນເຈັບຕິດເຊື້ອໂຄວິດ-19 ຢູ່ທີ່ 277 ຄົນ, ບໍ່ມີຜູ້ເສຍຊີວິດ ແລະປິ່ນປົວຫາຍດີ 275 ຄົນ.

  ນະຄອນວັດຕັ້ງຢູ່ແຂວງສຽມຣາດ ທາງຕາເວັນຕົກສຽງເໜືອຂອງກຳປູເຈຍ ແລະໄດ້ຮັບການຂຶ້ນທະບຽນເປັນມໍລະດົກໂລກຂອງອົງການອຸຍເນັດໂກໃນປີ 1992 ຈົນກາຍເປັນສະຖານທີ່ທ່ອງທ່ຽວທີ່ໄດ້ຮັບຄວາມນິຍົມຫຼາຍທີ່ສຸດຂອງກຳປູເຈຍ.

----

ໜັງສືພິມ ເສດຖະກິດ-ສັງຄົມ

แชร์