ນະຄອນປາກເຊ ສືບຕໍ່ຮັກສາປະເພນີ ປະຈໍາບຸນອອກພັນສາ

  ນະຄອນປາກເຊ ແຂວງຈຳປາສັກ ໄດ້ຈັດງານບຸນຊ່ວງເຮືອອອກພັນສາຂຶ້ນເພື່ອສືບຕໍ່ຮັກສາຮີດຄອງປະເພນີທີ່ເຄີຍສືບທອດປະຕິບັດກັນມາແຕ່ດົນນານ, ເພາະບຸນຊ່ວງເຮືອເປັນກິດຈະກຳໜຶ່ງທີ່ສອດຄ່ອງກັບວິຖີຊີວິດຄວາມເປັນຢູ່ຂອງຄົນລາວທັງຊາດທີ່ອາໄສຢູ່ໃກ້ກັບແມ່ນໍ້າ ແລະມັກມີການແຂ່ງເຮືອຄວບຄູ່ໄປກັບການເຮັດບຸນຊ່ວຍສ້າງບັນຍາກາດເຮັດໃຫ້ງານບຸນມີຄວາມຄຶກຄື້ນຍິ່ງຂຶ້ນ.

  ງານບຸນຊ່ວງເຮືອປະເພນີປະຈໍາບຸນອອກພັນສາຂອງນະຄອນປາກເຊ ໄດ້ຈັດຂຶ້ນໃນວັນທີ 3 ຕຸລາ 2020 ທີ່ທ່າສາລາຄຳປາກແມ່ນໍ້າເຊໂດນ ໂດຍການເຂົ້າຮ່ວມຂອງທ່ານ ສີທົນ ແກ້ວພູວົງ ປະທານແນວລາວສ້າງຊາດແຂວງຈຳປາສັກ, ທ່ານ ອຸດົມສັກ ດີວິໄຊ ເຈົ້ານະຄອນປາກເຊ, ມີບັນດາ ທ່ານຮອງເຈົ້ານະຄອນ, ການນຳນະຄອນ, ຄະນະສີພາຍເຮືອຊ່ວງ ແຕ່ລະບ້ານພ້ອມດ້ວຍມວນຊົນພາຍໃນແຂວງ ແລະຕ່າງແຂວງ.

  ທ່ານ ເກດສະໜາ ຄຳມິ່ງສະຫວັດ ຮອງເຈົ້ານະຄອນປາກເຊ ປະທານຈັດງານບຸນຊ່ວງເຮືອປີນີ້ໄດ້ ກ່າວວ່າ: ເຖິງວ່າສະພາບການລະບາດພະຍາດ covid-19 ແຜ່ລາມຫຼາຍປະເທດໃນໂລກ, ແຕ່ຍ້ອນເຫັນໄດ້ຄວາມສໍາຄັນທາງດ້ານວັດທະນະທໍາອັນດີງາມຂອງຊາດ, ນະຄອນປາກເຊ ຈຶ່ງໄດ້ຈັດງານບຸນຊ່ວງເຮືອອອກພັນສາຂຶ້ນຕາມຮີດຄອງປະເພນີທີ່ເຄີຍສືບທອດປະຕິບັດກັນມາແຕ່ດົນນານຕ່າງແຕ່ບໍ່ໄດ້ໃຫຍ່ຄືກັບປີທີ່ຜ່ານ ຊຶ່ງມີເຮືອ ປະເພດ 28 ສີພາຍເຂົ້າຮ່ວມແຂ່ງຂັນ, ສໍາລັບໃນປີນີ້ແມ່ນມີເຮືອພຽງ 6 ລໍາຊຶ່ງແມ່ນເຮືອພາຍໃນນະຄອນປາກເຊເຂົ້າແຂ່ງຂັນເທົ່ານັ້ນ.

  ຜ່ານການແຂ່ງຂັນເຮືອທີ່ຊະນະເລີດແມ່ນເຮືອບ້ານດົງເກາະໂລງ ໄດ້ຮັບຂັນລາງວັນ 1 ໜ່ວຍ ພ້ອມເງິນສົດຈຳນວນ 2 ລ້ານກີບ, ຮອງຊະນະເລີດໄດ້ແກ່ບ້ານດອນເຂາະ ໄດ້ຮັບເງິນສົດຈຳນວນ1,7 ລ້ານກີບ ແລະອັນດັບທີ 3 ໄດ້ແກ່ບ້ານຊົ້ງ (1) ໄດ້ຮັບເງິນສົດ 1,5 ລ້ານກີບ, ສ່ວນເຮືອຕົກຮອບ 3 ລໍາ ໄດ້ລາງວັນຊົມເຊີຍລໍາລະ 1 ລ້ານກີບ.

  ແນວໃດກໍດີບຸນຊ່ວງເຮືອບໍ່ພຽງແຕ່ມີຄວາມໝາຍທາງຮີດຄອງປະເພນີເທົ່ານັ້ນ, ແຕ່ມັນຍັງມີຄວາມໝາຍດ້ານກີລາ, ວັດທະນະທຳແນໃສ່ຮັກສາ, ເຜີຍແຜ່ ແລະສົ່ງເສີມໃຫ້ແກ່ຄົນລຸ້ນໃໝ່ຮັບຮູ້, ເຂົ້າໃຈຮີດຄອງປະເພນີຂອງລາວ, ທັງເປັນການເອກອ້າງຕໍ່ຊາດອື່ນໆ ໃນໂລກ ໄດ້ຮັບຮູ້ວັດທະນະທຳອັນດີງາມຂອງຊາດລາວເຮົາອີກດ້ວຍ.

----

ຮຽບຮຽງໂດຍ: ນໍ້າເໝີຍ

แชร์