ບຸນຊ່ວງເຮືອປະເພນີ ອັດຕະປື ມີເຮືອເຂົ້າແຂ່ງຂັນ 17 ລຳ

  ບຸນຊ່ວງເຮືອປະເພນີປະຈຳປີ 2020 ທີ່ແຂວງອັດຕະປືບຸນອອກພັນສາປະວໍລະນາໄດ້ສຳເລັດລົງຢ່າງຈົບງາມໂດຍການໃຫ້ກຽດເຂົ້າຮ່ວມຂອງທ່ານ ເລັດ ໄຊຍະພອນ ເຈົ້າແຂວງອັດຕະປື, ທ່ານ ບຸນທະມາລີ ໝັ້ນອານົງ ເຈົ້າເມືອງສາມັກຄີໄຊ ມີບັນດາທ່ານຄະນະນໍາຂອງແຂວງ, ເມືອງ ແລະມວນຊົນຊາວແຂວງອັດຕະປືເຂົ້າຮ່ວມຢ່າງຫຼວງຫຼາຍ.

  ເຮືອຊ່ວງທີ່ເຂົ້າຮ່ວມແຂ່ງຂັນກີລາໜ້ານໍ້າໃນປີນີ້ມີທັງໝົດ 17 ລໍາຄື: ເຮືອປະເພດ 35 ສີພາຍ ຊາຍ ຈໍານວນ 2 ລໍາ, ເຮືອປະເພດ 22 ສີພາຍ ຊາຍຈໍານວນ 7 ລໍາ, ເຮືອປະເພດ 12 ສີພາຍ ຊາຍຈໍານວນ 8 ລໍາ, ຖ້າທຽບໃສ່ປີຜ່ານມາແມ່ນຫຼຸດລົງ.

  ຜົນການແຂ່ງຂັນເຮືອ 35 ສີພາຍ ຊະນະເລີດແມ່ນພະແນກການເງິນແຂວງໄດ້ຮັບລາວັນຂັນ 1 ໜ່ວຍພ້ອມເງິນສົດ 11 ລ້ານກີບ, ຮອງຊະນະເລີດແມ່ນເຮືອພະ ແນກ ຍທຂ ແຂວງໄດ້ເງິນສົດ 9 ລ້ານກີບ,ປະເພດເຮືອ 22 ສີພາຍ ຊະນະເລີດແມ່ນເຮືອລັດວິສາຫະກິດໄຟຟ້າສາຂາແຂວງອັດຕະປືໄດ້ຮັບລາງວັນຂັນ 1 ໜ່ວຍ ພ້ອມເງິນສົດ 9 ລ້ານກີບ, ຮອງຊະນະເລີດເຮືອບ້ານໃຫ່ຍເຊກະໜານໄດ້ຮັບລາງວັນເງິນສົດ 7 ລ້ານກີບ ແລະທີ 3 ເຮືອ ເມືອງໄຊເສດຖາ ໄດ້ລາງວັນເງິນສົດ 5 ລ້ານກີບ, ປະເພດເຮືອ 12 ສີພາຍຊະນະເລີດແມ່ນເຮືອບ້ານໃຫ່ຍເຊກະໜານໄດ້ຮັບລາງວັນຂັນ 1 ໜ່ວຍພ້ອມເງິນສົດ 7 ລ້ານກີບ, ຮອງຊະນະເລີດແມ່ນເຮືອພະແນກອຸດສາ ຫະກຳ ແລະການຄ້າແຂວງໄດ້ຮັບລາງວັນເງິນສົດ 5 ລ້ານກີບ ແລະທີ 3 ເຮືອຫວຍໂຊກໄຊໄດ້ຮັບລາງວັນເງິນສົດ 3 ລ້ານກີບ.

  ທ່ານ ບຸນທະມາລີ ໝັ້ນອານົງ ເຈົ້າເມືອງສາມັກຄີໄຊ ໄດ້ກ່າວໃນໂອກາດໃນງານແຂ່ງຂັນກີລາເຮືອຊ່ວງໃນປີນີ້ໃຫ້ຮູ້ວ່າ: ທຸກໆປີກິດຈະກຳແຂ່ງຂັນກີລາເຮືອຊ່ວງແມ່ນເປັນກີລາທາງໜ້ານໍ້າປະເພດໜຶ່ງ ຊຶ່ງຖືກຈັດຂຶ້ນເພື່ອເປັນການສ້າງໂອກາດໃຫ້ປະຊາຊົນໄດ້ມາພົບປະເພື່ອນມິດສະຫາຍ, ຍາດຕິພີ່ນ້ອງທີ່ມາຈາກທົ່ວສາລະທິດໄດ້ມາພັກຜ່ອນຢ່ອນໃຈເປັນການສ້າງໂອກາດໃຫ້ປະຊາຊົນໄດ້ເຕົ້າໂຮມຄວາມສາມັກຄີເຊິ່ງກັນ ແລະກັນສິ່ງສຳຄັນສ່ວນໃຫຍ່ແມ່ນພວກເຮົາໄດ້ພ້ອມພາກັນປະຕິບັດຕາມແຈ້ງ ການຂອງຫ້ອງວ່າການສໍານັກງານນາຍົກລັດຖະ ມົນຕີສະບັບເລກ ທີ 1049/ຫສນຍ, ລົງວັນທີ ,30/9/2020 ເລື່ອງການສືບຕໍ່ປະຕິບັດມາດຕະການຜ່ອນຜັນ, ມາດຕະການປ້ອງກັນ, ຄວບຄຸມສະກັດກັ້ນ ແລະແກ້ໄຂການລະບາດຂອງພະຍາດໂຄວິດ-19 ຢ່າງເຂັ້ມງວດ.

________

ຂຽນໂດຍ: ໄພບູນ

แชร์