ຄົງເຊໂດນ ແຂ່ງຂັນກີລາຊ່ວງເຮືອ

 ງານແຂ່ງຂັນຊ່ວງເຮືອປະເພນີເນື່ອງໃນວັນບຸນອອກພັນສາປະວໍລະນາປະຈຳປີ 2020 ຈັດຂຶ້ນ ແລະສຳເລັດລົງໃນວັນທີ 3 ຕຸລາ 2020 ທີ່ເມືອງຄົງເຊໂດນໂດຍໃຫ້ກຽດເຂົ້າຮ່ວມຂອງທ່ານ ແຫວນເພັດ ລັດດາວົງ ເຈົ້າເມືອງໆ ຄົງເຊໂດນ, ມີທ່ານຮອງເລຂາພັກເມືອງ, ຮອງເຈົ້າເມືອງ, ແຂກຖືກເຊີນຈາກພະແນກການອ້ອມຂ້າງແຂວງ, ຕະຫຼອດຮອດພໍ່ແມ່ປະຊາ ຊົນຊາວເມືອງຄົງເຊໂດນ ເຂົ້າຮ່ວມຢ່າງເປັນຂະບວນ.

  ທ່ານ ຄຳເຜືອ ຄູນນິດໃສ ຮອງເຈົ້າເມືອງຜູ້ຊີ້ນຳວຽກງານວັດທະນະທຳ-ສັງຄົມທັງເປັນປະທານຈັດງານບຸນຊ່ວງເຮືອໄດ້ກ່າວໃຫ້ຮູ້ວ່າ: ຈຸດປະສົງໃນການຈັດງານຄັ້ງນີ້ ແມ່ນເພື່ອສືບສານວັດທະນະທຳຮີດຄອງປະເພນີອັນດີງາມຂອງຊາດກໍຄືພໍ່ແມ່ພີ່ນ້ອງຊາວເມືອງຄົງເຊໂດນທີ່ສືບທອດກັນມາແຕ່ບູຮານນະການ, ທັງໃຫ້ຊາວໜຸ່ມ, ເຍົາ ວະຊົນຜູ້ທີ່ເກີດຮຸ່ນຫຼັງໄດ້ເຫັນຄຸນຄ່າຄວາມສຳຄັນຂອງມູນເຊື້ອວັດທະນະທຳ,ຮີດຄອງປະເພນີ ແລະເພື່ອສືບທອດປະເພນີໃຫ້ຍືນຍົງຕະຫຼອດໄປອີກຢ່າງໜຶ່ງກໍ່ເພື່ອສ້າງຄວາມສາມັກຄີຮັກແພງລະຫວ່າງບ້ານຕໍ່ບ້ານໃຫ້ມີຄວາມໜັກແໜ້ນ ແລະຄວາມເປັນມິດຕະພາບອັນສູງສົ່ງ.

  ຜ່ານການແຂ່ງຂັນອັນດຸເດືອດທ່າມກາງສຽງເຊຍອັນສະໜັ່ນຕ່າງ ຝ່າຍຕ່າງສຸມເຮື່ອແຮງເພື່ອນຳເຮືອ ຂອງຕົນເຂົ້າສູ່ເສັ້ນໄຊຜົນການ ແຂ່ງຂັນປະເພດເຮືອໃຫຍ່ທີ 1 ໄດ້ແກ່ເຮືອບ້ານບຶງກາງໄດ້ຮັບເງິນສົດ 4 ລ້ານກີບພ້ອມຂັນ 1 ໜ່ວຍ, ທີ 2 ບ້ານບົວລະພາໄດ້ຮັບເງິນສົດ 3 ລ້ານກີບ, ທີ 3 ບ້ານນາຮັງ ໄດ້ຮັບເງິນສົດ 2 ລ້ານກີບ ມອບລາງວັນໂດຍທ່ານ: ແຫວນເພັດ ລັດດາວົງ ເຈົ້າເມືອງໆຄົງເຊໂດນ; ປະເພດເຮືອກາງຊາຍທີ 1 ບ້ານຈານລານເຊ ໄດ້ຮັບເງິນສົດ 3 ລ້ານກີບພ້ອມຂັນ 1 ໜ່ວຍ, ທີ 2 ບ້ານບົວລະພາໄດ້ຮັບເງິນ ສົດ 2 ລ້ານກີບ, ທີ 3 ບ້ານນາ ຄຳໄດ້ຮັບເງິນສົດ 1  ລ້ານກີບ, ມອບລາງວັນໂດຍທ່ານ ກໍ່າແສງມະນີ  ຮອງເລຂາພັກເມືອງ, ເຮືອກາງເພດຍິງທີ 1 ບ້ານບົວລະພາ ໄດ້ຮັບເງິນສົດ 3 ລ້ານກີບ ພ້ອມຂັນ 1 ໜ່ວຍ, ທີ 2 ບ້ານຈານລານເຊ ເງິນສົດ 2 ລ້ານກີບ, ທີ 3 ບ້ານບຶງກາງ ເງິນສົດ 1 ລ້ານກີບ, ລຸ້ນ 12 ສີພາຍເພດຊາຍ ທີ 1 ໄດ້ແກ່ ບ້ານຄົງໃຫຍ່ໄດ້ຮັບເງິນສົດ 1,5 ລ້ານກີບ ພ້ອມຂັນ 1 ໜ່ວຍ, ທີ 2  ບ້ານປາກເຊືອກເງິນສົດ 1 ລ້ານກີບ, ທີ 3 ບ້ານໂນນຄໍ້ເງິນສົດ 5 ແສນກີບ, ເພດຍິງທີ 1 ໄດ້ແກ່ບ້ານປາກເຊືອກໄດ້ຮັບເງິນສົດ 1,5 ລ້ານກີບພ້ອມຂັນ 1 ໜ່ວຍ, ທີ 2 ບ້ານໂນນຄໍ້ເງິນສົດ 1 ລ້ານກີບ, ທີ 3 ບ້ານບົວລະພາເງິນສົດ 5 ແສນກີບມອບໂດຍທ່ານ ຄຳເຜືອ ຄູນນິດໃສ ຮອງເຈົ້າເມືອງນອກນັ້ນໃນພິທີຍັງໄດ້ມອບໃບຂອບໃຈໃຫ້ຜູ້ອຸປະຖຳໃນງານບຸນຄັ້ງນີ້ຕື່ມອີກ. 

---------

ຂຽນໂດຍ: ກິນດາວັນ

แชร์