ສພຂ ສາລະວັນ ຕີລາຄາວຽກງານຜ່ານມາ

 ວັນທີ 13 ກຸມພາ ສະພາປະຊາຊົນແຂວງໄດ້ຈັດກອງປະຊຸມຮ່ວມລະຫວ່າງຄະນະເລຂາທິການ ແລະຂະແໜງການຂອງສະພາປະຊາຊົນແຂວງໂດຍການເປັນປະທານຂອງ ທ່ານ ສາຍສະໝອນ ອິນທິເສນ ເລຂາທິການສະພາປະຊາຊົນແຂວງ, ມີຄະນະເລຂາທິການ ສພຂ, ຫົວໜ້າ-ຮອງຫົວໜ້າຂະແໜງການອ້ອມຂ້າງເຂົ້າຮ່ວມ.

  ກອງປະຊຸມໄດ້ຕີລາຄາການຈັດຕັ້ງປະຕິບັດວຽກງານໃນໄລ ຍະ 1 ປີຜ່ານມາ, ທັງດ້ານຕັ້ງໜ້າ, ຂໍ້ສະດວກ, ຂໍ້ຫຍຸ້ງຍາກ ແລະການຖອດຖອນບົດຮຽນໃນການເປັນເສນາທິການໃຫ້ແກ່ຄະນະເລຂາທິການ ສພຂ ໃນການປະຕິບັດວຽກງານ, ຂອດການປະສານງານພາຍໃນ ແລະ ພາຍນອກ; ແບບແຜນວິທີເຮັດວຽກໃນແຕ່ລະໄລຍະຂອງຂະແໜງ; ລວມທັງບັນຫາອື່ນໆທີ່ພົບເຫັນໃນການຈັດຕັ້ງປະຕິບັດວຽກງານໃນໜຶ່ງປີຜ່ານມາໃນກອງປະຊຸມຄັ້ງນີ້ບັນດາ ຫົວໜ້າຂະແໜງ ໄດ້ລາຍງານສະ ພາບການຈັດຕັ້ງປະຕິບັດວຽກ ງານ ທີ່ພົ້ນເດັ່ນໃນໜຶ່ງປີຜ່ານມາ ແລະຂໍ້ຄົງຄ້າງທີ່ຈະຕ້ອງໄດ້ແກ້ ໄຂໃນຕໍ່ໜ້າ. ຈາກນັ້ນບັນດາທ່ານທີ່ເຂົ້າຮ່ວມກອງປະຊຸມຍັງໄດ້ປະກອບຄໍາຄິດ, ຄໍາເຫັນຢ່າງກົງໄປ-ກົງມາ ໃນການຈັດຕັ້ງປະຕິບັດ ວຽກງານໃນໄລຍະຜ່ານມາ, ສະເໜີບາງບັນຫາທີ່ຍັງຄົງຄ້າງ ແລະ ພ້ອມກັນຫາວິທີແກ້ໄຂໃນຕໍ່ໜ້າໃຫ້ດີຂຶ້ນກວ່າເກົ່າ.

 ທ່ານ ສາຍສະໝອນ ອິນທິເສນ ໄດ້ເນັ້ນໜັກວ່າ: ຕ້ອງເອົາໃຈໃສ່ດ້ານການເມືອງແນວຄິດໃຫ້ໜັກແໜ້ນ, ມີຄວາມສາມັກຄີເປັນເອກະພາບ, ປັບປຸງແບບ ແຜນວິທີເຮັດວຽກໃຫ້ເປັນລະບົບ, ກໍານົດແຜນການເຄື່ອນໄຫວ, ຕິດຕາມກວດກາບຸກຄະລາກອນທີ່ຮັບຜິດຊອບຂອງຕົນ, ເອົາໃຈໃສ່ກໍາແໜ້ນ, ເຊື່ອມຊຶມບັນດານິຕິກໍາຕ່າງໆທີ່ກ່ຽວຂ້ອງເພື່ອເປັນບ່ອນອີງໃນການຈັດຕັ້ງປະຕິບັດ, ເອົາໃຈໃສ່ໃນການປະສານງານທັງພາຍໃນ ແລະພາຍນອກໃຫ້ກົມກຽວພ້ອມກັນຖອດຖອນບົດຮຽນຮ່ວມກັນໃນການປະສານງານແຕ່ລະໄລຍະເພື່ອປະຕິບັດວຽກງານໄດ້ຮັບຜົນສໍາເລັດດີຂຶ້ນເປັນກ້າວໆ.

ໂດຍ: ຄັດສອນ

• 19/02/2019