ໂຮງຮຽນເຕັກນິກວິຊາຊີບ ຫຼວງນໍ້າທາ ມີນັກສຶກສາຈົບໃໝ່ 221 ຄົນ

  ວັນທີ 2 ຕຸລາ 2020 ທີ່ ໂຮງຮຽນເຕັກນິກວິຊາຊີບແບບປະສົມແຂວງຫຼວງນໍ້າທາ ໄດ້ສະຫຼຸບການກໍ່ສ້າງນັກສຶກສາສົກຮຽນ 2019-2020  ເຂົ້າຮ່ວມໂດຍທ່ານ ທອງພິດ ແກ້ວປະເສີດ ຮັກສາການອຳນວຍການໂຮງຮຽນເຕັກນິກວິຊາຊີບແບບປະສົມແຂວງຫຼວງນໍ້າທາ, ມີຮອງອຳນວຍການ, ຄູ-ອາຈານ ແລະນັກສຶກສາເຂົ້າຮ່ວມ.

  ທ່ານ ສຸລິໄຊ ມອງປະດິດ ຮອງ ອຳນວຍການໂຮງຮຽນເຕັກນິກວິ ຊາຊີບແບບປະສົມແຂວງຫຼວງນໍ້າທາ ໄດ້ກ່າວວ່າ: ການຈັດຕັ້ງການ ຮຽນ-ການສອນແມ່ນປະຕິບັດຕາມໂຄງການຫຼັກສູດຂອງກົມອາຊີວະສຶກສາກະຊວງສຶກສາທິການ ແລະກີລາວາງອອກ, ຊຶ່ງຈັດຕັ້ງການຮຽນ-ການສອນ 3 ຫຼັກສູດ ຄື: ຫຼັກສູດຊັ້ນກາງ 9+3 ຮັບນັກຮຽນຈົບມັດທະຍົມຕົ້ນ, 12+2 ຮັບນັກຮຽນຈົບມັດທະຍົມຕອນປາຍ ແລະຫຼັກສູດຊັ້ນສູງຕໍ່ເນື່ອງຮັບນັກສຶກສາທີ່ຈົບວິຊາຊີບຊັ້ນກາງເຂົ້າ ຮຽນ, ມີ7 ສາຂາວິຊາຮຽນຄື: ສາຂາປູກຝັງ, ລ້ຽງສັດ, ໄຟຟ້າເຕັກນິກ, ກໍ່ ສ້າງ-ເຄຫາ, ຊ່າງໄມ້-ເຟີນີເຈີ, ສ້ອມແປງກົນຈັກ ແລະສາຂາປຸງແຕ່ງອາຫານ ແລະການບໍລິການເຄື່ອງດື່ມ, ໃນສົກຮຽນ 2019-2020 ມີນັກສຶກສາຊັ້ນກາງຈົບທັງໝົດ 221 ຄົນ, ຍິງ 79 ຄົນ.

  ຕະຫຼອດໄລຍະການສຶກສານັກສຶກສາໄດ້ປະກອບສ່ວນທາງດ້ານແຮງງານຕໍ່ວຽກງານພັດທະນາໂຮງຮຽນ, ການປ້ອງກັນຄວາມສະຫງົບ, ປະກອບທຶນຮອນໃນການສິດສອນ ແລະກິດຈະກຳນອກຫຼັກສູດສົກຮຽນ 2019-2020 ໄດ້ປະກອບຊື້ອຸປະກອນການຮຽນ-ການສອນເປັນເງິນ 10,59 ລ້ານກີບໃຫ້ໂຮງຮຽນເຕັກນິກວິຊາຊີບແບບປະສົມ, ຈາກນັ້ນກໍ່ໄດ້ມອບໃບຍ້ອງຍໍໃຫ້ນັກສຶກສາຜູ້ທີ່ມີຜົນງານດີເດັ່ນ ແລະຮຽນເກັ່ງຕື່ມອີກ.

-----------

ຂຽນໂດຍ: ກິນດາວັນ

แชร์