ການເງິນເຊກອງຮັບທຸງໄຊ 4 ບຸກ

ພິທີມອບ-ຮັບທຸງໄຊນໍາໜ້າການຈັດຕັ້ງປະຕິບັດຂໍ້ແຂ່ງຂັນ 4 ບຸກ ໃຫ້ຄະນະບໍລິຫານງານຊາວໝຸ່ມພະແນກການເງິນແຂວງເຊກອງໄດ້ຈັດຂຶ້ນໃນວັນທີ 1 ຕຸລາ 2020 ໂດຍມີທ່ານ ຕຸລາວັນ ວົງໄຊ ກໍາມະການພັກແຂວງ, ເລຂາຄະນະບໍລິຫານງານຊາວໝຸ່ມແຂວງ, ທ່ານ ຄໍາຮູ້ ອ່ອນມະນີ ກໍາມະການພັກແຂວງ, ຫົວໜ້າພະແນກການເງິນແຂວງ, ແຂກຖືກເຊີນ ແລະສະມາຊິກເຂົ້າຮ່ວມ.

   ທ່ານ ໄກອໍາພອນ ພົມມະຈັນ ເລຂາຊາວໜຸ່ມຮາກຖານພະແນກການເງິນແຂວງໄດ້ຂຶ້ນຜ່ານບົດສະຫຼຸບຜົນການຈັດຕັ້ງປະຕິບັດຂໍ້ແຂ່ງຂັນ 4 ບຸກຕິດພັນກັບຂະບວນ ການແຂ່ງຂັນຮັກຊາດ ແລະພັດທະນາຂອງຊາວໜຸ່ມຮາກຖານພະແນກການເງິນແຂວງປະຈໍາປີ 2019 ພ້ອມທັງຕີລາຄາດ້ານດີ, ດ້ານອ່ອນ ແລະບົດຮຽນຖອດຖອນໄດ້ຊຶ່ງຜ່ານການປະເມີນການກວດກາ 4 ບຸກ ຄະນະບໍລິຫານງານຊາວໜຸ່ມພະແນກການເງິນແຂວງເຊກອງສາມາດຍາດໄດ້ຜົນງານທີ່ພົ້ນເດັ່ນໃນການບຸກດ້ານແນວຄິດ, ບຸກດ້ານຝຶກຝົນຫຼໍ່ຫຼອມ-ຮໍ່າຮຽນ, ບຸກດ້ານການປັບປຸງ-ກໍ່ສ້າງການຈັດຕັ້ງ ແລະບຸກດ້ານວິຊາຊີບ-ສ້າງວຽກເຮັດງານທໍາ, ມີສະມາຊິກຊາວໜຸ່ມ 4 ບຸກປະເພດ I ໄດ້ຮັບໃຊ້ຍ້ອງຍໍຈາກສູນກາງຊາວໜຸ່ມລາວຈໍານວນ 81 ຄົນ, ຍິງ 24 ຄົນ ກວມເອົາ 100% ຂອງສະມາຊິກທັງໝົດ.

ເພື່ອເປັນການຢັ້ງຢືນຜົນງານດັ່ງກ່າວຄະນະບໍລິຫານງານຊາວໜຸ່ມແຂວງໄດ້ອອກຂໍ້ຕົກລົງສະບັບເລກທີ 544 ລົງວັນທີ13 ສິງຫາ 2020 ເຫັນດີມອບທຸງໄຊນໍາໜ້າໃຫ້ຄະນະຊາວໜຸ່ມຮາກຖານພະແນກການເງິນແຂວງເຊກອງທີ່ໄດ້ປະຕິບັດຂໍ້ແຂ່ງຂັນ 4 ບຸກໄລຍະ 3 ປີຊ້ອນ (2017, 2018, 2019) ຊຶ່ງໃຫ້ກຽດຂຶ້ນມອບໂດຍທ່ານ ຕຸລາວັນ ວົງໄຊ ແລະຮັບແມ່ນທ່ານ ໄກອໍາພອນ ພົມມະຈັນ.

  ຕອນທ້າຍກໍໄດ້ຮັບຟັງການມີຄໍາເຫັນໂອ້ລົມຂອງທ່ານ ຕຸລາວັນ ວົງໄຊ ຊຶ່ງທ່ານໄດ້ສະແດງຄວາມຊົມເຊີຍຕໍ່ຄະນະບໍລິຫານງານ ແລະສະມາຊິກຊາວໜຸ່ມພະແນກການເງິນແຂວງທີ່ສາມາດຍາດໄດ້ຜົນງານພົ້ນເດັ່ນຫຼາຍດ້ານ, ພ້ອມນີ້ທ່ານຍັງໄດ້ເນັ້ນໜັກໃຫ້ຄະນະບໍລິຫານງານ ແລະສະມາຊິກຊາວໜຸ່ມພະແນກການເງິນສືບຕໍ່ຈັດຕັ້ງປະຕິບັດໜ້າທີ່ວຽກງານວິຊາສະເພາະໃຫ້ສໍາເລັດເປັນກ້າວໆ, ສືບຕໍ່ປັບປຸງການຈັດຕັ້ງຊາວໜຸ່ມໃຫ້ເຕີບໃຫຍ່ເຂັ້ມແຂງດ້ານປະລິມານແລະຄຸນນະພາບ, ກາຍເປັນກໍາລັງແຮງສໍາຄັນຊ່ວຍຄະນະນໍາຂອງຕົນໃນການເຕົ້າໂຮມຄວາມສາມັກຄີ ແລະກາຍເປັນແກ່ນສານຂອງພັກຢ່າງແທ້ຈິງ, ໃຫ້ສົມກັບຄໍາຂວັນທີ່ວ່າ: “ຊາວໜຸ່ມເປັນແຂນຂວາຂອງພັກ, ເປັນກະດູກສັນຫຼັງຂອງປະເທດຊາດ ”.

-------------

ຂ່າວ: ສັນຍາ

ຮູບພາບ: #ຫນັງສືພິມເສດຖະກິດສັງຄົມ

แชร์