ຊາວພຸດທະສາຊະນິກະຊົນ ຮ່ວມໃສ່ບາດໃນວັນບຸນອອກພັນສາປະວໍລະນາ

  ເມື່ອຕອນເຊົ້າຂອງວັນທີ 2 ຕຸລາ ຜ່ານມາ, ຊາວພຸດທະສາຊະນິກະຊົນຄົນລາວທົ່ວປະເທດໄດ້ເຂົ້າຮ່ວມການໃສ່ບາດ, ຖວາຍສັງຄະທານໃຫ້ແກ່ພະສົງສົງສຳມະເນນ ແລະມີການຍາດນໍ້າຢູ່ວັດໃກ້ບ້ານ, ອຸທິດບຸນກຸສົນໃຫ້ແກ່ຜູ້ທີ່ລ່ວງລັບໄປແລ້ວ ແລະເຮັດໃຫ້ຕົນເອງມີຄວາມສຸກ ກາຍສະບາຍໃຈໃນໂອກາດບຸນອອກພັນສາປະວໍລະນາປະຈຳປີ 2020.

  ບຸນອອກພັນສາປະວໍລະນາເປັນອີກໜຶ່ງບຸນໃນ 12 ຮີດ ຂອງລາວທີ່ຖ່າຍທອດກັນມາແຕ່ເຊັ່ນປູ່ຍ່າຕາຍາຍຈົນເຖິງປະຈຸບັນ, ຄຳວ່າ:  “ອອກພັນສາ” ໝາຍເຖິງການ ອອກຈາກເຂດຈຳກັດ (ອອກພັນສາ) ພາຍຫຼັງພະສົງສຳມະເນນໄດ້ ເຂົ້າເຂດຈຳກັດ (ຈຳພັນສາ) ເປັນ ເວລາ 3 ເດືອນ; ສ່ວນຄຳວ່າ: “ປະວໍລະນາ” ຄວາມໝາຍເຖິງການເປີດໂອກາດໃຫ້ກັນ ແລະກັນໃນການກ່າວຕັກເຕືອນລະຫວ່າງຄະນະສົງດ້ວຍກັນໃນຂໍ້ບົກຜ່ອງ, ຜິດພາດ ຫຼື ລ່ວງລໍ້າໃນລະຫວ່າງທີ່ຈຳພັນສາຮ່ວມກັນເພື່ອຈະໄດ້ສຳລວມລະວັງ ແລະປັບປຸງແກ້ໄຂຕົນເອງໃຫ້ມີຄວາມຈະເລີນຂອງພະທຳວິໄນ ແລະຄວາມສຸກໃນການຢູ່ຮ່ວມກັນ.

  ບຸນອອກພັນສາແມ່ນຈັດຂຶ້ນ 1 ເທື່ອຂອງທຸກໆປີໃນມື້ຂຶ້ນ15 ຄໍ່າເດືອນ 11 ລາວ ຊຶ່ງຖືເປັນປາງບຸນໃຫຍ່ ແລະສຳຄັນຂອງພຸດທະສາສະ ໜາທີ່ຕິດພັນກັບວັດທະນະທຳ ແລະຮີດຄອງປະເພນີອັນດີງາມຂອງຊາດລາວເຮົາ, ວັນອອກພັນສາຄືວັນສິ້ນສຸດໄລຍະການຈຳພັນສາຂອງພະສົງສໍາມະເນນເປັນ ເວລາ 3 ເດືອນ ທີ່ຜ່ານມາຄືນັບແຕ່ມື້ຂຶ້ນ 15 ຄໍ່າເດືອນແປດຈົນເຖິງມື້ຂຶ້ນ 15 ຄໍ່າເດືອນສິບເອັດ; ຊຶ່ງວັນອອກພັນສາປະວໍລະນາເປັນວັນທີ່ອະນຸຍາດໃຫ້ພະສົງ-ສາມະເນນສາມາດເດີນທາງທ່ອງ ທ່ຽວໄປມາໄດ້ຕາມໃຈ, ຊຶ່ງພະພຸດທະເຈົ້າໄດ້ບັນຢັດໄວ້ຢູ່ໃນພະວິໄນທາງພຸດທະສາສະໜາແມ່ນກົດລະບຽບອັນເຄັ່ງຄັດຄຽງຄູ່ກັບລະບຽບ (ພະວິໄນ) ຂໍ້ອື່ນໆທີ່ພະສົງ-ສໍາມະເນນ, ຜູ້ບວດເຂົ້າມາໃນພຸດທະສາສະໜາຕ້ອງຕັ້ງໃຈປະຕິບັດປົກປ້ອງ ແລະສົ່ງເສີມພຸດທະສາສະໜາໃຫ້ຍືນຍົງຄຽງຄູ່ກັບຄົນລາວ ແລະຊາດລາວຕໍ່ໄປ.

  ສໍາລັບພິທີກຳທີ່ສຳຄັນໃນມື້ອອກພັນສາແມ່ນມີການບຸນໃສ່ບາດ, ຖວາຍສັງຄະທານ ແລະເຮັດພາເຂົ້າໄປວັດເພື່ອອຸທິດສ່ວນກຸສົນໄປໃຫ້ເຈົ້າກຳນາຍເວນ ແລະຍາດພີ່ນ້ອງຜູ້ທີ່ລ່ວງລັບໄປແລ້ວພ້ອມທັງມີການເຂົ້າວັດປະຕິບັດທຳຟັງທຳມະເທສະໜາ, ນອກຈາກນີ້ຢູ່ຕາມວັດວາອາຮາມກໍມີການປະດັບປະດາດ້ວຍໂຄມໄຟ, ເຮືອໄຟໂຄກຈູດບັ້ງໄຟດອກ ແລະໄຫຼເຮືອໄຟໃນຍາມຄ່ຳຄືນຢູ່ຕາມແມ່ນໍ້າລຳເຊ, ຊຶ່ງ ການໄຫຼເຮືອໄຟຕາມຄວາມເຊື່ອຂອງຄົນບູຮານແມ່ນເພື່ອບູຊາຮອຍພະພຸດທະບາດທີ່ຢຽບໄວ້ໃນພື້ນນໍ້າ ຫຼື ເມືອງບາດານ, ບູຊາບຸນຄຸນຂອງແມ່ນໍ້າທີ່ມະນຸດໄດ້ໃຊ້ປະໂຫຍດຕ່າງໆ ແລະເພື່ອຂໍຂະມາຕໍ່ແມ່ນໍ້າທີ່ໄດ້ເຮັດສິ່ງເປື້ອນເປິລົງໃສ່ພ້ອມທັງເສຍເຄາະຮ້າຍໂພຍໄພ ແລະພະຍາດຕ່າງໆ ໃຫ້ໄຫຼໄປກັບສາຍນໍ້າ.

  ບຸນອອກພັນສາປະວໍລະນາເປັນອີກງານບຸນໜຶ່ງທີ່ສຳຄັນສຳລັບ ຊາວພຸດ ກໍຄືປວງຊົນລາວທັງຊາດ ດັ່ງນັ້ນ, ຄວນສົ່ງເສີມໃຫ້ລູກຫຼານ ຂອງຊາດລາວຮັກສາມູນເຊື້ອ ແລະສືບທອດເສີມຂະຫຍາຍຮີດ 12 ຄອງ14 ໃຫ້ຄົງຢູ່ກັບຊາວລາວຕະຫຼອດໄປ.

----

ໜັງສືພິມ ເສດຖະກິດ-ສັງຄົມ

แชร์