ຣັດເຊຍ ຈະຈັດຫາວັກແຊງໃຫ້ເອຢິບ 25 ລ້ານໂດສ

  ກອງທຶນຄວາມໝັ້ນຄົງແຫ່ງ ຊາດຂອງຣັດເຊຍບັນລຸຂໍ້ຕົກລົງຈັດຫາວັກແຊງສະປຸດນິກ-ວີ ຈຳນວນ 25 ລ້ານໂດສໃຫ້ກັບຟາໂຄ ບໍລິສັດຢາຊັ້ນນໍາຂອງເອຢິບ.

  ຕາມຂ່າວຕ່າງປະເທດລາຍງານວ່າ ທ່ານ ຄິຣິລ ດະມິທຣີບ ຫົວໜ້າກອງທຶນຄວາມໝັ້ນຄົງແຫ່ງຊາດຂອງຣັດເຊຍກ່າວວ່າ ຂໍ້ຕົກລົງລະ ຫວ່າງກອງທຶນຄວາມໝັ້ນຄົງແຫ່ງຊາດຂອງຣັດເຊຍກັບຟາໂຄຈະຊ່ວຍໃຫ້ເອຢິບໄດ້ຮັບວັກແຊງປ້ອງກັນໂຄວິດ -19 ທີ່ປອດໄພ ແລະມີປະສິດທິພາບທີ່ຈະນໍາໄປສັກໃຫ້ຊາວເອຢິບໄດ້ເຖິງ 25% ຂອງປະຊາກອນທັງໝົດກ່ອນໜ້ານີ້ ກອງທຶນຄວາມໝັ້ນຄົງແຫ່ງຊາດຂອງຣັດ ເຊຍ ໄດ້ເຮັດຂໍ້ຕົກລົງຈັດຫາວັກແຊງສະປຸດນິກ-ວີ ໃຫ້ກັບເມັກຊິກຈຳນວນ 32 ລ້ານ ໂດສ, ບຣາຊິນຫຼາຍກວ່າ 50 ລ້ານໂດສ ແລະອິນ ເດຍ 100 ລ້ານ ໂດສ ລວມທັງອຸດເບກິດສະຖານ ແລະເນປານ.

  ໜ່ວຍງານຄຸ້ມຄອງຜູ້ບໍລິໂພກຂອງຣັດເຊຍລະບຸວ່າ ຣັດເຊຍສໍາເລັດການທົດລອງທາງຄລີນິກຂອງວັກແຊງປ້ອງກັນໂຄວິດ-19 ຂະໜານທີ 2 ທີ່ພັດທະນາຂຶ້ນໂດຍສະຖາບັນເວກເຕີໃນເຂດໄຊບີຣີແລ້ວ.

----

ໜັງສືພິມ ເສດຖະກິດ-ສັງຄົມ

• 05/10/2020