ໄປທ່ຽວເມືອງໄຊ ບໍ່ຄວນພາດນໍ້າຕົກຕາດຫຼັກ 11

  ທ້າຍໆອາທິດແບບນີ້ອອກຈາກເມືອງໃຫຍ່ໄປພັກຜ່ອນກາຍໃຈທີ່ແຫຼ່ງທ່ອງທ່ຽວຕ່າງໆກັນດີບໍ່ຂໍນໍາສະເໜີເລີຍສໍາລັບອາທິດນີ້ກັບແຫຼ່ງທ່ອງທ່ຽວທາງທໍາມະຊາດນໍ້າຕົກຕາດຫຼັກ 11 ທີ່ແສນງົດງາມ, ນໍ້າໃສໄຫຼເຢັນໃນປ່າສະຫງວນແຫ່ງຊາດພູຫີຜີ, ຂອບເຂດຂອງບ້ານນາງິ້ວ.

  ນໍ້າຕົກຕາດຫຼັກ 11 ເປັນອີກໜຶ່ງສະຖານທີ່ໆເໝາະສົມກັບການພັກຜ່ອນທ່ອງທ່ຽວທຳມະຊາດອາກາດຮ້ອນອົບເອົ້າແບບນີ້, ໄປຊົມ ທໍາມະຊາດ, ຫຼິ້ນນໍ້າເຢັນໆ, ຖ່າຍຮູບງາມໆມາອວດໝູ່ໆດີກວ່າພໍມາຮອດຕາດຊາຍແລ້ວກໍຈະເຫັນສາຍນໍ້າທີ່ໄຫຼມາຈາກຕາດ ແລະຫີນທີ່ ຍາຍກັນທົ່ວຕາມທໍາມະຊາດໃຫ້ນໍ້າໄດ້ໄຫຼຜ່ານງົດງາມຫຼາຍເຮົາສາມາດນັ່ງຫຼິ້ນນໍ້າກິນເຂົ້າຢູ່ທີ່ນັ້ນໄດ້ຍິ່ງເປັນຍາມຝົນຍິ່ງງົດງາມເຕັມໄປດ້ວຍສັດນາໆຊະນິດ, ດອກໄມ້ ປ່ານາໆພັນລວມທັງປະຕິກິລິຍາ ແສງແດດຕ້ອງກັບສາຍນໍ້າເກີດ ເປັນສາຍລຸ້ງໃຫ້ເຮົາໄດ້ເຫັນອີກ             ດ້ວຍຈະລໍຖ້າຢູ່ເຮັດຫຍັງໄປສໍາຜັດ ແຫຼ່ງທ່ອງທ່ຽວນີ້ໄດ້ເລີຍ.

  ແຫຼ່ງທ່ອງທ່ຽວທີ່ກຳລັງວ່ານີ້ ຕັ້ງຢູ່ຕາມໄລຍະຂອງທາງເລກທີ 13 ເໜືອ ຈາກເທສະບານແຂວງອຸດົມໄຊ ໄປຫາປາກມອງແຂວງຫຼວງພະບາງ ຊຶ່ງພໍດີຕັ້ງຢູ່ກິໂລແມັດທີ 11 ຈຶ່ງເອີ້ນວ່າຕາດຫຼັກ 11 ຊຶ່ງນອນໃນປ່າສະຫງວນແຫ່ງຊາດພູຫີຜີ, ຂອບເຂດຂອງບ້ານນາງິ້ວ ເມືອງໄຊ ແຂວງອຸດົມໄຊ.

 ----

ໜັງສືພິມ ເສດຖະກິດ-ສັງຄົມ

• 05/10/2020