ຫຼວງຈະເລີນສໍາປະທານທີ່ດິນລັດ 150 ເຮັກຕາ ລ້ຽງສັດ ແລະປູກພືດ

   ພິທີເຊັນສັນຍາສໍາປະທານທີ່ດິນລັດຢູ່ບ້ານໂຄກສະຫວ່າງ ເມືອງຈອມເພັດ ແຂວງຫຼວງພະບາງຂອງກຸ່ມບໍລິສັດ ຫຼວງຈະເລີນຟາມ ຈັດຂຶ້ນວັນທີ 29 ກັນຍາ 2020 ທີ່ພະແນກແຜນການ ແລະການລົງທຶນແຂວງຮ່ວມລົງນາມໃນສັນຍາຕາງໜ້າອົງການປົກຄອງແຂວງໂດຍທ່ານ ນາງ ສີລີພອນ ສຸພັນທອງ ຫົວໜ້າພະແນກແຜນການ ແລະການລົງທຶນແຂວງ, ຝ່າຍກຸ່ມບໍລິສັດຕາງໜ້າໂດຍ ທ່ານ ວິລະເດດ ໂຄຕິເສນ ປະທານກຸ່ມບໍລິສັດ ຫຼວງຈະເລີນ ຈຳກັດ ໂດຍການເຂົ້າຮ່ວມຂອງທ່ານ ສຸກັນ ບຸນຍົງ ຮອງເຈົ້າແຂວງແຂວງຫຼວງພະບາງ.

 ໂຄງການພັດທະນາກະສິກໍາຄົບວົງຈອນເພື່ອຜະລິດເປັນສິນຄ້າຈໍາໜ່າຍພາຍໃນ ແລະສົ່ງອອກຕ່າງປະເທດມີເນື້ອທີ່ສໍາປະທານຈໍານວນ 150 ເຮັກຕາ, ມີອາຍຸການສໍາປະທານ 30 ປີ, ເລີ່ມແຕ່ມື້ເຊັນສັນຍາເປັນຕົ້ນໄປໂດຍເປັນການລົງທຶນເອກະຊົນພາຍໃນ 100% ໂດຍກຸ່ມບໍລິສັດ ຫຼວງຈະເລີນ ຈໍາກັດ.

   ທາງບໍລິສັດປັບປຸງເສັ້ນທາງປູຢາງກວ້າງ 7 ແມັດ ພ້ອມທັງຕິດຕັ້ງເສົາໄຟ, ເຂົ້າຫາເຂດສໍາປະທານຄວາມຍາວ 4 ກິໂລແມັດໃຫ້ສໍາເລັດພາຍໃນ 6 ເດືອນ ຂອບເຂດສໍາປະທານແມ່ນສ້າງຕັ້ງຟາມງົວ, ປູກຕົ້ນໄມ້ໃຫ້ໝາກ,ພຶດກະສິກໍາ ແລະສ້າງສູນສຶກສາຮຽນຮູ້ດ້ານກະສິກໍາໂດຍເນັ້ນໃສ່ການພັດທະນາກະສິກໍາຄົບວົງຈອນເພື່ອຜະລິດເປັນສິນຄ້າຈໍາໜ່າຍພາຍໃນ ແລະ ສົ່ງອອກຕ່າງປະເທດ, ຈະລິສັດໄດ້ວາງເງິນຄໍ້າປະກັນໂຄງການຈໍານວນ 30 ພັນໂດລາ ແລະ ເງິນຈະຖືກສົ່ງຄືນພາຍຫຼັງສໍາເລັດໜ້າວຽກ.

--------------

ຂ່າວ: ຈໍາປາ, ຮູບພາບ: #ຫນັງສືພິມເສດຖະກິດສັງຄົມ

• 02/10/2020