ມະຫາໄຊຈ່າຍເງິນເດືອນນາຍບ້ານແບບທັນສະໄໝ

  ພີທີເຊັນສັນຍາການເບີກຈ່າຍເງິນເດືອນ ແລະເງິນອຸດໜູນຜ່ານລະບົບບັນຊີຢູມັນນີ (U-money) ຂອງບໍລິສັດ ສະຕາວິນແທັກ ຊຶ່ງເປັນເຄືອຄ່າຍຂອງບໍລິສັດສະຕາໂທລະຄົມ ຫຼືຢູນິເທວໃຫ້ແກ່ນາຍບ້ານໃນທົ່ວເມືອງມະຫາໄຊ ແຂວງຄຳມ່ວນໄດ້ຈັດຂຶ້ນໃນວັນທີ 30 ກັນຍາ 2020 ທີ່ເມືອງມະຫາໄຊລະຫວ່າງອົງການປົກຄອງເມືອງ ຊຶ່ງລົງນາມໂດຍ ທ່ານ ບົວພັນ ແສງຈັນ ເຈົ້າເມືອງມະຫາໄຊກັບບໍລິສັດ ສະຕາໂທລະຄົມລົງນາມໂດຍທ່ານ ຫງຽນຕຽນບີ່ງ ຜູ້ອຳນວຍການບໍລິສັດສະຕາໂທລະຄົມສາຂາແຂວງຄຳມ່ວນໂດຍມີພາກສ່ວນທີ່ກ່ຽວຂ້ອງຂັ້ນແຂວງ, ຂັ້ນເມືອງພ້ອມດ້ວຍນາຍບ້ານໃນທົ່ວເມືອງມະຫາໄຊເຂົ້າຮ່ວມເປັນສັກຂີພິຍານ.

 ບໍລິສັດສະຕາໂທລະຄົມໄດ້ສ້າງຕັ້ງບໍລິສັດການເງິນອີເລັກໂທນິກຂຶ້ນມາ ຫຼືເອີ້ນວ່າ: ບໍລິສັດສະຕາວິນແທັກ ແລະໄດ້ສ້າງລະບົບກະເປົາເງິນອີເລັກໂທນິກທີ່ເອີ້ນຜະລິດຕະ ພັນນີ້ວ່າ: ຢູມັນນີພ້ອມທັງໄດ້ເປີດຕົວນຳໃຊ້ຢ່າງເປັນທາງການໃນປີ 2019 ໂດຍໄດ້ຜ່ານການຮັບຮອງຈາກທະນາຄານແຫ່ງ ສປປ ລາວ ດ້ວຍຄຳຂວັນທີ່ວ່າ: “ທາງເລືອກທີ່ດີກວ່າ” ແລະໄດ້ທົດລອງນຳໃຊ້ແລ້ວຫຼາຍແຂວງທົ່ວປະເທດ.

   ສຳລັບແຂວງຄຳມ່ວນແມ່ນໄດ້ເລີ່ມລົດລອງນຳໃຊ້ຢູ່ເມືອງມະຫາໄຊໂດຍການເບີກຈ່າຍເງິນເດືອນ ຫຼືເງິນອຸດໜູນໃຫ້ແກ່ບັນດານາຍບ້ານໃນທົ່ວເມືອງມະຫາໄຊຊຶ່ງຈະເປັນການລິເລີ່ມໃນການຫັນເຂົ້າເປັນດີຈີຕອລເທື່ອລະກ້າວ ແລະເປັນການຫັນປ່ຽນການບໍລິການທາງດ້ານການເງິນຈາກແບບເກົ່າມາເປັນແບບໃໝ່ທີ່ມີຄວາມສະດວກ, ວ່ອງໄວ ແລະມີຄວາມປອດໄພສູງ, ສາມາດເຂົ້າເຖິງລະບົບການເງິນ-ທະນາຄານໄດ້ດ້ວຍວິທີທີ່ງ່າຍ.

   ນອກນີ້ຍັງໄດ້ເຊື່ອມຕໍ່ກັບບັນດາທະນາຄານຕ່າງໆ ເພື່ອໃຫ້ຜູ້ທີ່ໃຊ້ບໍລິການຢູມັນນີສາມາດເຮັດທຸລະກຳທາງດ້ານການເງິນໄດ້ບໍ່ວ່າຈະເປັນການໂອນເງິນ,ຮັບເງິນ ແລະການຊໍາລະຄ່າບໍລິການຕ່າງໆເຊັ່ນ: ການຕື່ມມູນຄ່າໂທ, ການຊຳລະຄ່າອິນເຕີເນັດ ແລະໃນໄວໆນີ້ຍັງຈະມີບໍລິການຈ່າຍຄ່າປະກັນໄພ, ຄ່ານໍ້າ, ຄ່າໄຟຟ້າ ແລະອື່ນໆ ຊຶ່ງມີຄວາມສະດວກ, ປອດໄພ, ສາມາດເຮັດທຸລະກຳທາງດ້ານການເງິນໄດ້ທຸກທີ່, ທຸກເວລາພຽງແຕ່ມີສັນຍາຂອງຢູນິເທວ.

-------------

ຂ່າວ: ກອງຄຳ, ຮູບພາບ: #ຫນັງສືພິມເສດຖະກິດສັງຄົມ

  

แชร์