ນຳສະເໜີລົດ ຮອນດ້າຊີຕີ້ໃໝ່

  ໃນວັນທີ 29 ກັນຍາ 2020, ບໍລິສັດ ນິວຈິບເຊັງ ຈຳກັດ ໄດ້ນຳສະເໜີລົດຮອນດ້າໃໝ່ All New Honda City ເພື່ອໃຫ້ລູກຄ້າຢູ່ພາຍໃນລາວກໍຄືປະຊາຊົນໄດ້ສຳຜັດກັບລົດນະວັດຕະກຳໃໝ່, ພ້ອມໄດ້ທົດລອງຂັບ ແລະຈັບຈອງເປັນເຈົ້າຂອງ, ໃຫ້ກຽດເຂົ້າຮ່ວມພິທີເປີດໂຕລົດດັ່ງກ່າວ,ໂດຍທ່ານ ພີທັກ ມະຫາສິຣິພັນ ແລະທ່ານ ສຸລະຊາດ ພູລະຍາ ທັງສອງເປັນຜູ້ຈັດການອາວຸໂສຝ່າຍຂາຍບໍລິສັດ ນິວຈິບເຊັງຈຳກັດ, ພ້ອມດ້ວຍນັກທຸລະກິດ, ພະນັກງານ ແລະຂະແໜງການທີ່ກ່ຽວຂ້ອງ.

  ອໍນິວຮອນດ້າຊີຕີ້ເປັນຈັກໃໝ່ 1,5 ລິດ, ມີຄວາມແຮງ 119 ແຮງມ້າ ແລະອັດຕາການກິນນໍ້າມັນສະເລ່ຍ 20 ກິໂລ ແມັດ/ລິດ, ໄດ້ມີການປັບປ່ຽນຮູບໂສມໃໝ່ໃຫ້ມີຄວາມສວຍງາມ,ຫລູຫລາ, ໂດດເດັ່ນ, ແຂງແກ່ງ, ສະດວກສະບາຍໃນການຂັບຂີ່ ແລະມີຄວາມເໝາະສົມກັບທຸກເພດທຸກໄວໂດຍຮັກສາກິ່ນອາຍຂອງຄວາມເປັນຮອນດ້າໄວ້ເຊັ່ນເຄີຍ, ມີຈໍາໜ່າຍຢູ່ ສປປ ລາວ ທັງໝົດ 6 ສີ ຄື: ປອນເງິນ, ເທົາ, ແດງ, ຂາວມຸກ, ດຳມຸກ ແລະຟ້າ, ຊຶ່ງງວດທໍາອິດໄດ້ນຳເຂົ້າມາລາວໃນວັນ 24 ກັນຍາ 2020 ແລະຖືກຈັບຈອງໄປໝົດແລ້ວ, ສ່ວນງວດທີ 2 ແມ່ນຈະນຳເຂົ້າມາທ້າຍເດືອນຕຸລາ 2020 ຈໍານວນ 30 ຄັນ ແລະໄດ້ຖືກຈອງໄປແລ້ວຈຳນວນໜຶ່ງ.

แชร์