ກອງປະຊຸມສໍາມະນາກ່ຽວກັບການປະຕິວັດອຸດສາຫະກໍາຄັ້ງທີ 4 ໄດ້ຈັດຂຶ້ນໃນວັນທີ 30 ກັນຍາຜ່ານມາຢູ່ທີ່ສະໂມສອນໃຫຍ່ຂອງແຂວງສາລະວັນໃຫ້ກຽດເປັນປະ ທານໂດຍທ່ານ ບໍ່ວຽງຄໍາ ວົງດາລາ ລັດຖະມົນຕີກະຊວງວິທະຍາສາດ ແລະເຕັກໂນໂລຊີ, ທ່ານ  ໂພໄຊ ໄຊຍະສອນ ຮັກສາການເຈົ້າແຂວງສາລະວັນ, ມີບັນດາຫົວໜ້າຫ້ອງການ, ຄະນະບໍລິຫານງານຊາວໜຸ່ມພາຍໃນແຂວງເຂົ້າຮ່ວມ.

  ການຈັດກອງປະຊຸມສຳມະນາໃນຄັ້ງນີ້ແມ່ນເພື່ອສ້າງຄວາມຮູ້ຄວາມເຂົ້າໃຈ ແລະສາມາດນໍາໃຊ້ເຂົ້າໃນວຽກງານຕົວຈິງຕາມຄວາມຮຽກຮ້ອງຕ້ອງການຂອງການພັດທະ ນາແຕ່ລະໄລຍະ ແລະດ້ານອື່ນໆ, ພ້ອມດຽວກັນນັ້ນກໍໄດ້ມີການຈັດກິດຈະກໍາຖາມ-ຕອບກ່ຽວກັບຄວາມຮູ້ວິທະຍາສາດໃຫ້ນ້ອງນ້ອຍເຍົາວະຊົນ ແລະຊາວໜຸ່ມນໍາອີກ.

  ທ່ານ ບໍ່ວຽງຄໍາ ວົງດາລາ ໄດ້ໃຫ້ກຽດຂຶ້ນບັນລະຍາຍກ່ຽວກັບການປະຕິວັດອຸດສາຫະກໍາຄັ້ງທີ 4 ເປັນຕົ້ນແມ່ນຜົນສະທ້ອນຂອງຍຸກອຸດສາຫະກໍາ 4.0 ໃນດ້ານເສດ ຖະກິດດ້ານການເງິນ, ການທະນາຄານ, ແລະການບໍລິການດ້ານສັງຄົມດ້ານຄຸ້ມຄອງບໍລິຫານລັດ; ກາລະໂອກາດ ແລະ ສິ່ງທ້າທາຍສໍາລັບ ສປປ ລາວ ຍຸກອຸດສາຫະກໍາ 4.0 ເປັນກະແສຟອງໃນທົ່ວໂລກ ສປປ ລາວ ສາມາດເຂົ້າຮ່ວມຍຸກອຸດສາຫະກຳ 4.0 ແຕ່ຫົວທີ ສປປ ລາວ ພັດທະນາຕາມຫຼັງຈຶ່ງສາມາດນຳໃຊ້ຜົນການຄົ້ນຄວ້າໄດ້ໄວການຜະລິດມີປະສິດທິຜົນສາມາດພັດທະນາໄດ້ໄວກວ່າເກົ່າສ້າງເງື່ອນໄຂຫັນປະເທດເປັນອຸດສາຫະກຳ ແລະທັນສະໄໝສ້າງຄວາມເຂັ້ມແຂງໃຫ້ຊາວໜຸ່ມ-ອະນາ ຄົດຂອງປະເທດຊາດ.

  ການພັດທະນາວິທະຍາສາດ ແລະເຕັກໂນໂລຊີຂອງບັນດາປະເທດໃນໂລກໄລຍະທີ 1 ແມ່ນ: ເລີ່ມຕົ້ນພັດທະນາວິທະຍາສາດ ແລະເຕັກໂນໂລຊີ, ໄລຍະ 2: ການພັດ ທະນາວິທະຍາສາດ ແລະເຕັກໂນໂລຊີໄດ້ມີການກໍ່ຮ່າງສ້າງຕົວແລ້ວ, ໄລຍະ3: ການຄົ້ນຄວ້າພັດທະນາວິທະຍາສາດ ແລະເຕັກໂນໂລຊີໄດ້ຮັບການປັບປຸງ ແລະເປີດກວ້າງຢ່າງແຂງແຮງ, ໄລຍະ4: ການພັດທະນາວິທະຍາສາດ ແລະເຕັກໂນໂລຊີຫັນເປັນສາກົນແລ້ວ ແລະສາມາດເປັນເຈົ້າຕົນເອງໄດ້; ບາດກ້າວການພັດທະນາສູ່ຍຸກອຸດສາ ຫະກໍາ 4.0 ຂອງບັນດາປະເທດອາຊຽນ; ບັນຫາປັດໄຈພື້ນຖານເພື່ອຮອງຮັບອຸດສາຫະກໍາ 4.0 ຂອງ ສປປ ລາວແມ່ນມີພັກປະຊາປະຕິວັດລາວຊີ້ນຳ-ນຳພາ, ມີແນວທາງຖືກຕ້ອງ,ຄົນລາວດຸໝັ່ນ, ສະຫຼາດ ແລະມີໄຫວພິບ. ປະເທດລາວມີຊັບພະຍາກອນທຳມະຊາດອຸດົມສົມບູນ,ມີການຮ່ວມມືກັບຕ່າງປະເທດ ແລະສາກົນ ແລະມາດຕະການສໍາລັບ ສປປ ລາວ ເພື່ອຮັບຮອງການປະຕິວັດອຸດສາຫະກໍາຄັ້ງທີ 4. 

--------------

ຂ່າວ: ກິນດາວັນ ອ້ວນນາຄູ  

ຮູບພາບ: #ຫນັງສືພິມເສດຖະກິດສັງຄົມ

แชร์