ເຊີນທ່ຽວຕະຫຼາດນັດຢ້ອນຍຸກ

  ພະແນກຖະແຫຼງຂ່າວ, ວັດທະນະທໍາ ແລະທ່ອງທ່ຽວນະຄອນຫຼວງວຽງຈັນ ຮ່ວມກັບບໍລິສັດ ກຣິດຕິພົງ ເອັນເຕີເທນເມັນອີເວັນ ແລະອໍກະໄນເຊີ ແລະສູນການຄ້າວຽງຈັນເຊັນເຕີຈັດງານເປີດຕະຫຼາດນັດຢ້ອນຍຸກ ແລະໄຫຼເຮືອໄຟປະຈໍາປີ 2020 ຂຶ້ນວັນທີ 28 ກັນຍາ 2020 ທີ່ສູນການຄ້າວຽງຈັນເຊັນເຕີ ນວ ເປັນປະທານຮ່ວມໂດຍທ່ານນາງ ວິໄລວອນ ຈັນທະລາຕີ ຫົວໜ້າພະແນກ ຖວທ , ທ່ານ ອໍລະໄທ ສັນຕີຄົງຄາ ປະທານບໍລິສັດ ກຣິດຕິພົງ ກຣຸບ ມີທ່ານນາງ ນາລີ ສີສຸລິດ ພັນລະຍາການນໍາຂັ້ນສູງ, ທ່ານ ເດດສົງຄາມ ທໍາມະວົງ ເຈົ້າເມືອງສີສັດຕະນາກພ້ອມດ້ວຍພະນັກງານວິຊາການ ແລະບັນດາຜູ້ປະກອບການທຸລະກິດບໍລິສັດຫ້າງຮ້ານເຂົ້າຮ່ວມ.

  ການເປີດງານຕະຫຼາດນັດຢ້ອນຍຸກຄັ້ງນີ້ໄດ້ດຳເນີນເປັນເວລາ 5 ວັນ ແຕ່ວັນທີ 28 ກັນຍາ ຫາ ວັນທີ 2 ຕຸລາ 2020 ເພື່ອສົ່ງເສີມຮີດຄອງປະເພນີອັນດີງາມຂອງລາວ ແລະສືບສານປະເພນີການໄຫຼເຮືອໄຟພ້ອມທັງເປັນການສົ່ງເສີມການທ່ອງທ່ຽວພາຍໃນເພື່ອກະຕຸ້ນໃຫ້ເສດຖະກິດມີຄວາມຄຶກຄື້ນ ແລະເປັນການຮັກສາສີມືແຮງ ງານລາວເພື່ອສະແດງໃຫ້ເຫັນເຖິງວິຖີການດໍາລົງຊີວິດ ແລະການນຸ່ງຖືຂອງຄົນໃນສະໄໝກ່ອນທັງເປັນການສ້າງບ່ອນຮອງຮັບກຸ່ມຄົນທີ່ສົນໃຈໃນວິຖີຊີວິດຄົນສະໄໝກ່ອນ ແລະເຜີຍແຜ່ວັດທະນະທໍາດັງເດີມສູ່ຄົນຮຸ່ນໃໝ່ເປັນການຈັດງານເພື່ອສົ່ງເສີມວັດທະນະທໍາ ແລະປະເພນີອັນດີງາມຂອງຊາດສົ່ງເສີມສິນຄ້າອຸປະໂພກ ແລະບໍລິ ໂພກຈາກສີມືແຮງງານລາວສົ່ງເສີມ ແລະຮັກສາອາຫານພື້ນເມືອງລາວເພື່ອໃຫ້ຄົນຮຸ່ນໃໝ່ໄດ້ສືບທອດການສະແດງສິນລະປະທີ່ຄຽງຄູ່ກັບວັດທະນະທໍາຂອງລາວການເດີນແບບຈາກສາວງາມນາງສາວນະຄອນຫຼວງ.

  ໃນງານຕະຫຼາດນັດຢ້ອນຍຸກໄດ້ມີຜູ້ປະກອບການເຂົ້າຮ່ວມ 50 ຮ້ານຄ້າ ໃນນັ້ນລວມມີຮ້ານຂາຍຂອງຫວານ ແລະນໍ້າສະໝຸນໄພ 15 ຮ້ານ ຂາຍເຄື່ອງຫັດຖະກໍາຜ້າໄໝ, ຜ້າຝ້າຍ, ຜະລິດຕະພັນຕ່າງໆ ແລະສິນຄ້າ ODOP ຈໍານວນ 20 ຮ້ານ ແລະຮ້ານຂາຍອາຫານພື້ນເມືອງ ຫຼືອາຫານທົ່ວໄປ 15 ຮ້ານ.

-------------

ຂ່າວ: ແພງຕາ ເສດຖະກິດສັງຄົມ

ຮູບພາບ: #ຫນັງສືພິມເສດຖະກິດສັງຄົມ

แชร์