ອາທິດຜ່ານມາສ່ວຍສາອາກອນປະຈຳນະຄອນຫຼວງວຽງຈັນ (ນວ) ຮ່ວມກັບທະນາຄານການຄ້າຕ່າງປະເທດລາວມະຫາຊົນ,ໄດ້ສືບຕໍ່ເປີດຂະບວນການເສຍຄ່າທຳນຽມທາງ ແລະພາສີທີ່ດິນຜ່ານລະບົບທະນາຄານທີ່ກະຊວງປ້ອງກັນປະເທດໂດຍການເຂົ້າຮ່ວມຂອງທ່ານ ວົງທອງ ຄຳກິແກ້ວ ຮອງຫົວໜ້າສ່ວຍສາອາກອນປະຈຳນະຄອນ ຫຼວງວຽງຈັນ, ມີທ່ານ ພັນເອກ ໄພວັນ ຈັນທະພົມມາ ຮອງຫົວໜ້າຫ້ອງວ່າການກະຊວງປ້ອງກັນປະເທດ, ທ່ານ ສົມສຸກ ດວງດາລາ ຫົວໜ້າພະແນກການຕະຫຼາດ ທະນາຄານການຄ້າຕ່າງປະເທດລາວມະຫາຊົນ, ພ້ອມດ້ວຍນາຍແລະພົນທະຫານເຂົ້າຮ່ວມ.

  ທ່ານ ວົງທອງ ຄຳກິແກ້ວ ໃຫ້ຮູ້ວ່າ: ການເປີດຂະບວນການເສຍຄ່າທຳນຽມທາງ ແລະພາສີທີ່ດິນຜ່ານລະບົບທະນາຄານ, ຊຶ່ງທ່ານສາມາດຈ່າຍຜ່ານ 6 ຊ່ອງ ທາງຂອງ ທຄຕລ, ປະຈຸບັນນະຄອນຫຼວງວຽງຈັນມີ 13 ຈຸດຄື: ຢູ່ບັນດາເມືອງ 9 ຈຸດ, ກອງຄຸ້ມຄອງພາຫະນະທົ່ງປົ່ງ 2 ຈຸດ, ໂຮງຮຽນການຂັບຂີ່ນໍ້າຊວງ 1 ຈຸດ, ຢູ່ພະແນກໂຍທາທິການ ແລະຂົນສົ່ງນະຄອນຫຼວງວຽງຈັນ 1 ຈຸດ.

  ສໍາລັບພາສີທີ່ດິນສາມາດຈ່າຍໄດ້: ຜ່ານທາງເຄົາເຕີທະນາຄານ,ບີຊີແອວວັນ ແລະການເງິນບ້ານ, ເປັນການອຳນວຍຄວາມສະດວກໃຫ້ແກ່ຜູ້ຕ້ອງການຊໍາລະເປັນການປະກອບສ່ວນໂດຍກົງເຂົ້າໃນການປະຕິບັດພັນທະເຂົ້າງົບປະມານ.

  ໃນໄລຍະຜ່ານມາສ່ວຍສາອາກອນປະຈຳນະຄອນຫຼວງໄດ້ສົມທົບກັບທະນາຄານການຄ້າຕ່າງປະເທດລາວມະຫາຊົນ ແລະບັນດາສຳນັກງານອົງການຂອງລັດໄດ້ເລີ່ມເປີດຂະບວນການຊຳລະຄ່າທຳນຽມທາງຜ່ານລະບົບທະນາຄານມາຕັ້ງແຕ່ປີ2018 ຈາກນັ້ນມາຮອດຕົ້ນປິ 2019 ໄດ້ເລີ່ມເປີດຂະບວນການແຈ້ງ-ຊຳລະພາສີທີ່ດິນຜ່ານລະບົບທະນາຄານ, ຜ່ານມາການເຄື່ອນໄຫວເຫັນວ່າບັນດາກົມກອງ, ການຈັດຕັ້ງແຕ່ລະຂັ້ນໄດ້ຮັບການຮ່ວມມືເປັນຢ່າງດີ ແລະຫຼາຍພາກສ່ວນໃຫ້ຄວາມສົນໃຈແລະເປັນການປະກອບສ່ວນພັນທະຂອງຕົນຢ່າງຄົບຖ້ວນ ແລະທັນເວລາ.

  ຜ່ານການຈັດຕັ້ງປະຕິບັດໄລຍະ 8 ເດືອນ, ສ່ວຍສາອາກອນປະຈຳ ນວ, ສາມາດຈັດຕັ້ງປະຕິບັດເກັບລາຍຮັບໄດ້ທັງໝົດ 640 ຕື້ກີບເທົ່າກັບ 56,91% ຂອງແຜນ ການດັດແກ້. ໃນນັ້ນ, ພາສີ ທີ່ດິນປະຕິບັດໄດ້ 14 ຕື້ກີບມີ 1,65 ຕອນ, ມີເນື້ອທີ່ 825,9 ລ້ານຕາແມັດ; ເທົ່າກັບ 59,46% ຂອງແຜນການປີ; ຖ້າທຽບໄລຍະດຽວປີ 2019 ເທົ່າກັບ 82,35% ຫຼືລົງ 3 ຕື້ກີບ. ໃນນັ້ນການເງິນບ້ານເກັບໄດ້ 1,41 ຕື້ກີບ 18.161 ຕອນ; ເນື້ອທີ່ 87 ລາຍຕາແມັດ, ທະນາຄານຈັດເກັບ 12,59 ຕື້ກີບ 177.279 ຕອນ, ເນື້ອທີ່ 738.047.666 ຕາແມັດ, ຄ່າທຳນຽມທາງປະຕິບັດໄດ້ 45,82 ຕື້ກີບ, ມີ 214, 089 ຄັນທຽບໃສ່ແຜນການປີ 70,49 % ທຽບໃສ່ໄລຍະດຽວກັນປີ 2019 ເທົ່າກັບ 89,96% ຫຼືຫຼຸດໄລຍະດຽວກັນປີກາຍ 5,11 ຕື້ກີບ.

   ສະນັ້ນ, ຈຶ່ງຮຽກຮອງມາຍັງອົງການຈັດຕັ້ງພັກ-ລັດທຸກພາກສ່ວນຕະຫຼອດຮອດບຸກຄົນ, ນິຕິບຸກຄົນທີ່ເປັນເຈົ້າຂອງ, ຜູ້ໃຊ້ຍານພາຫະນະ ແລະທີ່ດິນພາຍໃນນະ ຄອນຫຼວງວຽງຈັນໃຫ້ຄວາມຮ່ວມມືປະກອບສ່ວນໃນການປະຕິບັເພັນທະເຂົ້າງົບປະມານແຫ່ງລັດໃຫ້ຖືກຕ້ອງຕາມລະບຽບການທີ່ກຳນົດໄວ້.

แชร์