ຈຳປາສັກເປີດຕະຫຼາດຫັດຖະກຳຊຸກຍູ້ພາກທຸລະກິດ

   ໃນວັນທີ 29 ກັນຍາຜ່ານມາອໍານາດການປົກຄອງແຂວງຈໍາປາສັກໄດ້ເປີດງານຕະຫຼາດຫັດຖະກໍາທົ່ວແຂວງຂຶ້ນທີ່ສວນວັດທະນະທໍາຫຼັກ 7 ໂດຍໃຫ້ກຽດເຂົ້າຮ່ວມຂອງທ່ານ ວິໄລວົງ ບຸດດາຄໍາ ເຈົ້າແຂວງຈໍາປາສັກ, ມີທ່ານ ສົມຈິດ ອິນທະມິດ ຮອງລັດຖະມົນຕີກະຊວງອຸດສາຫະກໍາ ແລະການຄ້າ, ບັນດາທ່ານແຂກຜູ້ໃຫຍ່ຈາກກົງສູນຍີ່ປຸ່ນ ແລະ ສສ ຫວຽດນາມ ແລະບັນດາທ່ານແຂກຜູ້ໃຫຍ່ທີ່ກ່ຽວຂ້ອງເຂົ້າຮ່ວມ.

  ໃນງານທ່ານ ບຸນຍະເດດ ທອງສະຫວັນ ຫົວໜ້າພະແນກອຸດສາຫະກໍາ ແລະການຄ້າ ແຂວງຈໍາປາສັກ ໄດ້ກ່າວລາຍງານວ່າ: ການເປີດຕະຫຼາດຫັດຖະກໍາໃນຄັ້ງນີ້ ແມ່ນເພື່ອເປັນການປະກາດ ແລະ ແຈ້ງໃຫ້ພາກສ່ວນຕ່າງໆໃນສັງຄົມໄດ້ຮັບຮູ້ວ່າມີຕະຫຼາດຫັດຖະກໍາທົ່ວແຂວງຕັ້ງຢູ່ສວນວັດທະນະທໍາບັນດາເຜົ່າຂອງແຂວງຫຼັກ 7 ຢ່າງເປັນທາງການ, ທັງເປັນຈຸດໜຶ່ງທີ່ດຶງດູດເອົານັກທ່ອງທ່ຽວ, ນັກທຸລະກິດ, ຜູ້ຜະລິດ, ຜູ້ຈໍາໜ່າຍ ແລະຜູ້ຊົມໃຊ້ໄດ້ຍັບເຂົ້າໃກ້ກັນຫຼາຍຂຶ້ນພ້ອມແນໃສ່ການສົ່ງເສີມຜະລິດຕະພັນພາຍໃນ ແລະຄຸ້ມຄອງການນໍາເຂົ້າຊົມໃຊ້ຜະລິດຕະພັນພາຍໃນສິນຄ້າທີ່ຕິດພັນກັບການທ່ອງທ່ຽວ, ທັງເປັນຈຸດສູນລວມທີ່ເປັນເອກະລັກສະເພາະຂອງແຕ່ ລະທ້ອງຖິ່ນ,ແຕ່ລະເມືອງເພື່ອເປັນໂຄສະນາສິນຄ້າທີ່ເກີດມາຈາກສີມືແຮງງານ,ຫົວຄິດປະດິດສ້າງຂອງຄົນລາວ,ໂດຍສະເພາະສິນຄ້າໜຶ່ງເມືອງໜຶ່ງຜະລິດຕະພັນ, ຊຶ່ງການຈັດງານໃນຄັ້ງນີ້ມີຜູ້ເຂົ້າຮ່ວມວາງສະແດງຂາຍທັງໝົດ 54 ກວ່າຫົວໜ່ວຍທີ່ມີຈາກ 9 ຕົວເມືອງ ແລະ 1 ນະຄອນ ພາຍໃນແຂວງຈໍາປາສັກ.

  ໃນໂອກາດດັ່ງກ່າວ ທ່ານ ວິໄລວົງ ບຸດດາຄໍາ ເຈົ້າແຂວງຈໍາປາສັກ ໄດ້ກ່າວຮຽກຮ້ອງໃຫ້ພາກສ່ວນທີ່ກ່ຽວຂ້ອງຈົ່ງພ້ອມກັນເອົາໃຈໃສ່ຊອກຫາວິທີທາງໃນການສົ່ງເສີມການຜະລິດ, ການພັດທະນາສິນຄ້າ ແລະການສົ່ງເສີມໃຫ້ມີຄວາມທັນສະໄໝ,ທັງຮັບປະກັນຄຸນນະພາບ ແລະປະລິມານເພື່ອສາມາດຕອບສະໜອງກັບຄວາມຮຽກຮ້ອງຕ້ອງການຂອງຕະຫຼາດພ້ອມດຽວກັນນັ້ນກໍໃຫ້ສຶບຕໍ່ເພີ່ມທິວີການໂຄສະນາດ້ານເງື່ອນໄຂ, ທ່າແຮງຂອງແຕ່ລະທ້ອງຖີ່ນເພື່ອດຶງດູດເອົາການລົງທຶນຈາກພາຍໃນ ແລະ ຕ່າງປະເທດ.

แชร์