ຊັນເປເປີ້ຈົກທຶນ 9,1 ພັນຕື້ກີບ ປູກໄມ້ປ້ອນໂຮງງານຜະລິດເຫຍື່ອເຈ້ຍ

   ວັນທີ 23 ກັນຍາ 2020 ນີ້, ທ່ານ ຄໍາມະນີ ອິນທິລາດ ລັດຖະມົນຕີກະຊວງພະລັງງານ ແລະບໍ່ແຮ່, ທ່ານ ຈະເລີນ ເຢຍປາວເຮີ ລັດຖະມົນຕີປະຈຳສຳນັກງານນາຍົກລັດຖະມົນຕີພ້ອມດ້ວຍທ່ານຫົວໜ້າກົມ, ຮອງກົມໄດ້ລົງໄປຢ້ຽມຢາມເບິ່ງການຜະລິດຂອງບໍລິສັດຊັນເປເປີ້ໂຮນດິ້ງລາວຈຳກັດ ທີ່ເມືອງເຊໂປນ ແຂວງສະຫວັນນະເຂດໂດຍມີ ທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດ ແລະຄະນະກ່ຽວຂ້ອງຂອງແຂວງ ເຂົ້າຮ່ວມນຳ.

 ບໍລິສັດຊັນເປເປີ້ ໄດ້ເຂົ້າມາລົງທຶນໃນລາວແຕ່ປີ 2008 ເພື່ອສ້າງຕັ້ງໂຄງການປູກໄມ້ອຸດສາຫະກຳປ້ອນໂຮງງານຜະລິດເຫຍື່ອເຈ້ຍ, ມາຮອດປະຈຸບັນໄດ້ລົງທຶນໄປແລ້ວ 9.139 ຕື້ກວ່າກີບ ຫຼືປະມານ 1,69 ຕື້ໂດລາ, ໄດ້ບຸກເບີກເນື້ອທີ່ ແລະປູກໄມ້ 32 ພັນເຮັກຕາ, ໃນນັ້ນປູກຮ່ວມກັບປະຊາຊົນ 6.400 ເຮັກຕາ ມາຮອດປີ 2017 ໄດ້ເປີດການກໍ່ສ້າງໂຮງງານຜະລິດເຫຍື່ອເຈ້ຍຂະໜາດໃຫຍ່ສາມາດຜະລິດໄດ້ 3 ແສນໂຕນຕໍ່ປີ, ຊຶ່ງໄດ້ເລີ່ມທົດລອງ ແລະ ດຳເນີນການຜະລິດເລີ່ມແຕ່ເດືອນພຶດສະ ພາ ປີ2018 ເປັນຕົ້ນມາມາຮອດປະຈຸບັນນອກຈາກຈະມີໂຮງງານຜະລິດໄຟຟ້າດ້ວຍພະລັງງານຄວາມຮ້ອນທີ່ໃຊ້  ສິ່ງເສດເຫຼືອຈາກໄມ້ທີ່ບໍ່ສາມາດຜະລິດເຫຍື່ອເຈ້ຍໄດ້ແລ້ວ, ກຳລັງສ້າງໂຮງງານຜະລິດໄຟຟ້າດ້ວຍພະລັງງານຄວາມຮ້ອນທີ່ໃຊ້ຖ່ານຫີນຂະໜາດ 110 ເມັກກາວັດ ເພື່ອນຳໃຊ້ໃນໂຮງງານ ແລະຂາຍອອກຈຳນວນໜຶ່ງ.

 ຜ່ານການດຳເນີນວຽກງານເປັນເວລາ 10 ກວ່າປີ ສາມາດສ້າງວຽກເຮັດງານທຳໃຫ້ແກ່ແຮງງານລາວຈຳນວນໜຶ່ງ, ປະຊາຊົນສາມາດມີລາຍໄດ້ຈາກການປູກໄມ້-ຂາຍໄມ້ເຂົ້າສູ່ໂຮງງານ, ພື້ນຖານໂຄງລ່າງຂອງບ້ານໃກ້ຄຽງໄດ້ຮັບການປັບປຸງກໍ່ສ້າງເປັນຕົ້ນແມ່ນຖະໜົນຫົນທາງ,ໂຮງຮຽນ ແລະອື່ນໆ,ຄຽງຄູ່ກັນນັ້ນກໍ່ໄດ້ຊ່ວຍເຫຼືອສັງຄົມໃນຍາມເກີດໄພພິບັດຕ່າງໆເປັນຈຳນວນເງິນຫຼາຍຕື້ກີບ.

  ໂອກາດດັ່ງກ່າວທ່ານລັດຖະມົນຕີ ແລະທ່ານເຈົ້າແຂວງພ້ອມຄະນະກໍ່ໄດ້ເລາະຢ້ຽມຊົມຂະບວນການຜະລິດຂອງໂຮງງານ, ຂັ້ນຕອນການຜະລິດ ແລະຜະລິດຕະພັນຂອງໂຮງງານຕື່ມອີກ.

แชร์