ເສດຖະກິດຫວຽດນາມເຕີບໂຕ 2,62%

  ສຳນັກງານສະຖິຕິແຫ່ງຊາດສສ ຫວຽດນາມ(ຈີເອສໂອ)ເປີດເຜີຍຕົວເລກເສດຖະກິດໄຕມາດ 3 ຂອງປະເທດວ່າ ຕົວເລກຜະລິດຕະພັນພາຍໃນ(ຈີດີພີ)ເດືອນກໍລະກົດເຖິງເດືອນກັນຍາເຕີບໂຕ 2,62% ເມື່ອທຽບກັບປີທີ່ຜ່ານມາ.

ຕາມຂ່າວຕ່າງປະເທດລາຍງານວ່າ ຕົວເລກການຂະຫຍາຍຕົວຂອງເສດຖະກິດຫວຽດນາມທີ່ກົງກັນຂ້າມກັບເສດຖະກິດສ່ວນໃຫຍ່ຂອງໂລກ ເປັນຜົນມາຈາກການສົ່ງອອກເພີ່ມຫຼາຍຂຶ້ນ ໂດຍເພີ່ມຂຶ້ນ 34% ຈາກໄຕມາດກ່ອນໜ້ານີ້ ແລະເພີ່ມຂຶ້ນ 11% ຈາກໄຕມາດດຽວກັນຂອງປີທີ່ຜ່ານມາ ເຖິງຢ່າງໃດກໍຕາມຕົວເລກການເຕີບໂຕຂອງເສດຖະກິດຫວຽດນາມໃນໄຕມາດ 3 ຍັງນັບວ່າລໍຕົວທີ່ສຸດໃນຮອບເກືອບ 10 ປີ. ຊຶ່ງຫວຽດນາມມີເສດຖະກິດທີ່ຂະຫຍາຍຕົວໄວສຸດປະເທດໜຶ່ງໃນອາຊີ ໂດຍເພີ່ງພາການສົ່ງອອກຈຳນວນຫຼາຍ, ການແຜ່ລະບາດຂອງເຊື້ອໂຄວິດ-19ກະທົບຕໍ່ເສດຖະກິດສ່ວນໃຫຍ່ຂອງໂລກທີ່ຕ້ອງປິດເມືອງເປັນເວລາດົນໃນໄຕມາດທຳອິດ ແລະໄຕມາດ 2 ຂອງປີນີ້ ຈີດີພີຂອງຫວຽດນາມຂະຫຍາຍຕົວພຽງ 0,36% ແຕ່ນັບວ່າດີກວ່າປະເທດສ່ວນໃຫຍ່ທີ່ເສດຖະກິດຕິດລົບ.

  ຈີເອສໂອ ກ່າວວ່າ ການແພ່ລະບາດຂອງເຊື້ອໂຄວິດ-19ທີ່ສົ່ງຜົນກະທົບຮ້າຍແຮງຕໍ່ເສດຖະກິດ-ສັງຄົມທົ່ວໂລກ ນີ້ຖືເປັນຄວາມສຳເລັດຍິ່ງໃຫຍ່ຂອງຫວຽດນາມໃນການປ້ອງກັນພະຍາດຕິດຕໍ່, ການຟື້ນຟູເສດຖະກິດ ແລະການພັດທະນາ, ປະຈຸບັນຫວຽດນາມມີຜູ້ຕິດເຊື້ອໂຄວິດພຽງ 1.077 ຄົນ ເສຍຊີວິດ 35 ຄົນ ແລະບໍ່ພົບຜູ້ຕິດເຊື້ອພາຍໃນປະເທດມາເກືອບ 1 ເດືອນ.

----

ໜັງສືພິມ ເສດຖະກິດ-ສັງຄົມ

แชร์