ລາວ-ໄທ ຈັດສະແດງດົນຕີ ແລະສີລະປະວັດທະນະທໍາພື້ນບ້ານ

   ການສະແດງດົນຕີ ແລະສິລະປະວັດທະນະທໍາພື້ນບ້ານພາຍໃຕ້ຫົວຂໍ້ “ນໍ້າຂອງບໍ່ກັ້ນໂຄວິດບໍ່ໃກ້ 70 ປີ ໄທ-ລາວຮັກແພງແບ່ງປັນ ແລະໝັ້ນຄົງ”, ເພື່ອສະເຫຼີມສະຫຼອງວັນສ້າງຕັ້ງສາຍພົວພັນການທູດລະຫວ່າງ ສປປ ລາວ ກັບຣາຊະອານາຈັກໄທຄົບຮອບ 70 ປີ ໂດຍຖ່າຍທອດສົດຜ່ານລະບົບອອນລາຍທາງ Facebook Live (https://www.facebook.com/ThaiMCulture) ແລະYouTube Live (https://www.youtube.com/channel/ UCmS0EQJD2PYBmlp 6o8aUxkQ).

  ອີງຕາມແຫຼ່ງຂໍ້ມູນຈາກສຳນັກຂ່າວສານປະເທດລາວໃຫ້ຮູ້ວ່າ: ງານດັ່ງກ່າວໄດ້ຈັດຂຶ້ນໃນຕອນຄໍ່າຂອງວັນທີ 28 ກັນຍາ 2020 ທີ່ໂຮງລະຄອນແຫ່ງຊາດນະຄອນ ຫຼວງບາງກອກ ໂດຍກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວແຫ່ງ ສປປ ລາວ ຮ່ວມກັບກະຊວງວັດທະນະທຳແຫ່ງຣາຊະອານາຈັກໄທໂດຍໃຫ້ກຽດເຂົ້າ ຮ່ວມມີທ່ານ ກິແກ້ວ ໄຂຄໍາພິທູນ ລັດຖະມົນຕີຖະແຫຼງຂ່າວ,ວັດທະນະທໍາ ແລະທ່ອງທ່ຽວແຫ່ງ ສປປ ລາວ, ທ່ານ ອິດທິພົນ ຄຸນປື້ມລັດຖະມົນຕີກະຊວງວັດທະນະທຳຣາຊະອານາຈັກໄທ, ທ່ານ ແສງສຸຂະຕິວົງເອກອັກຄະລັດ ຖະທູດວິສາມັນຜູ້ມີອຳນາດເຕັມແຫ່ງ ສປປ ລາວ ປະຈຳຣາຊະອານາຈັກໄທມີບັນດາທູຕານຸທູດ ແລະອົງການຈັດຕັ້ງຕ່າງໆ.

  ທ່ານ ອິດທິພົນ ຄຸນປື້ມ ໄດ້ກ່າວວ່າ: ງານຄັ້ງນີ້, ຈັດຂຶ້ນເພື່ອເປັນການສະເຫຼີມສະຫຼອງວັນສ້າງຕັ້ງສາຍພົວພັນການທູດລະຫວ່າງ ສປປ ລາວ ກັບຣາຊະອານາຈັກໄທ ຄົບຮອບ 70 ປີ,ປະຊາຊົນໄທ ແລະລາວໄດ້ມີປະຫວັດສາດ ແລະວັດທະນະທຳການພົວພັນ ແລະໄປມາຫາສູ່ກັນມາແຕ່ດົນນານແລ້ວ, ໄທ-ລາວ, ລາວ-ໄທ ປຽບເໝືອນສາຍເລືອດດຽວກັນໃນການພົວພັນທີ່ແໜ້ນແຟ້ນ, ນອກຈາກນີ້ຍັງມີການພົວ ພັນທາງດ້ານເສດຖະກິດ ໂດຍສະເພາະມີຂົວມິດຕະພາບລາວ-ໄທຫຼາຍແຫ່ງ, ຊຶ່ງໄດ້ເປັນຂົວຕໍ່ໃນການເຊື່ອມໂຍງທາງດ້ານການຄົມມະນາ ຄົມ ແລະການຄ້າ, ໃນໄລຍະຂອງການລະບາດພະຍາໂຄວິດ- 19ນີ້ລັດຖະບານທັງສອງປະເທດກໍໄດ້ມີການສຶກສາຫາລື ແລະແລກປ່ຽນບົດຮຽນໃນການປ້ອງກັນ ແລະຄວບຄຸມພະຍາດດັ່ງກ່າວເຊິ່ງກັນ ແລະກັນ.

  ໂອກາດດຽວກັນນັ້ນ, ທ່ານ ກິແກ້ວ ໄຂຄໍາພິທູນ ໄດ້ສະແດງຄວາມດີໃຈ ແລະພາກພູມໃຈເປັນຢ່າງຍິ່ງທີ່ໄດ້ຕາງໜ້າໃຫ້ກະຊວງຖະແຫຼງຂ່າວ,  ວັດທະນະທໍາ ແລະທ່ອງທ່ຽວແຫ່ງ ສປປ ລາວນໍາເອົາລາຍການສິລະປະຂອງ ສປປ ລາວ ມາເຂົ້າຮ່ວມການສະແດງດົນຕີ ແລະສິລະ ປະວັດທະນະທໍາພື້ນບ້ານໃນຄັ້ງນີ້, ພ້ອມນີ້ທ່ານຍັງໄດ້ສະແດງຄວາມເສົ້າເສຍໃຈ ແລະຄວາມເຫັນໃຈຢ່າງສຸດຊຶ້ງມາຍັງລັດຖະບານ ແລະປະຊາຊົນໄທທີ່ໄດ້ສູນເສຍຊີວິດຍ້ອນຖືກຜົນກະທົບຈາກການລະບາດຂອງພະຍາດອັກ ເສບປອດທີ່ເກີດຈາກເຊື້ອຈຸລະໂລກສາຍພັນໃໝ່ (ໂວິດ-19).

 ນອກຈາກນັ້ນທ່ານ ກິແກ້ວ ໄຂຄໍາພິທູນ ຍັງໄດ້ສະແດງຄວາມຂອບໃຈ ແລະຍ້ອງຍໍຊົມເຊີຍຢ່າງຈິງໃຈຕໍ່ກະຊວງວັດທະນະທຳແຫ່ງຣາຊະອານາຈັກໄທທີ່ໄດ້ເປັນເຈົ້າພາບຈັດງານສະແດງວັດທະນະທຳທາງໄກໃນເທື່ອນີ້ ແລະເຊື່ອໝັ້ນວ່າການສະແດງສິລະປະຮ່ວມລາວ-ໄທໃນຄັ້ງນີ້ຈະປະກອບສ່ວນສຳຄັນເຂົ້າໃນການຮັດແໜ້ນສາຍພົວພັນມິດຕະພາບ ແລະການຮ່ວມມືທີ່ມີມູນເຊື້ອມາແຕ່ດົນນານລະຫວ່າງສອງຊາດພວກເຮົາໃຫ້ນັບມື້ຈະເລີນງອກງາມຍິ່ງໆຂຶ້ນ.

 

แชร์