ປູກມັນຕົ້ນຂາຍສ້າງລາຍຮັບເຂົ້າຄອບຄົວ 65 ລ້ານກີບຕໍ່ປີ

 ຄອບຄົວ ທ່ານ ນາງ ມະນີໄຊ ຫຼວງກິ່ງ ຊຶ່ງມີພູມລຳເນົາຢູ່ບ້ານໃຫຍ່ໝື່ນຫົວເມືອງ ເມືອງສາ ມັກຄີໄຊ ແຂວງອັດຕະປືສາມາດສ້າງລາຍຮັບໄດ້ 65 ລ້ານກີບ ຕໍ່ປີຈາກການເຮັດອາຊີບປູກມັນຕົ້ນຂາຍເປັນສິນຄ້າຈົນກາຍເປັນຄອບຄົວຕົວແບບດ້ານການປູກມັນຕົ້ນຂອງເມືອງສາມັກຄີໄຊໃນການສ້າງເສດຖະກິດຄອບຄົວ.

   ທ່ານ ນາງ ມະນີໄຊ ຫຼວງກິ່ງ ໄດ້ລາຍງານໃນໂອກາດເຂົ້າຮ່ວມກອງປະຊຸມໃຫຍ່ຜູ້ແທນອົງຄະນະພັກແຂວງອັດຕະປື ຄັ້ງທີ XI ເມື່ອບໍ່ນານມານີ້ວ່າ: ຫຼາຍປີກ່ອນຄອບຄົວໄດ້ຢຶດຖືອາຊີບຄ້າຂາຍທໍາມະດາ ແລະການລ້ຽງສັດແບບທໍາມະຊາດ, ຊຶ່ງເຫັນໄດ້ວ່າຜົນຜະລິດ ແມ່ນໄດ້ຮັບຕໍ່າ, ມີລາຍຮັບໜ້ອຍບໍ່ກຸ້ມກິນ, ການໃຊ້ຊີວິດກໍ່ຝຶດເຄືອງ, ຕໍ່ມາດ້ວຍຄວາມຮັບຮູ້ ແລະເຫັນແຈ້ງຕໍ່ແນວທາງອັນຖືກຕ້ອງຂອງພັກທີ່ຍາມໃດກໍ່ໄດ້ສົ່ງເສີມປະຊາຊົນໃນການຜະລິດເປັນສິນຄ້າເພື່ອສ້າງລາຍຮັບໃຫ້ຄອບຄົວ, ດັ່ງນັ້ນຕໍ່ມາຮອດປີ 2008 ຕົນເອງ ແລະ ຄອບຄົວໄດ້ຕັດສິນໃຈຫັນມາປູກມັນຕົ້ນຂາຍເປັນສິນຄ້າ ໃນເນື້ອທີ່ 5 ເຮັກຕາ ແລະ ກໍ່ເປັນຄອບຄົວທໍາອິດທີ່ປູກມັນຕົ້ນຂອງບ້ານໃຫຍ່ໝື່ນຫົວເມືອງ, ການປູກທໍາອິດເຫັນວ່າບໍ່ຄ່ອຍໄດ້ຮັບຜົນສໍາເລັດຍ້ອນຂາດຕະຫຼາດຈໍາໜ່າຍ.

 ຕໍ່ມາຮອດປີ 2016 ພັກ-ລັດໄດ້ມີນະໂຍບາຍຊຸກຍູ້ບັນດາບໍລິສັດທັງພາຍໃນ ແລະຕ່າງປະເທດໃນການເກັບຊື້ຜົນຜະລິດມັນຕົ້ນ, ພ້ອມທັງຕົນເອງໄດ້ໄປທັນສະນະຮຽນຮູ້ກ່ຽວກັບເຕັກນິກ, ວິທີການດ້ານການປູກມັນຕົ້ນຢູ່ຕ່າງປະເທດໂດຍສະເພາະ ສສ ຫວຽດນາມ ແລະປະເທດໄທແລ້ວໄດ້ບົດຮຽນໃນການປູກມັນຕົ້ນຈາກນັ້ນຈຶ່ງໄດ້ສຸມໃສ່ພາຄອບຄົວຢຶດເອົາອາຊີບປູກມັນຕົ້ນເປັນຫຼັກ ໂດຍນໍາໃຊ້ແຮງງານທີ່ມີພາຍໃນຄອບຄົວທັງໝົດ 7 ຄົນ, ແຮງງານສົມບູນ 3 ຄົນ, ຍິງ 2 ຄົນ, ນອກນັ້ນແມ່ນແຮງ ງານທີ່ຈ້າງມາຊ່ວຍວຽກ, ເບື້ອງຕົ້ນນໍາໃຊ້ທຶນຮອນຂອງຄອບຄົວທີ່ສະສົມມາຊື້ແນວພັນ, ຢາປາບສັດຕູພືດ, ຊຶ່ງມາຮອດປະຈຸບັນສາມາດຜະລິດແນວພັນ ແລະຜະລິດຢາ ປາບສັດຕູພືດໄດ້ດ້ວຍຕົນເອງເຮັດໃຫ້ປະຢັດຕົ້ນທຶນໄດ້ດີ, ສ່ວນຝຸ່ນແມ່ນຍັງບໍທັນໄດ້ນໍາໃຊ້ເພາະສະພາບຂອງດິນຍັງອຸດົມສົມບູນດີຢູ່. ຊຶ່ງໃນລະດູການໜຶ່ງສາມາດເກັບ ກູຜົນຜະລິດໄດ້ມັນຕົ້ນດິບໄດ້ 35 ໂຕນຕໍ່ເຮັກຕາ, ມັນຕົ້ນແຫ້ງໄດ້ 16 ໂຕນຕໍ່ເຮັກຕາ, ຖ້າຂາຍກັບທີ່ໃນລາຄາມັນຕົ້ນດິບ 3,5 ແສນກີບ ຕໍ່ໂຕນ ແລະ ມັນຕົ້ນແຫ້ງ 1,2 ລ້ານກີບຕໍ່ໂຕນ, ມັນຕົ້ນດິບຖ້າສົ່ງຂາຍຮອດລານຕາກຈະໄດ້ລາຄາ 4,5 ແສນກີບຕໍ່ໂຕນ, ມັນຕົ້ນແຫ້ງສົ່ງຮອດລານຕາກຈະໄດ້ລາຄາ 1,4 ລ້ານກີບຕໍ່ໂຕນ, ໂດຍໃນ ແຕ່ລະປີຄອບຄົວມີລາຍຮັບຈາກການປູກມັນຕົ້ນສະເລ່ຍ 60-65 ລ້ານກີບ.

  ທ່ານ ນາງ ມະນີໄຊ ຫຼວງກິ່ງ ໄດ້ກ່າວຕື່ມວ່າ: ຈາກການເຮັດອາຊີບປູກມັນຕົ້ນຂາຍເປັນສິນຄ້າປະຈຸບັນພາຍໃນຄອບຄົວໄດ້ມີຊີວິດການເປັນຢູ່ດີຂຶ້ນລື່ນເກົ່າ, ມີເງິນສົ່ງລູກໄດ້ຮຽນໜັງສື ແລະມີເງິນແຮໄວ້ໃຊ້ຈ່າຍໃນຍາມຈໍາເປັນພ້ອມທັງຈະສືບຕໍ່ເຮັດອາຊີບນີ້ຕໍ່ໄປ ແລະຂະຫຍາຍເນື້ອທີ່ປູກມັນຕົ້ນຈາກເດີມໃຫ້ເພີ່ມຂື້ນເປັນ 25 ເຮັກຕາໃນນີ້ຈະປູກເອງ 15 ເຮັກຕາ ແລະເຫຼືອນັ້ນຈະໃຫ້ຍາດພີ້ນ້ອງເປັນຄົນປູກ. 

--------------

ຂຽນໂດຍ: ວັດທະນາ ຫຼວງອາໄພ

ຮູບພາບ: #ຫນັງສືພິມເສດຖະກິດສັງຄົມ

 

แชร์