ລັດຖະບານ ກ່າວຍ້ອງຍໍຊົມເຊີຍຕໍ່ຜົນງານຂອງຫົວເຫວີຍ

 ໂອກາດທີ່ທ່ານ ເພັດ ພົມພິພັກ, ລັດຖະມົນຕີ, ຫົວໜ້າຫ້ອງວ່າການສຳນັກງານນາຍົກລັດຖະມົນຕີໄດ້ຕ້ອນຮັບການເຂົ້າຢ້ຽມຂໍ່ານັບຂອງທ່ານ ຫູ ເຫວີຍຫົວ ປະທານບໍລິສັດ ຫົວເຫວີຍ ປະຈຳລາວ ພ້ອມດ້ວຍຄະນະໃນວັນທີ 23 ກັນຍາ ຜ່ານມາ ທີ່ຫ້ອງວ່າການສຳນັກງານນາຍົກລັດຖະມົນຕີ, ທ່ານໄດ້ຕາງໜ້າໃຫ້ລັດຖະບານແຫ່ງ ສປປ ລາວ ກ່າວສະແດງຄວາມຍ້ອງຍໍ, ຊົມເຊີຍ ແລະຂອບໃຈຕໍ່ຜົນງານຂອງບໍລິສັດ ຫົວເຫວີຍ ທີ່ໄດ້ປະກອບສ່ວນສຳຄັນຕໍ່ກັບວຽກງານຫຼາຍຢ່າງຂອງລັດຖະບານ.

​ ໃນປີ 2020 ບໍລິສັດ ຫົວເຫວີຍ ໄດ້ໃຫ້ສະໜັບສະໜູນທາງດ້ານເຕັກນິກໄອທີໂດຍສະເພາະການປະກອບສ່ວນຕິດຕັ້ງລະບົບການປະຊຸມທາງໄກ ແລະອຸປະກອນຕ່າງໆ ຮັບໃຊ້ກອງປະຊຸມພົບປະລະຫວ່າງທ່ານນາຍົກລັດຖະມົນຕີ ແຫ່ງ ສປປ ລາວ ແລະທ່ານນາຍົກລັດຖະມົນຕີ ສປ ຈີນ ໃນວັນທີ 21 ກໍລະກົດ 2020 ລວມທັງການຮັບໃຊ້ກອງປະຊຸມຜູ້ນຳແມ່ນໍ້າຂອງ-ແມ່ນໍ້າລ້ານຊ້າງ ຄັ້ງທີ 3 ທີ່ ສປປ ລາວ ໄດ້ຮັບກຽດເປັນເຈົ້າພາບຈັດກອງປະຊຸມດັ່ງກ່າວໃນຮູບແບບກອງປະຊຸມທາງໄກເມື່ອວັນທີ 24 ສິງຫາ 2020 ໂດຍການເປັນປະທານຮ່ວມຂອງ ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ແລະ ທ່ານ ຫຼີ ເຄີ້ສຽງ, ນາຍົກລັດຖະມົນຕີ ແຫ່ງ ສປ ຈີນ ພາຍໃຕ້ຄໍາຂວັນ: “ເພີ່ມທະວີການຮ່ວມມືເພື່ອຄວາມສົມບູນພູນສຸກຮ່ວມກັນ (Enhancing Partnership for Shared Prosperity) ໂດຍມີ ທ່ານ ສົມເດັດ ອັກຄະມະຫາເສນາບໍດີ ເຕໂຈ ຮຸນເຊນ, ນາຍົກລັດຖະມົນຕີ ແຫ່ງຣາຊະອານາຈັກກໍາປູເຈຍ, ທ່ານ ເຫວີນ ມິນ, ປະທານາທິບໍດີພະມ້າ, ທ່ານ ປະຍຸດ ຈັນໂອຊາ, ນາຍົກລັດຖະມົນຕີ ແຫ່ງ ຣາຊະອານາຈັກໄທ ແລະທ່ານ ຫງຽນ ຊວນຟຸກ, ນາຍົກລັດຖະມົນຕີ ແຫ່ງ ສສ ຫວຽດນາມ ເຂົ້າຮ່ວມ. ທ່ານ ເພັດ ພົມພິພັກ ຍັງໄດ້ຍ້ອງຍໍຫົວເຫວີຍທີ່ມີຜົນງານໃນການປະກອບສ່ວນຕໍ່ສູ້ຕ້ານກັບໂລກລະບາດໃນໄລຍະທີ່ຜ່ານມາ.

​   ທ່ານ ເພັດ ພົມພິພັກ ຍັງໄດ້ມອບໃບຍ້ອງຍໍຂັ້ນລັດຖະບານໃຫ້ກັບ ທ່ານ ຫູ ເຫວີຍຫົວ ແລະກ່າວຂອບໃຈຕໍ່ການສະໜັບສະໜູນຂອງຫົວເຫວີຍໃນການປັບປຸງອຸປະ ກອນຮັບໃຊ້ຂອງຫ້ອງວ່າການສຳນັກງານນາຍົກລັດຖະມົນຕີໃຫ້ມີຄວາມວ່ອງໄວ, ທັນສະໄໝ ແລະມີຜົນສຳເລັດຕາມຄາດໝາຍທີ່ວາງໄວ້. ບໍລິສັດ ຫົວເຫວີຍ ເປັນບໍລິ ສັດນະວັດຕະກໍາໄອຊີທີຊັ້ນນຳຂອງໂລກ ແລະຫວັງວ່າຫົວເຫວີຍປະຈໍາລາວຈະຍັງນໍາເອົາເທັກໂນໂລຢີທີ່ທັນສະໄໝມາປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງ ສປປ ລາວ ນັບມື້ຫຼາຍຂຶ້ນ.

-----------

ໜັງສືພິມເສດຖະກິດ-ສັງຄົມ

• 30/09/2020