ວັນທີ 26-27 ກັນຍາ 2020 ທີ່ໂຮງແຮມຫົງຄໍາເຊກອງ, ສະມາຄົມການເງິນຈຸລະພາກ (ສມກຈ) ຮ່ວມກັບສະຖາບັນການເງິນຈຸລະພາກທີ່ຮັບເງິນຝາກ (ສກຈຮ) ຈໍາປາສັກຈໍາກັດໜ່ວຍບໍລິການແຂວງເຊກອງໄດ້ຈັດຝຶກອົບຮົມໃນຫົວຂໍ້ “ຄວາມຮູ້ພື້ນຖານທາງດ້ານການເງິນ “ເພື່ອສ້າງຄວາມເຂັ້ມແຂງໃຫ້ແກ່ລູກຄ້າໃນການບໍລິຫານການເງິນ ແລະ ນໍາໃຊ້ເງິນໃຫ້ມີປະສິດທິຜົນຊຶ່ງເຂົ້າຮ່ວມໃນຊຸດຝຶກອົບຮົມຄັ້ງນີ້ມີທ່ານ ໜູເຄືອບ ສິດທິເດດ ຜູ້ອໍານວຍການ ສກຈຮ ຈໍາປາສັກ ຈໍາກັດ, ທ່ານ ນາງ ປະ ມວນ ເພັດທານີ ຜູ້ອໍານວຍການ ສມກຈ, ພ້ອມດ້ວຍວິຊາການກ່ຽວຂ້ອງແລະຜູ້ຕາງໜ້າສະມາຊິກ ສກຈຮ ເກືອບ 30 ຄົນເຂົ້າຮ່ວມ.
   ການຝຶກອົບຮົມຄັ້ງນີ້ປະກອບມີຫົວຂໍ້ທີ່ໜ້າສົນໃຈເປັນຕົ້ນແມ່ນ: ນິຍາມເປັນຫຍັງຈຶ່ງມີຄວາມຮູ້ພື້ນຖານທາງດ້ານການເງິນ; ຄວາມຮູ້ພື້ນຖານທາງດ້ານການເງິນຄືຫຍັງ;ອົງປະກອບທີ່ສໍາຄັນຂອງຄວາມຮູ້ພື້ນຖານທາງດ້ານການເງິນມີຫຍັງແດ່; ການຫາລາຍໄດ້; ການບໍລິຫານລາຍຈ່າຍ; ການທ້ອນເງິນ-ເປັນຫຍັງຈຶ່ງຈໍາເປັນຕ້ອງທ້ອນເງິນ;ການບໍລິຫານຄວາມສ່ຽງ;ການລົງທຶນ (ການກູ້ຢືມ VS ເງິນທ້ອນຂອງຕົນເອງ+ ການກູ້ຢືມແບບມີຄວາມຮັບຜິດຊອບ) ແລະຄວາມຮູ້ພື້ນຖານໃນການເຮັດທຸລະກິດ.
  ທ່ານ ໜູເຄືອບ ສິດທິເດດ ກ່າວວ່າ: ສໍາລັບໂຄງການໆຝຶກອົບຮົມຄວາມຮູ້ພື້ນຖານທາງດ້ານການເງິນທາງ ສກຈຮ ຈໍາປາສັກຈໍາກັດໄດ້ຈັດມາແລ້ວ 3 ຄັ້ງ ແລະສໍາລັບຢູ່ແຂວງເຊກອງເປັນຄັ້ງທໍາອິດໂດຍຈຸດປະສົງແມ່ນເພື່ອແນໃສ່ສ້າງຄວາມເຂັ້ມແຂງໃຫ້ແກ່ລູກຄ້າໃນການບໍລິຫານການເງິນ ແລະ ການນໍາໃຊ້ເງິນໃຫ້ດີຂຶ້ນໂດຍສະເພາະການນໍາໃຊ້ເງິນ, ການອອມເງິນ, ການປະຊາສໍາພັນດ້ານການເງິນ, ການພັດທະນາທຸລະກິດຄອບຄົວ ແລະວິທີການສ້າງແຜນ-ການຂຽນ ແຜນທຸລະກິດ.

___________

ຂ່າວ: ສັນຍາ, ຮູບພາບ: #ຫນັງສືພິມເສດຖະກິດສັງຄົມ

แชร์