ຕະຫຼາດລົດຈີນຟື້ນໂຕຫຼັງຈາກໂຄວິດ

   ຕະຫຼາດລົດໃນ ສປ ຈີນ ຟື້ນຕົວຫຼັງຈາກໂຄວິດ-19 ແຜ່ລະບາດຊຶ່ງລົດພະລັງງານໄຟຟ້າມາແຮງຍ້ອນລັດຖະບານອຸດໜູນ.

  ຕາມຂ່າວຕ່າງປະເທດລາຍງານວ່າຕະຫຼາດລົດໃນຈີນຟື້ນຕົວຢ່າງວ່ອງໄວໂດຍຍອດຂາຍໃນເດືອນສິງຫາທີ່ຜ່ານມາເພີ່ມຂຶ້ນ 11,6%ເມື່ອທຽບກັບໄລຍະເວລາດຽວກັນຂອງປີ 2018 ແລະເພີ່ມຂຶ້ນເປັນຄັ້ງທີ 5 ຫຼັງຈາກກ່ອນໜ້ານີ້ທີ່ມີການແຜ່ລະບາດຂອງເຊື້ອພະຍາດໂຄວິດ-19 ຢ່າງຮຸນແຮງຈົນລັດຖະບານຈີນຕ້ອງໃຊ້ມາດຕະການປິດເມືອງ, ໂດຍສະເພາະລົດພະລັງງານໃໝ່ (ພະລັງງານໄຟຟ້າ) ຍອດຂາຍໃນເດືອນສິງຫາເພີ່ມຂຶ້ນເກືອບ 26% ເມື່ອທຽບກັບໄລຍະເວລາດຽວກັນຂອງປີ 2018 ຊຶ່ງລັດຖະບານຈີນມີມາດຕະການອຸດໜູນເພື່ອຈູງໃຈໃຫ້ປະຊາຊົນຫັນມາໃຊ້ລົດພະລັງງານໄຟຟ້າສ່ວນຍອດຂາຍລົດສ່ວນບຸກຄົນເພີ່ມຂຶ້ນ 8,9% ເຕີບໂຕວ່ອງໄວທີ່ສຸດນັບຕັ້ງແຕ່ພຶດສະພາປີ 2017.

   ທັງນີ້ຈີນກຳລັງມີການຈັດງານມໍເຕີໂຊຢູ່ນະຄອນຫຼວງປັກກິ່ງລະຫວ່າງວັນທີ 26 ກັນຍາເຖິງວັນທີ 5 ຕຸລາປີ 2020 ຊຶ່ງເລື່ອນມາຈາກເດືອນເມສາ 2020 ເນື່ອງຈາກໃນເວລານັ້ນທາງການຈີນຍັງເຂັ້ມງວດດ້ານການຄວບຄຸມພະຍາດລະບາດ.

--------------

ໜັງສືພິມ ເສດຖະກິດ-ສັງຄົມ

แชร์