ຫົວເຫວີຍແຊງໜ້າຊຳຊຸງຂຶ້ນເປັນຜູ້ຈຳໜ່າຍສະມາດໂຟນອັນດັບ 1 ຂອງໂລກ

  Canalys ບໍລິສັດວິເຄາະຂໍ້ມູນຕະຫຼາດໄດ້ເປີດເຜີຍຂໍ້ມູນວ່າເປັນຄັ້ງທຳອິດທີ່ Huawei ໄດ້ມີຍອດສົ່ງອອກສະມາດໂຟນທົ່ວໂລກຕໍ່ໄຕມາດສູງກວ່າຜູ້ຈຳໜ່າຍແບຣນອື່ນໆ ໂດຍແຊງໜ້າ Samsung ຂຶ້ນເປັນຜູ້ຈັດຈຳໜ່າຍສະມາດໂຟນລາຍໃຫຍ່ທີ່ສຸດໃນໄຕມາດ 2 (ເມສາ-ມິຖຸນາ) ປະຈຳປີ 2020 ທີ່ຜ່ານມາ.

  ຢ່າງໃດກໍດີ Huawei ອາດຈະບໍ່ໄດ້ຄອງຕຳແໜ່ງນີ້ໃນໄລຍະຍາວໂດຍທາງ Canalys ໄດ້ເປີດເຜີຍຕົວເລກທີ່ໜ້າສົນໃຈໃນຊ່ວງທີ່ເກີດໂຄວິດ-19 ນີ້ວ່າ Huawei ມີຍອດສົ່ງອອກ 55.8 ລ້ານເຄື່ອງ ຊຶ່ງຫຼຸດລົງຈາກຊ່ວງດຽວກັນເມື່ອປີ 2019 ປະມານ 5% ຊຶ່ງມີຍອດຈຳໜ່າຍສ່ວນໃຫຍ່ໃນ ສປ ຈີນ ທີ່ບໍ່ໄດ້ຮັບຜົນກະທົບຈາກວິ ກິດໂຄວິດ-19 ຢ່າງຮຸນແຮງເມື່ອປຽບທຽບກັບຄູ່ແຂ່ງທີ່ສຳຄັນຄື Samsung ທີ່ມີຍອດສົ່ງອອກ 53.7 ລ້ານເຄື່ອງ (ຫຼຸດລົງ 30%) ຊຶ່ງເນັ້ນໄປທີ່ຕະຫຼາດໃນປະເທດຫຼັກໆຫຼາຍກວ່າໃນຈີນແມ່ນວ່າມີຍອດຈຳໜ່າຍໜ້າປະທັບໃຈແຕ່ Huawei ນັ້ນເລີ່ມຈະປະສົບບັນຫາການຈຳໜ່າຍສະມາດໂຟນໃນປະເທດອື່ນໆ ນອກຈາກປະ ເທດຈີນເນື່ອງຈາກບໍ່ສາມາດຮອງຮັບບໍລິການ GMS(Google Mobile Services ເຊັ່ນ Chrome, YouTube ຫຼື Gmail ເປັນຕົ້ນ)ແລະອາດເຮັດໃຫ້ຍອດສົ່ງອອກ ແລະຈຳໜ່າຍຂອງ Huawei ໃນຊ່ວງຕໍ່ໄປຫຼຸດລົງ.

   ນອກຈາກນີ້ທາງ Samsung ຍັງໄດ້ກ່າວວ່າຈະມີຍອດຈຳໜ່າຍໃນໄຕມາດທີ 3 ເພີ່ມຫຼາຍຂຶ້ນຈາກການເປີດໂຕສະມາດໂຟນເຮືອທຸງລຸ້ນໃໝ່ແຕ່ເຖິງຢ່າງນັ້ນດ້ວຍຍອດຈຳໜ່າຍອັນມະຫາສານຂອງໃນປະເທດຈີນກໍຍັງເຮັດໃຫ້ Huawei ເປັນຜູ້ຈັດຈຳໜ່າຍໃນລະດັບຕົ້ນໆຂອງໂລກໄດ້ຢູ່ເໝືອນກັນ.

 

แชร์