ອພສ ເມືອງໄຊເສດຖາ ສໍາເລັດການເລືອກຄະນະຊຸດໃໝ່

  ກອງປະຊຸມໃຫຍ່ສະໄໝທີ VIII ຂອງອົງການພຸດທະສາດສະໜາສໍາພັນລາວ (ອພສ) ເມືອງໄຊເສດຖາ, ແຂວງອັດຕະປື ໄດ້ຈັດຂຶ້ນຢູ່ສະໂມສອນຫອ້ງວ່າການເມືອງໃນວັນທີ 28 ກັນຍາ 2020 ໂດຍມີພະອາຈານໃຫຍ່ຫຼັກ ຄຳສີສະຫວາດ ເທບວົງສາ ກຳມະການສູນກາງອົງການພະພຸດທະສາສະໜາສຳພັນລາວປະທານ ອພສ ແຂວງອັດຕະປື,ມີພະອາຈານສົມຊາຍ ພົມແກ່ນທ້າວ ປະທານ ອພສ ເມືອງ,ມີທ່ານ ສີໄລ ສີສະແຫວງສຸກ ເລຂາພັກເມືອງເຈົ້າເມືອງໄຊເສດຖາ,ມີອໍານາດການປົກຄອງບ້ານ, ເຖົ້າແກ່ແນວໂຮມ, ເຈົ້າຄະນະສົງເຈົ້າອະທິການວັດເຂົ້າຮ່ວມ 43 ອົງ ທີ່ເປັນຕົວແທນໃຫ້ແກ່ພະສົງສຳມະເນນພາຍໃນເມືອງ 284 ອົງ.

  ໃນກອງປະຊຸມພະອາຈານ ວີໃນ ໄຊສີເນືອງ ຄະນະ ອພສ ເມືອງໄຊເສດຖາ ໄດ້ຜ່ານບົດສະຫຼຸບການເຄື່ອນໄຫວວຽກງານພຸດທະສາດສະໜາສຳພັນລາວໄລຍະ 5 ປີ ຜ່ານມາແຕ່ປີ 2015-2020 ແລະທິດທາງແຜນການ 5 ປີຕໍ່ໜ້າ, ຊຶ່ງໄດ້ຍົກໃຫ້ເຫັນດ້ານຕັ້ງໜ້າໃນການປະຕິບັດຫຼັກທຳມະວິໄນໄດ້ກຳນົດໄວ້ ແລະມີບາດກ້າວຂະ ຫຍາຍຕົວຕໍ່ເນື່ອງ, ປະຈຸບັນທົ່ວເມືອງໄຊເສດຖາ ມີ 27 ວັດ, ມີພະສົງສຳມະເນນ 284 ອົງ, ມີໂຮງຮຽນມັດທະຍົມຕອນຕົ້ນສົງ 1 ແຫ່ງ, ມີນັກຮຽນ 127 ອົງ ໄລຍະຜ່ານມາອີງໃສ່ຄວາມເຫຼື້ອມໃສສັດທາຂອງພະພຸດທະສາດສະໜາສານິກະຊົນ ແລະມີຄວາມສາມັກຄີລະຫວ່າງຄູບາອາຈານກັບອອກຕົນຍາດໂຍມອົງການຈັດຕັ້ງພັກ-ລັດ ນຳພາປະຊາຊົນລາວບັນດາເຜົ່າສ້າງສາພັດທະນາປະຕິສັງຂອນວັດວາອາຮາມໃຫ້ມີຄວາມຮຸ່ງເຮືອງຂຶ້ນເລື້ອຍໆ.

  ກອງປະຊຸມຄັ້ງນີ້ບັນດາຜູ້ແທນໄດ້ຮັບຟັງການປະກອບຄຳເຫັນກ່ຽວກັບການເຕົ້າໂຮມຄວາມສາມັກຄີການຄຸ້ມຄອງສາດສະໜາຈາກອົງການແນວລາວສ້າງຊາດ ແລະຫ້ອງການພາຍໃນເມືອງ, ໃນກອງປະຊຸມພາຍຫຼັງທີ່ຄະນະ ອພສ ເມືອງຊຸດເກົ່າກ່າວລາຕຳແໜ່ງໜ້າທີ່ແລ້ວ, ໄດ້ຜ່ານເງື່ອນໄຂມາດຖານເຈົ້າຄະນະສົງຊຸດໃໝ່, ຊຶ່ງມີ 7 ອົງ ແລະກອງປະຊຸມໄດ້ຮັບຮອງເອົາພະອາຈານ ສົມຊາຍ ພົມແກ່ນທ້າວ ເປັນປະທານ ອພສ ເມືອງຊຸດໃໝ່ອີກ 1 ສະໄໝພະອາຈານ ວີໃນ ໃຊສີເນືອງ ເປັນຮອງ, ພະອາຈານ ຄຳມົນ ສິດທິຮັກປັນຍາ ເປັນຮອງ, ພະອາຈານ ຄຳປ່ຽນ ພົມພັກດີ ເປັນຮອງປະທານ, ພະອາຈານ ພົງສຳພັນ ແກ້ວວົງສາ ເປັນກຳມະການ, ພະອາຈານ ສຸພະໄກສອນເສນາ ເປັນກຳມະການ ແລະພະອາຈານ ບົວຜັນ ຊ້ວຍສຸວັນ ເປັນກຳມະການ.

 

แชร์