ສຳເລັດການຝຶກອົບຮົມຄູສອນຊ່ວຍວິຊາພາລະສຶກສາ

   ວັນທີ 24 ກັນຍາ ຜ່ານມາທີ່ຫ້ອງປະຊຸມຫ້ອງການສຶກສາທິການ ແລະກີລາເມືອງຄົງເຊໂດນແຂວງສາລະວັນໄດ້ສຳເລັດການຈັດກອງປະຊຸມຝຶກອົບຮົມຄູສອນຊ່ວຍວິຊາພາລະສຶກສາ 3 ເມືອງຄື ເມືອງຄົງເຊໂດນ, ວາປີ ແລະ ລະຄອນເພັງ ໂດຍເປັນກຽດເຂົ້າຮ່ວມຂອງທ່ານ ວັດທະນາ ໜັ້ນວິໄລ ຮອງຫົວໜ້າພະແນກສຶກສາທິການ ແລະກີລາ, ທ່ານ ຈະເລີນ ພັນຈັນ ຮອງຫົວໜ້າຫ້ອງການສຶກສາທິການ ແລະກີລາເມືອງຄົງເຊໂດນ ແລະພາກສ່ວນທີ່ກ່ຽວຂ້ອງເຂົ້າຮ່ວມ.

   ທ່ານ ວັດທະນາ ໜັ້ນວິໄລ ຮອງຫົວໜ້າພະແນກສຶກສາທິການ ແລະກີລາໄດ້ສະແດງຄວາມຊົມເຊີຍຕໍ່ຄູສອນຊ່ວຍວິຊາພະລະສຶກສາທີ່ໄດ້ປະຕິບັດການສອນຢ່າງຫ້າວ ຫັນ ແລະເອົາໃຈໃສ່ໃນການສິດສອນ ຊຶ່ງໄດ້ຍົກໃຫ້ເຫັນວຽກງານທີ່ຂະແໜງພາລະສິລະປະສຶກສາໄດ້ຈັດຕັ້ງປະ ຕິບັດອັນຕົ້ນຕໍມີ 5 ໜ້າວຽກຄື: ວຽກງານພາລະສຶກສາ (ການຮຽນ-ການສອນ) ແລະການເຄື່ອນໄຫວກີລາໃນໂຮງຮຽນ, ວຽກງານສິລະປະສຶກສາ (ການ ຮຽນ-ການສອນ) ແລະການເຄື່ອນໄຫວສີລະປະ-ວັນນະຄະດີ, ວຽກ ງານສຶກສາວິຊາປ້ອງກັນຕົວນັກຮຽນ ມ5-ມ7 ວຽກງານການສະກັດກັ້ນ ແລະຕ້ານສິ່ງເສບຕິດໃນໂຮງຮຽນ, ການຂຽນຫຼັກສູດທ້ອງຖິ່ນພ້ອມກັນນັ້ນທ່ານກໍ່ໄດ້ເນັ້ນໃຫ້ຄູຕ້ອງເອົາໃຈໃສ່ໃນການປະຕິບັດຫຼັກສູດການຮຽນ-ການສອນໃຫ້ຄົບຖ້ວນປະຕິບັດ 3 ຂໍ້ແຂ່ງຂັນຂອງຂະແໜງການສຶກສາ-ກີລາເປັນຕົ້ນແມ່ນສອນດີ-ຮຽນເກັ່ງ, ຕ້ານ ແລະສະກັດກັ້ນປາກົດການຫຍໍ້ທໍ້ໃນຂະແໜງການສຶກສາ-ກີລາ, ສ້າງສະພາບແວດລ້ອມໃຫ້ເປັນສີຂຽວ, ພ້ອມທັງ 5 ຫຼັກມູນການສຶກສາໂດຍຕິດພັນກັບການສິດສອນຂອງຄູຄື: ຄຸນສົມບັດສຶກສາ, ປັນຍາສຶກສາ, ແຮງງານສຶກສາ, ພາລະສຶກສາ ແລະສິລະປະສຶກສາ.

   ສໍາລັບການຝຶກອົບຮົມຄັ້ງນີ້, ນັກສຳມະນາກອນໄດ້ຮຽນຮູ້ຈາກວິທະຍາກອນຂັ້ນແຂວງຊຶ່ງມາຈາກຂະແໜງກີລາມວນຊົນ, ຂະແໜງກີລາລະດັບສູງ ແລະຂະແໜງພາລະສິລະປະສຶກສາໃນຫົວຂໍ້ກ່ຽວກັບການຈັດການຮຽນ-ການສອນວິຊາພາລະສຶກສາ (ທັງພາກທິດສະດີ ແລະພາກປະຕິບັດຕົວຈິງ), ການຈັດການແຂ່ງຂັນກີລາໃນໂຮງຮຽນ, ໜ້າທີ່ຄູຝຶກ ແລະກໍາມະການຕັດສິນ, ການຮຽນ-ການສອນຄູຝຶກ ແລະກຳມະການ.

 

แชร์