ສປງ ສະຫຼຸບວຽກງານ 9 ເດືອນ

  ສໍານັກງານປົກປ້ອງເງິນຝາກ (ສປງ) ໄດ້ຕັ້ງຈັດພິທີສະຫຼຸບການເຄື່ອນໄຫວວຽກງານ 9 ເດືອນຂອງປີ 2020 ແລະເນື່ອງໃນໂອກາດວັນສ້າງຕັ້ງ ສປງ ຄົບຮອບ 21 ປີ (ວັນທີ 23 ກັນຍາ 1999-ວັນທີ 23 ກັນຍາ 2020) ຂຶ້ນໃນວັນທີ 25 ກັນຍາຜ່ານມາທີ່ສະຖາບັນການທະນາຄານທະນາຄານແຫ່ງ ສປປ ລາວ (ທຫລ) ໂດຍການໃຫ້ກຽດເຂົ້າຮ່ວມຂອງທ່ານ ພຸດທະໄຊ ສີວິໄລ ກໍາມະການປະຈໍາພັກ, ຮອງຜູ້ວ່າການ ທຫລ, ປະທານສະພາບໍລິຫານ ສປງ; ທ່ານ ນາງ ແສງດາວວີ ວົງຄໍາຊາວ ກໍາມະການພັກ ທຫລ, ຫົວໜ້າ ສປງ ແລະມີຄະນະກໍາມະການສະພາບໍລິຫານ, ຄະນະ ສປງ-ຄະນະກົມພາຍໃນ ທຫລ, ຜູ້ຕາງໜ້າທະນາຄານທຸລະກິດກ່ວາ 40 ແຫ່ງ ແລະພາກສ່ວນກ່ຽວຂ້ອງເຂົ້າຮ່ວມ 100 ທ່ານ.

 ໃນພິທີອັນມີຄວາມໝາຍ ແລະສໍາຄັນນີ້; ທ່ານ ນາງ ແສງດາວວີ ວົງຄໍາຊາວ ຫົວໜ້າ ສປງ ໄດ້ຍົກໃຫ້ເຫັນຜົນງານການເຄື່ອນໄຫວໃນຕະຫຼອດ 21 ປີ ຜ່ານມາໂດຍສະເພາະ 9 ເດືອນຂອງປີ 2020 ໂດຍພາຍໃຕ້ການຊີ້ນໍາ-ນໍາພາຢ່າງໃກ້ຊິດຈາກຄະນະພັກ-ຄະນະຜູ້ວ່າການ ທຫລ ກໍ່ຄືສະພາບໍລິຫານ, ສປງ ມີຄວາມເຕີບໃຫຍ່ຂະ ຫຍາຍຕົວທາງດ້ານປະລິມານ ແລະຄຸນນະພາບຈາກການປະຕິບັດໜ້າທີ່ການເມືອງຂອງຕົນທີ່ໄດ້ຮັບການມອບໝາຍຊຶ່ງສະແດງໃຫ້ເຫັນຜົນງານທີ່ພົ້ນເດັ່ນຫຼາຍດ້ານເຊັ່ນໄດ້ສໍາເລັດການປັບປຸງແຜນຍຸດທະສາດໄລຍະ 10 ປີ 2016-2025 ແລະວິໄສທັດຮອດປີ 2030 ເຂົ້າໃນແຜນຍຸດທະສາດລວມຂອງຂະແໜງການເງິນ-ເງິນຕາຂອງ ສປປ ລາວ, ສໍາເລັດການສ້າງ ແລະອອກນິຕິກໍາຈໍານວນໜຶ່ງເພື່ອຮັບໃຊ້ການເຄື່ອນໄຫວວຽກງານປົກປ້ອງເງິນຝາກເປັນຕົ້ນອອກຕົກລົງວ່າດ້ວຍອັດຕາເບ້ຍປະກັນເງິນຝາກ, ຂໍ້ຕົກລົງວ່າດ້ວຍວົງເງິນປົກປ້ອງໄດ້ປັບຈາກ 3 ສະກຸນເງິນ ( 28 ລ້ານກີບ, 36 ພັນບາດ ແລະ 1.200 ໂດລາສະຫະລັດ) ມາເປັນລວມທຸກສະກຸນເງິນ ທຽບເທົ່າກີບ 50 ລ້ານກີບຕໍ່ຜູ້ຝາກເງິນໜຶ່ງລາຍຕໍ່ສະມາຊິກໜຶ່ງແຫ່ງ; ແຈ້ງການແນະນໍາວິທີການຄິດໄລ່ ແລະການຈ່າຍເບ້ຍປະກັນເງິນຝາກ; ຄໍາແນະນໍາກ່ຽວກັບການຄຸ້ມຄອງ ແລະຢັ້ງຢືນການເປັນສະມາຊິກ ສປງ; ນອກນີ້ຍັງໄດ້ອອກຂໍ້ຕົກລົງວ່າດ້ວຍການຮັບເອົາທະນາຄານ ໄຕ້ຫວັນ ໂຄໂອເປີເຣທີບ ຈໍາກັດ ສາຂານະຄອນຫຼວງວຽງຈັນ ເຂົ້າເປັນສະມາຊິກທີ 41 ຂອງ ສປງ ແລະໄດ້ອອກຂໍ້ຕົກລົງວ່າດ້ວຍການຮັບເອົາສະຖາບັນການເງິນຈຸລະພາກທີ່ຮັບເງິນຝາກປະຕູຄໍາເຂົ້າເປັນສະມາຊິກແຫ່ງທໍາອິດຂອງ ສປງ. ດ້ານວຽກງານໂຄສະນາ ສປງ ສໍາເລັດການຄົ້ນຄວ້າ ແລະພັດທະນາເວັບໄຊທ໌ ພ້ອມທັງກະກຽມຂໍ້ມູນຂ່າວສານເພື່ອເຜີຍແຜ່ລົງເວັບໄຊທ໌ຂອງ ສປງ ແລະຄາດຄະເນວ່າຈະເຜີຍແຜ່ສູ່ສັງຄົມໃນຕົ້ນປີ 2021.

   ພ້ອມດຽວກັນນັ້ນ; ໃນໂອກາດພິທີສະເຫຼີມສະຫຼອງວັນສ້າງຕັ້ງ ສປງ ຄົບຮອບ 21 ປີ, ທ່ານຫົວໜ້າ ສປງ ຍັງໄດ້ໃຫ້ກຽດມອບໃບຢັ້ງຢືນການເປັນສະມາຊິກຄືນໃໝ່ໃຫ້ແກ່ສະມາຊິກທີ່ເປັນທະນາຄານທຸລະກິດຂອງ ສປງ ຈໍານວນ 41 ແຫ່ງ ເພື່ອປ່ຽນແທນໃນຢັ້ງຢືນເກົ່າພາຍຫຼັງ ສປງ ໄດ້ປະກາດນໍາໃຊ້ສັນຍາລັກໂລໂກ້ຂອງຕົນຢ່າງເປັນທາງການຊຶ່ງໂລໂກ້ທີ່ສະແດງຢູ່ໃບຢັ້ງຢືນກາຍເປັນສັນຍາລັກບົ່ງບອກວ່າທະນາຄານທຸລະກິດ ຫຼື ສະຖາບັນການເງິນຈຸນລະພາກທີ່ຮັບເງິນຝາກນັ້ນເປັນສະມາຊິກທີ່ຖືກຕ້ອງຕາມລະບຽບການຂອງ ສປງ. ສະນັ້ນ, ຜູ້ຝາກເງິນສາມາດສັງເກດໄດ້ຢູ່ບໍລິເວນປ່ອງບໍລິການລູກຄ້າຂອງທະນາຄານທຸລະກິດ ແລະ ສະຖາບັນການເງິນຈຸນລະ ພາກທີ່ຮັບເງິນຝາກດັ່ງກ່າວ.

  ພິເສດໃນຕອນທ້າຍຂອງພິທີໃນຄັ້ງນີ້, ໄດ້ຮັບຟັງການໂອ້ລົມຈາກທ່ານ ພຸດທະໄຊ ສີວິໄລ ຊຶ່ງທ່ານໄດ້ກ່າວສະແດງຄໍາຍ້ອງຍໍ-ຊົມເຊີຍຕໍ່ຜົນງານໃນຫຼາຍໆດ້ານທີ່ ສປງ ຍາດມາໄດ້ໃນຜ່ານມາຊຶ່ງເຫັນວ່າກົງຈັກການຈັດຕັ້ງ, ຖານະການເງິນມີການປັບປຸງ ແລະ ພັດທະນາເທື່ອລະກ້າວ, ການສະສົມຄັງປົກປ້ອງມີການເຕີບໃຫຍ່ຂະຫຍາຍຕົວຂຶ້ນເລື້ອຍໆ ແລະການຮ່ວມມືສາກົນທັງໃນກອບສອງຝ່າຍ ແລະຫຼາຍຝ່າຍໄດ້ມີການພົວພັນຢ່າງກວ້າງຂວາງ.

   ຢ່າງໃດກໍຕາມເມື່ອທຽບໃສ່ຄວາມຮຽກຮ້ອງຕ້ອງການຂອງວຽກງານກໍຄືອີງໃສ່ສະພາບເສດຖະກິດປະຈຸບັນ ສປງ ຕ້ອງໄດ້ຕັ້ງໜ້າບຸກບືນຢ່າງແຂງແຮງກວ່າເກົ່າ, ໃນນີ້ ຕ້ອງນໍາພາການເມືອງແນວຄິດໃຫ້ແກ່ພະນັກງານຢ່າງໜັກແໜ້ນ, ມີສະຕິຕໍ່ລະບຽບວິໄນ ແລະປະຕິບັດຫຼ້ອນໜ້າທີ່ຂອງຕົນ, ດ້ານວຽກງານວິຊາສະເພາະແມ່ນຕ້ອງເປີດກວ້າງຮັບສະຖາບັນການເງິນທີ່ຮັບເອົາເງິນຝາກເຂົ້າເປັນສະມາຊິກ;ເພີ່ມການປະສານສົມທົບບັນດາກົມກ່ຽວຂ້ອງຂອງ ທຫລ ເພື່ອເກັບ ກໍາສະພາບຂອງສະມາຊິກ. ພ້ອມນີ້, ໃນອະນາຄົດຕ້ອງຄົ້ນຄວ້າກົນໄກການເກັບເບ້ຍປະກັນເງິນຝາກຕາມປະເພດຄວາມສ່ຽງຄຽງຄູ່ກັນກັບການຖອດຖອນບົດຮຽນຈາກຫຼາຍໆປະເທດທີ່ມີລະບົບປະ ກັນໄພເງິນຝາກທີ່ກ້າວໜ້າ ແລະສືບຕໍ່ເພີ່ມການໂຄສະນາວຽກງານປົກປ້ອງເງິນຝາກໃຫ້ສັງຄົມໄດ້ຮັບຮູ້ຢ່າງກວ້າງຂວາງ ແລະທົ່ວເຖິງ.  

------------

ຂ່າວ: ຣັດສະໝີ ດວງສັດຈະ      

ຮູບພາບ: #ຫນັງສືພິມເສດຖະກິດສັງຄົມ

แชร์