ໂຮງຮຽນພອນສະຫວັນ ໄດ້ຮັບອຸປະກອນການຮຽນ

  ພິທີມອບອຸປະກອນການຮຽນ-ການສອນຈໍານວນໜຶ່ງໃຫ້ໂຮງຮຽນພອນສະຫວັນ ແຂວງຊຽງຂວາງ, ຊຶ່ງມອບໂດຍຫ້ອງວ່າການແຂວງຊຽງຂວາງມີຂຶ້ນໃນອາທິດຜ່ານມາທີ່ໂຮງຮຽນດັ່ງກ່າວໂດຍໃຫ້ກຽດເຂົ້າຮ່ວມຂອງທ່ານນາງ ຈັນທະສອນ ພູນສຸກ ຮອງຫົວໜ້າຫ້ອງວ່າການແຂວງພ້ອມຄະນະ,ທ່ານ ທອງສີ ພັນທະວົງ ຮອງຫົວໜ້າພະແນກສຶກສາທິການ ແລະກີລາແຂວງ (ສກຂ), ມີຜູ້ອໍານວຍການໂຮງຮຽນພອນສະຫວັນພ້ອມຄະນະ ແລະຄູ-ອາຈານພາຍໃນໂຮງຮຽນເຂົ້າຮ່ວມ.

  ທ່ານ ນາງ ຈັນທະສອນ ພູນສຸກ ຮອງຫົວໜ້າຫ້ອງວ່າການແຂວງໄດ້ກ່າວລາຍງານໃຫ້ຮູ້ເຖິງຈຸດປະສົງເປົ້າໝາຍຂອງການນໍາເອົາອຸປະກອນການຮຽນ-ການສອນມາມອບໃຫ້ໂຮງຮຽນພອນສະຫວັນຄັ້ງນີ້ນອກຈາກເປັນການຊຸກຍູ້ສົ່ງເສີມຂະບວນການຮຽນ-ການສອນຂອງຄູ-ອາຈານ ແລະນັກຮຽນພາຍໃນໂຮງຮຽນພອນສະຫວັນໃຫ້ມີຄວາມເດີນແມ່ນແລ່ນສະດວກ ແລະມີຄວາມເຂັ້ມແຂງເທົ່າກັບໂຮງຮຽນແຫ່ງອື່ນໆແລ້ວຍັງເປັນການຕອບສະໜອງຕາມການຮ້ອງຂໍຂອງໂຮງຮຽນທີ່ມີຄວາມຈໍາເປັນນໍາໃຊ້ອຸປະກອນເຂົ້າໃນການຮຽນ-ການສອນ ໃນສົກຮຽນ 2020-2021, ເພາະສົກຮຽນນີ້ເປັນສົກຮຽນທໍາອິດທີ່ເລີ່ມເປີດການຮຽນ-ການສອນ ພາຍຫຼັງທີ່ມອບ-ຮັບອາ ຄານໂຮງຮຽນນໍາໃຊ້ເປັນທາງການໃນວັນທີ 12 ມີນາ 2020 ຜ່ານມາ,

  ເຖິງຢ່າງໃດກໍຕາມດ້ວຍຄວາມເປັນຫ່ວງເປັນໄຍຂອງຄະນະນໍາຂອງແຂວງຈຶ່ງໄດ້ບິແບ່ງເອົາອຸ ປະກອນຈໍານວນໜຶ່ງມາມອບໃຫ້ໂຮງຮຽນດັ່ງກ່າວເພື່ອປະກອບເຂົ້າໃນການຮຽນ-ການສອນໃຫ້ທ່ວງທັນກັບເວລາຊຶ່ງອຸປະກອນທີ່ນໍາມາມອບປະກອບມີ: ອຸປະກອນອະນາໄມທໍາຄວາມສະອາດຈໍານວນ 11 ລາຍການ, ອຸປະກອນອອກແຮງງານ 12 ລາຍການ, ອຸປະກອນຮັບໃຊ້ເຮືອນຄົວ 16 ລາຍການ ແລະອຸປະກອນຮັບໃຊ້ຫ້ອງການ 13 ລາຍການລວມມູນຄ່າທັງໝົດ 16.437,000 ກີບ (16ລ້ານກ່ວາກີບ),ມອບໃຫ້ຄູ-ອາຈານກໍຄືລູກຫຼານນັກຮຽນໂຮງຮຽນພອນສະຫວັນນໍາໃຊ້ເຂົ້າໃນການຮຽນ -ການສອນໃຫ້ຖືກຕ້ອງຕາມຈຸດປະສົງເປົ້າໝາຍ, ຄຸ້ມຄ່າເກີດຜົນປະໂຫຍດສູງສຸດ, ຫຼັງຈາກນັ້ນກໍໄດ້ມອບ-ຮັບເປັນທາງການ ໂດຍໃຫ້ກຽດກ່າວມອບຂອງ ທ່ານ ນາງ ຈັນທສອນ ພູນສຸກ ຮອງຫົວໜ້າຫ້ອງວ່າການແຂວງ ແລະກ່າວຮັບໂດຍ ທ່ານ ທອງສີ ພັນທະວົງ ຮອງຫົວໜ້າພະແນກສຶກສາທິການ ແລະກີລາແຂວງ.

   ໂອກາດດັ່ງກ່າວທ່ານ ທອງສີ ພັນທະວົງ ໄດ້ສະແດງຄວາມຂອບອົກຂອບໃຈ ແລະຮູ້ບຸນຄຸນເປັນຢ່າງສູງນໍາທ່ານ ນາງ ຈັນທະສອນ ພູສຸກ ທີ່ໄດ້ຕາງໜ້າໃຫ້ຄະນະນໍາຂອງແຂວງນໍາເອົາອຸປະກອນມາມອບໃຫ້ໂຮງຮຽນພອນສະຫວັນຄັ້ງນີ້ເປັນການຊ່ວຍຊຸກຍູ້ຂະບວນການຮຽນ-ການສອນໂຮງຮຽນພອນສະຫວັນໃຫ້ມີປະສິດທິພາບດີຂຶ້ນ, ຂໍໃຫ້ທາງໂຮງຮຽນຈົ່ງນໍາໃຊ້ອຸປະກອນເຫຼົ່ານັ້ນໃຫ້ເກີດດອກອອກຜົນ ແລະເກີດປະໂຫຍດສູງສຸດຫວັງ ແລະເຊື່ອວ່າໂອກາດໜ້າຈະໄດ້ຮັບການຊ່ວຍເຫຼືອຈາກຫ້ອງວ່າການແຂວງຕື່ມອີກ.

__________

ຂຽນໂດຍ: ຄານສີສະຫວັນ

ຮູບພາບ: #ຫນັງສືພິມເສດຖະກິດສັງຄົມ

แชร์