ທຄຕລ ຈັບມື ສກຈບ ວັນດາລາບໍລິການຊໍາລະສະສາງ

   ທະນາຄານການຄ້າຕ່າງປະເທດລາວມະຫາຊົນ (ທຄຕລ) ຮ່ວມມືກັບສະຖາບັນການເງິນຈຸລະພາກທີ່ບໍ່ຮັບເງິນຝາກ (ສກຈບ) ວັນດາລາກ່ຽວກັບການບໍລິການຊຳລະສະສາງຄ່າບໍລິການຕ່າງໆ ຜ່ານ ທຄຕລ (BILL PAYMENT)ຊຶ່ງ ໄດ້ຈັດຂຶ້ນໃນວັນທີ 25 ກັນຍາ 2019 ທີ່ຮ້ານອາຫານອິນທາວ ນະຄອນຫຼວງວຽງຈັນ ຕາງໜ້າເຊັນສັນຍາໃນຄັ້ງນີ້ມີ ທ່ານ ວຽງສຸກ ຈຸນທະວົງຮອງ ຜູ້ອໍານວຍການໃຫຍ່ ທຄຕລ ແລະ ທ່ານ ພອນໄຊ ວັນດາລາ ຜູ້ອໍານວຍການສະຖາບັນການເງິນຈຸລະພາກທີ່ບໍ່ຮັບເງິນຝາກວັນດາລາໂດຍການເຂົ້າຮ່ວມເປັນສັກຂີພິຍານຂອງຄະນະຜູ້ບໍລິຫານທັງສອງຝ່າຍ.


  ສັນຍາວ່າດ້ວຍການບໍລິການຊໍາລະຄ່າບໍລິການຜ່ານ ທຄຕລ (Bill Payment) ລະຫວ່າງ ທຄຕລ ແລະ ສກຈບ ວັນດາລາ ໃນຄັ້ງນີ້ກໍ່ເພື່ອອໍານວຍຄວາມ ສະດວກໃນການຊຳລະຄ່າບໍລິການຕ່າງໆ ຜ່ານ ທຄຕລ ເພື່ອເພີ່ມຊ່ອງທາງການໃຫ້ບໍລິການລູກຄ້າຂອງສະຖາບັນການເງິນວັນດາລາຜ່ານຫຼາຍຊ່ອງທາງຂຶ້ນຕື່ມໂດຍ ທຄຕລ ຈະໃຫ້ການບໍລິການຮັບຊໍາ ລະຄ່າບໍລິການຜ່ານເຄົາເຕີບໍລິການທົ່ວລະບົບທຄຕລ, ຜ່ານມືຖື Smartphone (BCEL One) ແລະ ຜ່ານ BCEL I-Bank.
  ການບໍລິການຊໍາລະຄ່າສາທາລະນຸປະໂພກຜ່ານລະບົບທະນາຄານ (ຫຼື Bill Payment) ຂອງ ທຄຕລ ໄດ້ເລີ່ມໃຫ້ບໍລິການທໍາອິດໃນປີ 2012 ແລະເປັນການບໍລິ ການທີ່ມີການຊົມໃຊ້ຫຼາຍ. ມາຮອດປະຈຸບັນ, ທຄຕລ ໄດ້ໃຫ້ບໍລິການ Bill Payment ຮ່ວມກັບຫຼາຍພາກສ່ວນໃນນັ້ນປະກອບມີການໃຫ້ບໍລິການຊຳລະຄ່າສາທາລະນຸປະໂພກພື້ນຖານເຊັ່ນ: ຊຳລະຄ່າໄຟຟ້າ, ນໍ້າປະປາ, ແລະຄ່າໂທລະສັບ, ຄ່າພາສີອາກອນ, ຄ່າສາຍເຊົ່າ, ບັດນໍ້າມັນ, ຄ່າບັດຂ້າມຂົວມິດຕະພາບລາວ-ໄທແຫ່ງທີ 1 ແລະຊຳລະຄ່າງວດເຊົ່າສິນເຊື່ອຊຶ່ງການບໍລິການ Bill Payment ທຄຕລ ໄດ້ພັດທະນາໃຫ້ສາມາດຊຳລະຜ່ານຫຼາຍຊ່ອງທາງຄື: ຜ່ານ ATM, BCEL One, i-Bank ແລະຜ່ານປ່ອງບໍລິການ ທຄຕລ. ຮອດທ້າຍເດືອນ 6/2020, ທຄຕລ ມີ ATM 400 ກວ່າຕູ້, ຜຸ້ລົງທະບຽນນໍາໃຊ້ BCEL One 400.000 ກວ່າ Users, i-Bank 16.000 ກວ່າ Users, ກວມເອົາຕົວເລກຜູ້ນຳໃຊ້ລະບົບຊຳລະແບບອີເລັກໂທຣນິກຫຼາຍທີ່ສຸດໃນລະບົບທະນາຄານພາຍໃນປະເທດ, ຖ້າ ຂະຫຍາຍການຊຳລະແບບອີເລັກໂທຣນິກອອກໄປໃຫ້ກວ້າງຂວາງເທົ່າໃດກໍ່ຈະເປັນການສ້າງເງື່ອນໄຂອຳນວຍຄວາມສະດວກໃຫ້ລູກຄ້າຂອງທະນາຄານໃນການຊົມໃຊ້ການບໍລິການຫຼາກຫຼາຍປະເພດເທົ່ານັ້ນ.
   ສກຈບ ວັນດາລາໄດ້ຮັບອະນຸຍາດສ້າງຕັ້ງຂຶ້ນຕາມໃບອະນຸຍາດດໍາເນີນທຸລະກິດເລກທີ 52/ກຄສງ, ລົງວັນທີ 13/08/2015 ຊຶ່ງມີສໍານັກງານໃຫຍ່ຕັ້ງຢູ່ຫຼັກ KM 45 ຖະໜົນ 13 ເໜືອ ບ້ານສີວິໄລ ເມືອງໂພນໂຮງ ແຂວງວຽງຈັນເບື້ອງຕົ້ນດໍາເນີນທຸລະກິດເປັນໂຮງຊວດຈໍາໃນປີ 2009 ເປັນຕົ້ນມາຍ້ອນເງື່ອນໄຂດັ່ງກ່າວຈຶ່ງເຮັດໃຫ້ການດໍາເນີນທຸລະກິດທາງດ້ານການເງິນດັ່ງກ່າວໄດ້ມີການພັດທະນາແບບຕໍ່ເນື່ອງ.
  ຕົກມາຮອດວັນທີ 29/10/2018 ສກຈບ ວັນດາລາໄດ້ຂະຫຍາຍສາຂາຕື່ມ 1 ສາຂາ ຢູ່ເມືອງວັງວຽງ ແຂວງວຽງຈັນ, ມາຮອດປະຈຸບັນມີພະນັກງານທັງໝົດ 16 ຄົນ, ການບໍລິການລູກຄ້າສ່ວນໃຫຍ່ຢູ່ໃນກຸ່ມຄ້າຂາຍຍ່ອຍທົ່ວໄປ, ຄອບຄົວຂອງພະນັກງານ, ທະຫານ, ຕໍາຫຼວດຈໍານວນໜຶ່ງທີ່ມີຄວາມຈໍາເປັນທາງດ້ານສິນເຊື່ອດອກ ເບ້ຍຕໍ່າ. ສະນັ້ນ, ເພື່ອອໍານວຍຄວາມສະດວກໃຫ້ແກ່ວຽກງານດັ່ງກ່າວນັ້ນ, ສກຈບ ວັນດາລາ ຈຶ່ງຮ່ວມມືກັບທາງ ທຄຕລ ເປີດການບໍລິການການຊໍາລະສະສາງຄ່າບໍລິການຕ່າງໆຜ່ານລະບົບ BILL PAYMENT ຂອງທະນາຄານດັ່ງກ່າວ.

--------------

ຂ່າວ: ຣັດສະໝີ ດວງສັດຈະ   

ຮູບພາບ: #ຫນັງສືພິມເສດຖະກິດສັງຄົມ

แชร์