ອັດຕະປື ຕີລາຄາວຽກບໍລິຫານການສຶກສາ

  ວັນທີ 25 ກັນຍາ ຜ່ານມາ ພະແນກສືກສາທິການ ແລະກີລາແຂວງອັດຕະປືໄດ້ໄຂກອງປະຊຸມຜູ້ບໍລິຫານການສຶກສາ ແລະກີລາທົ່ວແຂວງປະຈຳສົກຮຽນ 2019-2020 ແລະຜ່ານທິດທາງແຜນການປະຈຳສົກຮຽນ 2020-2021 ຂຶ້ນທີ່ຫ້ອງປະຊຸມພະແນກດັ່ງກ່າວ, ໂດຍໃຫ້ກຽດເຂົ້າຮ່ວມຊີ້ນໍາກອງປະຊຸມຂອງທ່ານ ອຸ່ນຫຼ້າ ໄຊຍະສິດ ຮອງເຈົ້າແຂວງອັດຕະປື, ມີຫົວໜ້າກົມແຜນການກະຊວງສຶກສາທິການ ແລະກີລາ, ພ້ອມດ້ວຍຄະນະຜູ້ບໍລິຫານການສຶກສາ ແລະກີລາທົ່ວແຂວງເຂົ້າຮ່ວມ.

  ທ່ານ  ຄຳພູນ ແກ້ວມາລາ ຫົວໜ້າພະແນກສຶກສາທິການ ແລະກີລາໄດ້ສະຫຼຸບການຈັດຕັ້ງປະຕິບັດການຮຽນ-ການສອນໃນໄລຍະຜ່ານມາ ໂດຍໄດ້ຍົກໃຫ້ເຫັນບັນດາວຽກຈຸດສຸມ, ນະໂຍບາຍ ແລະຍຸດທະສາດຕ່າງໆ ໂດຍສະເພາະໃນຈໍານວນ 15 ຄາດໝາຍຫຼັກຂອງແຜນ 8 ງານການສຶກສາທີ່ກໍານົດໃນແຜນ, ມີ 5 ຄາດໝາຍໃກ້ຈະບັນລຸ ແລະ 10 ຄາດໝາຍຈະຕ້ອງ ໄດ້ສູ້ຊົນຫຼາຍຂຶ້ນ, ຊຶ່ງສົກຮຽນ 2019-2020  ຜ່ານມາອັດຕາເຂົ້າຮຽນລວມຊັ້ນມັດທະຍົມຕອນປາຍຫຼຸດລົງຈາກ 49,7% ເປັນ 48,8%, ອັດຕາເຂົ້າຮຽນຂອງເດັກ 5 ປີ ເພີ່ມຈາກ 71,8% ເປັນ 74,0%, ອັດຕາເຂົ້າຮຽນໃໝ່ສຸດທິບັນລຸໄດ້ 97,4%, ອັດຕາຄ້າງຫ້ອງຊັ້ນປະຖົມຫຼຸດ ລົງຈາກ 7,9% ເປັນ 6,3% ແລະຈໍານວນເມືອງທີ່ບັນລຸອັດຕາເຂົ້າຮຽນລວມໃໝ່ ປ5 ສູງກວ່າ 95% ບັນລຸໄດ້ 4 ເມືອງເທົ່າເດີມ, ອັດຕາການປະລະການຮຽນຂອງນັກຮຽນຂັ້ນ ປ1 ຫຼຸດລົງຈາກ 8,4% ເປັນ 7,2%, ອັດຕາເຂົ້າຮຽນຊັ້ນມັດທະຍົມຕອນຕົ້ນຫຼຸດລົງຈາກ 77,4% ເປັນ 74,7%, ອັດຕາຄ້າງຫ້ອງຂັ້ນ ປ1 ຍັງຢູ່ໃນລະດັບ 13,8%,ອັດຕາປະລະການຮຽນຂອງນັກຮຽນຊັ້ນປະຖົມສຶກສາຍັງຢູ່ໃນລະດັບ 5,8%,ອັດຕາລອດເຫຼືອຮອດ ປ5 ບັນລຸໄດ້ 76,0%, ອັດຕາປະລະການຮຽນຂອງນັກຮຽນຊັ້ນມັດທະຍົມຕອນຕົ້ນຍັງຢູ່ໃນລະດັບ 11,0%, ອັດຕາປະລະການຮຽນຂອງນັກຮຽນຊັ້ນມັດທະຍົມຕອນປາຍຍັງຢູ່ໃນລະດັບ 7,3%, ພ້ອມໃນັ້ນໃນສົກຮຽນຜ່ານມາໄດ້ສົ່ງເສີມໃຫ້ນັກຮຽນທີ່ຮຽນຈົບຊັ້ນມັດທະຍົມຕອນຕົ້ນໄດ້ເຂົ້າຮຽນຕໍ່ໃນສາຍອາຊີວະບັນລຸ ໄດ້ 2,2%, ນັກຮຽນທີ່ຮຽນຈົບຊັ້ນມັດທະຍົມຕອນປາຍໄດ້ເຂົ້າຮຽນຕໍ່ວິຊາຊີບບັນລຸໄດ້ 47,2%, ຈໍານວນເມືອງທີ່ບັນລຸອັດຕາເຂົ້າຮຽນລວມໃໝ່ຮອດຂັ້ນ ມ4 ຂອງນັກຮຽນຍິງສູງກວ່າ 70% ບັນລຸ ໄດ້ 1 ເມືອງ, ສົ່ງເສີມໃຫ້ມວນຊົນທຸກເພດ, ທຸກໄວໄດ້ເຂົ້າຮ່ວມການຫັດກາຍະບໍລິຫານ, ການອອກກໍາລັງກາຍ ແລະການຫຼິ້ນກີລາ-ກາຍະກໍາບັນລຸໄດ້ 19,50% ຂອງພົນລະເມືອງທັງໝົດທົ່ວແຂວງ.

-----------

ຂຽນໂດຍ: ວັດທະນາ

ຮູບພາບ: #ຫນັງສືພິມເສດຖະກິດສັງຄົມ

แชร์