ເກືອບ 90 ຫຼັງຄາເຮືອນໃນ 2 ບ້ານຖືກເຂື່ອນເຊລະນອງ 1

   ວັນທີ 21 ກັນຍາ 2020 ທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດ, ທ່ານ ຄຳມະນີ ອິນທິລາດ ລັດຖະມົນຕີກະຊວງພະລັງງານ-ບໍ່ແຮ່ ແລະທ່ານ ຈະເລີນ ເຢຍປາວເຮີ ລັດຖະມົນຕີປະຈຳສຳນັກງານນາຍົກລັດຖະມົນຕີພ້ອມດ້ວຍບັນດາກົມຕ່າງໆ ແລະ ພະແນກການທີ່ກ່ຽວຂ້ອງຂອງແຂວງໄດ້ລົງຕິດຕາມສະພາບ ການເຄື່ອນໄຫວ, ການຜະລິດໄຟຟ້າ ແລະຕິດຕາມຊີວິດການເປັນຢູ່ຂອງປະຊາຊົນທີ່ຍົກຍ້າຍບ້ານຈາກການສ້າງເຂື່ອນໄຟຟ້າເຊລະນອງ1 ເມືອງນອງແຂວງສະຫວັນນະເຂດ.

 ທ່ານ ເສີນ ບາວ ລອງ ຮອງຜູ້ອຳນວຍ ການໃຫຍ່ຝ່າຍຈີນໄດ້ລາຍງານໃຫ້ຮູ້ວ່າ: ເຂື່ອນໄຟຟ້າເຊລະນອງ1 ແມ່ນເຂື່ອນໄຟຟ້າຂະໜາດໃຫຍ່ແຫ່ງທຳອິດໃນແຂວງສະ ຫວັນນະເຂດ, ໄດ້ເລີ່ມລົງມືກໍ່ສ້າງມາແຕ່ປີ 2018,ມີກຳລັງການຜະລິດຂະໜາດ 70 ເມກະວັດ,ຕົວເຂື່ອນສາມາດບັນຈຸນໍ້າໄດ້ 284 ລ້ານແມັດກ້ອນ,ສາມາດຜະລິດໄຟຟ້າໄດ້ 2.669 ກິໂລວັດໂມງ. ມາຮອດປະຈຸບັນການກໍ່ສ້າງໄດ້ສຳເລັດໄປໂດຍພື້ນຖານ ແລະໄດ້ເລີ່ມທົດລອງທຳການຜະລິດໄປສ່ວນໜຶ່ງ. ສິ່ງສຳຄັນ ແລະພົບບັນຫາກໍ່ແມ່ນການຍົກຍ້າຍປະຊາຊົນ,ໂດຍມີບ້ານທີ່ຖືກຜົນກະທົບ 2 ບ້ານ,ຈຳນວນ 88 ຫຼັງຄາເຮືອນ, ໃນນັ້ນມີ: ບ້ານລອຍນໍ້າ 32 ຫຼັງຄາເຮືອນ ແລະບ້ານລະເບົານໍ້າ 56 ຫຼັງຄາເຮືອນ,ຊຶ່ງປະຈຸບັນທາງບໍລິສັດກໍ່ຄືໂຄງການເຂື່ອນໄຟຟ້າເຊລະນອງ 1 ໄດ້ມີການ ຈັດຫາສະຖານທີ່, ບຸກເບີກເສັ້ນທາງ, ປຸກສ້າງເຮືອນຢູ່, ຈັດສັນພື້ນທີ່ທຳການຜະລິດ ແລະສິ່ງອຳນວຍຄວາມສະດວກຕ່າງໆ ເພື່ອທົດແທນໃຫ້ປະຊາຊົນທີ່ຖືກຍົກຍ້າຍຈຳນວນ 2 ຕື້ກວ່າກີບ, ນອກຈາກໄດ້ຊົດເຊີຍຜົນກະທົບທີ່ຖືກເສຍຫາຍໂດຍຕົງແລ້ວ, ທາງບໍລິສັດຜູ້ພັດທະນາໂຄງການຍັງໄດ້ສະໜັບສະໜູນ ແລະຕອບສະໜອງທາງດ້ານສະບຽງອາຫານຮັບປະກັນການດຳລົງຊີວິດໃຫ້ປະຊາຊົນໃນໄລຍະຂ້າມຜ່ານພາຍໃນ 3 ປີ, ໂດຍໄດ້ຕອບສະໜອງເຂົ້າກິນ, ທາດຊີ້ນ, ທາດປາ, ອຸປະກອນເຄື່ອງມືການຜະລິດລວມທັງການສ້າງອາຊີບໃຫ້ປະຊາຊົນຕື່ມອີກດ້ວຍ.

  ໃນການລົງຕິດຕາມຂອງຄະນະນຳຂັ້ນສູງໃນຄັ້ງນີ້ບັນດາທ່ານຍັງໄດ້ແນະນຳໃຫ້ບໍລິສັດກໍ່ຄືໂຄງການຈົ່ງໄດ້ເອົາໃຈໃສ່ໃນການປັບປຸງຊີວິດການເປັນຢູ່ຂອງປະຊາຊົນທີ່ໄດ້ຮັບຜົນກະທົບ, ໂດຍສະເພາະບັນຫານໍ້າໃຊ້, ນໍ້າດື່ມ, ລະບົບນໍ້າທຳການຜະລິດ ແລະອື່ນໆ. ຈາກນັ້ນກໍ່ຕ້ອງໄດ້ເກັບກຳຜົນເສຍຫາຍຈາກນໍ້າຖ້ວມເປັນຕົ້ນ: ເນື້ອທີ່ທຳການຜະລິດ, ຜົນລະປູກທີ່ຖືກນໍ້າຖ້ວມ.

  ໂອກາດດັ່ງກ່າວທາງຄະນະນຳຍັງໄດ້ລົງເບິ່ງສະພາບຕົວຈິງຂອງບ້ານ, ເບິ່ງຊີວິດການເປັນຢູ່ຂອງປະຊາຊົນພ້ອມທັງໄດ້ຖາມໄຖ່ຈາກການດຳລົງຊີວິດຢູ່ບ່ອນໃໝ່ເຫັນວ່າປະຊາຊົນສ່ວນໃຫຍ່ກໍ່ມີຄວາມເພິ່ງພໍໃຈ, ແຕ່ກໍ່ປາສະຈາກບໍ່ໄດ້ຕໍ່ຄວາມບໍ່ພໍໃຈຂອງປະຊາຊົນພຽງໜ້ອຍໜຶ່ງ, ໃນນັ້ນຄະນະກຳມະການຈັດສັນກໍ່ໄດ້ລົງຕິດຕາມແກ້ໄຂໄປແຕ່ລະກ້າວ.

   ຈາກນັ້ນວັນທີ 22 ກັນຍາ 2020 ຄະນະດັ່ງກ່າວກໍ່ໄດ້ລົງຕິດຕາມເບິ່ງການກໍ່ສ້າງເຂື່ອນໄຟຟ້າຕາດຊະໂຄຍເມືອງເຊໂປນ, ຕໍ່ມາກໍ່ໄດ້ລົງຕິດຕາມເບິ່ງສະພາບການປູກພືດຢູ່ບໍລິສັດ ສຸກຮຸ່ງເຮືອງເມືອງນອງ,ເຊິ່ງບໍລິສັດດັ່ງກ່າວມີເນື້ອທີ່ທຳການຜະລິດ 3 ພັນກວ່າເຮັກຕາ, ກໍ່ມີບັນຫາເລື່ອງໄຟຟ້າບໍ່ພຽງພໍໃນການນຳໃຊ້, ໃນນັ້ນ ທ່ານລັດຖະມົນຕີກະຊວງພະລັງງານ-ບໍ່ແຮ່ ກໍ່ໄດ້ຮັບປາກວ່າຈະມີການປັບປຸງລະບົບໄຟຟ້າຢູ່ເຂດດັ່ງກ່າວໃຫ້ນຳໃຊ້ໄດ້ພຽງພໍກັບຄວາມຕ້ອງການ, ເພື່ອຊຸກຍູ້ຂະບວນການຜະ ລິດໃຫ້ຕອບສະໜອງໄດ້ຕາມຄວາມຮຽກຮ້ອງຕ້ອງການ.

-----------------

ຮູບພາບ: #ຫນັງສືພິມເສດຖະກິດສັງຄົມ

แชร์