ກູເກິລອະນຸຍາດໃຫ້ພະນັກງານເຮັດວຽກຢູ່ເຮືອນໄດ້ເຖິງປີໜ້າ

ກູເກິລອະນຸຍາດໃຫ້ພະນັກງານຂອງຕົນເຮັດວຽກຢູ່ເຮືອນຕໍ່ໄປໄດ້ເຖິງທ້າຍເດືອນມິຖຸນາຂອງປີໜ້າເນື່ອງຈາກຄວາມກັງວົນກ່ຽວກັບສະຖານະການການແຜ່ລະບາດຂອງໂຄວິດ-19.

  ການຕັດສີນໃຈຂອງຜູ້ບໍລິຫານກູເກິລຄັ້ງນີ້ມີຜົນບັງຄັບໃຊ້ຕໍ່ພະນັກງານເກືອບ 2 ແສນຄົນທົ່ວໂລກ ຊຶ່ງລວມທັງພະນັກງານປະຈຳ ແລະພະນັກງານສັນຍາຈ້າງ ແລະເຮັດໃຫ້ກູເກິລກາຍມາເປັນບໍລິສັດອາເມລິກາທີ່ມີຂະໜາດໃຫຍ່ແຫ່ງທຳອິດທີ່ຍິນຍອມໃຫ້ພະນັກງານບໍ່ຕ້ອງເຂົ້າມາປະຕິບັດໜ້າທີ່ຢູ່ບ່ອນເຮັດວຽກເປັນເວລາດົນກວ່າ 1 ປີຫຼັງຈາກປະກາດໄວ້ກ່ອນໜ້ານີ້ວ່າຈະໃຫ້ພະນັກງານເຮັດວຽກຢູ່ເຮືອນໄປຈົນເຖິງທ້າຍປີນີ້ລາຍງານລະບຸວ່າການທີ່ກູເກິລເລີ່ມດຳເນີນນະໂຍບາຍເຊັ່ນນີ້ໜ້າຈະສົ່ງຜົນໃຫ້ທຸລະກິດອີກຫຼາຍແຫ່ງພິຈາລະນາດຳເນີນແຜນງານແບບດຽວກັນໃນອີກບໍ່ດົນແຫຼ່ງຂ່າວພາຍໃນບໍລິສັດເປີດເຜີຍວ່າຊັນດາພິໄຊຊີອີໂອຂອງກູເກິລຕັດສີນໃຈປະກາດນະໂຍບາຍດັ່ງກ່າວຫຼັງ ຈາກພິຈາລະນາຕົວເລືອກຕ່າງໆກັບທີມງານບໍລິຫານກ່ອນທີ່ຈະຕົກລົງເລືອກແຜນນີ້ທີ່ມີປັດໄຈຫຼັກໆມາຈາກຄວາມກັງວົນຂອງພະນັກງານທີ່ມີລູກຫຼານຢູ່ໃນໄວຮຽນ ຊຶ່ງໜ້າຈະຕ້ອງເຮັດວຽກບ້ານຜ່ານລະບົບອອນລາຍຕໍ່ໄປຢ່າງນ້ອຍຈົນເຖິງທ້າຍປີ.

  ພິໄຊອອກຈົດໝາຍວຽນແຈ້ງພະນັກງານກ່ຽວກັບແຜນການນີ້ທີ່ລະບຸດ້ວຍວ່າເປັນຂໍ້ສະເໜີທີ່ພະນັກງານທີ່ບໍ່ມີຄວາມຮັບຜິດຊອບທີ່ຈະຕ້ອງເຂົ້າຫ້ອງການສາມາດເລືອກທີ່ຈະເຮັດວຽກຢູ່ເຮືອນ ຫຼື ກັບມາບ່ອນເຮັດວຽກໄດ້ພ້ອມສະແດງຄວາມຫວັງວ່າຂໍ້ສະເໜີນີ້ຈະເອື້ອອຳ ນວຍໃຫ້ພະນັກງານທຸກຄົນມີຄວາມຍືດຍຸ່ນໃນການຮັກສາຄວາມສົມດຸນລະຫວ່າງການເຮັດວຽກ ແລະການຮັກສາຕົນເອງ ແລະຄອບຄົວໃນໄລຍະ 12 ເດືອນຈາກນີ້ໄດ້ອີກດ້ວຍ.

 

 

แชร์