ຄໍາມ່ວນ ຈະສູ້ຊົນສ້າງບ້ານວັດທະນະທຳ ໃຫ້ໄດ້ 10 ບ້ານຕໍ່ປີ

  ພະແນກຖະແຫຼງຂ່າວ, ວັດທະນະທຳ ແລະທ່ອງທ່ຽວແຂວງຄຳມ່ວນ ໄດ້ກໍານົດເປົ້າໝາຍວຽກງານວັດທະນະທຳໃນ 5 ປີຕໍ່ໜ້າ ໂດຍສຸມໃສ່ສູ້ຊົນສ້າງຄອບຄົວວັດທະນະທຳໃຫ້ໄດ້ປີລະ 1.500 ຄອບຄົວຂຶ້ນໄປ ແລະຮັບຮອງເປັນບ້ານວັດທະນະທຳໃຫ້ໄດ້ຢ່າງໜ້ອຍ 10 ບ້ານຕໍ່ປີ, ຊຶ່ງປະຈຸບັນທົ່ວແຂວງມີຄອບຄົວວັດທະນະທຳທັງໝົດ 73.558 ຄອບຄົວ ກວມເອົາ 90,88% ແລະບ້ານວັດທະນະທຳມີ 523 ບ້ານກວມເອົາ 90,15% ຂອງຈຳນວນບ້ານທັງໝົດ.

  ອີງຕາມບົດລາຍງານຕໍ່ກອງປະຊຸມໃຫຍ່ຄັ້ງທີ V ຂອງໜ່ວຍພັກວັດທະນະທຳທີ່ຂຶ້ນກັບຮາກຖານພັກພະແນກຖະແຫຼງຂ່າວ, ວັດທະນະທຳ ແລະທ່ອງທ່ຽວແຂວງຄຳມ່ວນໃຫ້ຮູ້ວ່າ: ໃນໄລຍະ 5 ປີ ຜ່ານມາ ໜ່ວຍພັກວັດທະນະທຳໄດ້ຊຸກຍູ້ສ້າງຄອບຄົວວັດທະນະທຳສາມາດມອບໃບຢັ້ງຢືນເປັນຄອບຄົວວັດທະນະທຳໄດ້ທັງໝົດ 37.940 ຄອບຄົວ, ຮັບຮອງເປັນບ້ານວັດທະນະທຳໄດ້ 207 ບ້ານ, ປະຈຸບັນໃນທົ່ວແຂວງມີຄອບຄົວວັດທະນະທຳທັງໝົດ 73.558 ຄອບຄົວ ກວມເອົາ 90,88% ຂອງຈຳນວນຄອບຄົວທັງໝົດ, ບ້ານວັດທະນະທຳມີ 523 ບ້ານ  ກວມເອົາ 90,15% ແລະວຽກງານອື່ນໆ ໂດຍສະເພາະວຽກງານຄຸ້ມຄອງປ້າຍ, ຮ້ານບັນເທີງ, ວຽກງານອະນຸລັກມໍລະດົກ, ສົ່ງເສີມສີລະປະວັດທະນະທຳ, ຫໍພິພິທະພັນ, ຫໍສະໝຸດ ແລະວຽກງານສູນວັດທະນະທຳເດັກກໍ່ໄດ້ຮັບການຈັດຕັ້ງປະຕິບັດມີຜົນສຳເລັດໃນຫຼາຍດ້ານ.

  ສຳລັບທິດທາງແຜນການ 5 ປີ ໃນຕໍ່ໜ້າແມ່ນຈະສືບຕໍ່ເອົາໃຈໃສ່ຊຸກຍູ້ການສ້າງຄອບຄົວ ແລະບ້ານວັດທະນະທຳໃນນັ້ນສູ້ຊົນສ້າງຄອບ ຄົວວັດທະນະທຳໃຫ້ໄດ້ປີລະ 1.500 ຄອບຄົວຂຶ້ນໄປ ແລະຮັບຮອງເປັນບ້ານວັດທະນະທຳໃຫ້ໄດ້ຢ່າງໜ້ອຍ 10 ບ້ານຕໍ່ປີ, ສືບຕໍ່ອອກໃບອະ ນຸຍາດເຄື່ອນໄຫວກິດຈະການບໍລິການຮ້ານອອກແບບ, ຜະລິດ ແລະຕິດຕັ້ງປ້າຍໃນທົ່ວແຂວງ, ອະນຸລັກຮັກສາມໍລະດົກບັນດາເຜົ່າທາງດ້ານວັດທະນະທຳ, ປະຫວັດສາດ, ທຳມະຊາດເປັນຕົ້ນວັດຖຸບູຮານ, ສະຖານບູຮານ, ສະຖານທີ່ປະຫວັດສາດ ແລະສະຖານທີ່ທຳມະຊາດທີ່ໂດດເດັ່ນ, ຄົ້ນຄວ້າທາງດ້ານເນື້ອໃນເພື່ອຂຽນປະຫວັດຄວາມເປັນມາຂອງວັດຖຸທີ່ເປັນປະຫວັດສາດເຊັ່ນ:ຮ່ອງຮອງທາງດ້ານປະຫວັດສາດ, ທຳມະຊາດ, ມູນເຊື້ອການດຳລົງຊີວິດ ແລະການຕໍ່ສູ້ຕ່າງໆຂອງແຂວງເພື່ອວາງສະແດງຢູ່ໃນຫໍພິພິທະພັນ, ສົ່ງເສີມທາງດ້ານພູມປັນຍາປະ ດິດແຕ່ງບົດລະຄອນ, ບົດຟ້ອນ, ບົດລຳ, ບົດເພງເພື່ອອະນຸລັກສົ່ງເສີມທາງດ້ານວັດທະນະທຳອັນດີງາມຂອງທ້ອງຖິ່ນ, ເຜີຍແຜ່ຮີດ 12 ຄອງ 14 ປະເພນີອັນດີງາມຂອງຊາດລາວ ໂດຍສະເພາະຂະນົບທຳນຽມ, ການນົບໄຫວ້ ແລະການວາງກິລິຍາມາລະຍາດໃຫ້ກວ້າງຂວາງຂຶ້ນກວ່າເກົ່າ.

----

ໜັງສືພິມ ເສດຖະກິດ-ສັງຄົມ

แชร์