ທ່ຽວຊົມແຫຼ່ງທ່ອງທ່ຽວນໍ້າຕົກຕາດແດນພູສູງ ເມືອງສົບເບົາ

  ແຫຼ່ງທ່ອງທ່ຽວທໍາມະຊາດນໍ້າຕົກຕາດແດນພູສູງຕັ້ງຢູ່ບ້ານນໍ້າເຕີບ ເມືອງສົບເບົາ ແຂວງຫົວພັນ ປະຈຸບັນໄດ້ຮັບການພັດທະນານັກທຸລະກິດພາຍໃນເມືອງ, ແຫຼ່ງທ່ອງທ່ຽວແຫ່ງນີ້ເປັນແຫຼ່ງທ່ອງທ່ຽວທໍາມະຊາດແຫ່ງໜຶ່ງທີ່ມີຄວາມສວຍສົດງົດງາມ, ມີຄວາມອຸດົມສົມບູນເຕັມໄປດ້ວຍທັດສະນີຍະພາບທໍາມະຊາດພູຜາປ່າໄມ້, ແຫຼ່ງທ່ອງທ່ຽວທໍາມະຊາດນໍ້າຕົກຕາດແດນພູສູງ ຕັ້ງຢູ່ບ້ານນາເຕີບ, ເມືອງສົບເບົາ, ແຂວງຫົວພັນ ຫ່າງຈາກເທສະບານເມືອງສົບເບົາ ປະມານ 28 ກິໂລແມັດ ຕາມເສັ້ນທາງເລກທີ 6B ໄປທາງທິດຕາເວັນອອກ, ມີເນື້ອທີ່ສໍາປະທານທັງໝົດ 6 ກວ່າເຮັກຕາ ຊຶ່ງໄດ້ເລີ່ມລົງມືຈັດຕັ້ງປະຕິບັດແຕ່ເດືອນມີນາປີ 2019 ເປັນຕົ້ນມາ ແລະໄດ້ຮັບການສະໜັບສະໜູນຈາກຄະນະພັກ, ອໍານາດການປົກຄອງບ້ານນໍ້າເຕີບ ແລະຄະນະພັກ, ອໍານາດການປົກຄອງເມືອງສົບເບົາ, ຊຶ່ງມີອາຍຸສໍາປະທານ 40 ປີ, ກໍານົດການກໍ່ສ້າງເປັນ 2 ໄລຍະມາຮອດປະຈຸບັນໄດ້ປະຕິບັດສຳເລັດ 90%, ໂຄງການແມ່ນຈັດຕັ້ງປະຕິບັດໄປຕາມແຜນແມ່ບົດຢ່າງຖືກຕ້ອງ ແລະໄປຕາມລະບົບເຕັກນິກ.

  ກິດຈະກຳຫຼັກໃນການກໍ່ສ້າງສິ່ງອໍານວຍຄວາມສະດວກໃນສະຖານທີ່ແຫຼ່ງທ່ອງທ່ຽວແຫ່ງນີ້ປະກອບມີ: ສ້າງຂັ້ນໄດເຫຼັກຕັ້ງແຕ່ຫົວຕາດລົງຮອດຈຸດພັກຜ່ອນປະມານ 765 ຂັ້ນ ຫຼື ປະມານ 600 ແມັດ, ສ້າງສາຍສະລິງຍາວ 800 ກວ່າແມັດ, ສ້າງຂົວອູ່ຍາວ 140 ແມັດ ນອກນີ້ຍັງສ້າງຈຸດພັກເຊົາຕາມຂັ້ນໄດ, ສ້າງຕູບຜັກຜ່ອນ, ສ້າງໜອງປາ, ສວນສັດ, ປັບເດີ່ນຈອດລົດ, ເດີ່ນຈັດກິດຈະກຳ, ເດີ່ນຊົນງົວ, ສ້າງເສັ້ນ ທາງລົງສູ່ເຂດທ່ອງທ່ຽວ, ສ້າງບ່ອນເກັບປີ້, ກໍ່ສ້າງເຮືອນພັກ ແລະອື່ນໆ ຄາດວ່າການກໍ່ສ້າງຕ່າງໆຈະປະຕິບັດໃຫ້ສໍາເລັດ 100% ໃນປີ 2020.

  ແນວໃດກໍດີ ປະຈຸບັນແມ່ນໄດ້ເປີດໃຫ້ບໍລິການຢ່າງເປັນທາງ ການແລ້ວ, ສຳລັບທ່ານໃດທີ່ເດີນທາງໄປແຂວງຫົວພັນກໍຢ່າລືມແວ່ໄປທ່ຽວຊົມສະຖານທີ່ແຫຼ່ງທ່ອງທ່ຽວນໍ້າຕົກຕາດແດນພູສູງ ຮັບຮອງວ່າທ່ານຈະບໍ່ຜິດຫວັງກັບບັນຍາກາດຂອງທຳມະຊາດ ແລະຄວາມສວຍງາມຂອງສະຖານທີ່ແຫ່ງນີ້ແນ່ນອນ.

 

แชร์