ມອບ-ຮັບ ຫົວໜ້າພະແນກສຶກສາທິການ ແລະກີລາແຂວງຄຳມ່ວນ

  ໃນວັນທີ 25 ກັນຍາ 2020ທີ່ພະແນກສຶກສາທິການ ແລະກີລາແຂວງຄຳມ່ວນ ໄດ້ຈັດພິທີມອບ-ຮັບໜ້າທີ່ຫົວໜ້າພະແນກສຶກສາທິການ ແລະກີລາແຂວງຄຳມ່ວນ ລະຫວ່າງທ່ານ ສີໄຮ ແກ້ວໄກຖິ່ນ ຫົວໜ້າພະແນກສຶກສາທິການ ແລະກີລາແຂວງ (ຜູ້ເກົ່າ) ແລະທ່ານ ນັນຕະໄຊ ອິນທະສອນ ຫົວໜ້າພະແນກສຶກສາທິການ ແລະກີລາແຂວງ (ຜູ້ໃໝ່), ເປັນກຽດເຂົ້າຮ່ວມຂອງທ່ານ ບຸນມີ ພິມມະສອນ ຮອງເຈົ້າແຂວງໆຄຳມ່ວນ, ມີທ່ານໃນຄະນະຈັດຕັ້ງແຂວງ, ພະແນກພາຍໃນແຂວງ ແລະພາກສ່ວນ ກ່ຽວຂ້ອງເຂົ້າຮ່ວມ.

ທ່ານ ແກ້ວ ວົງພະຈັນ ຮອງຫົວໜ້າຄະນະຈັດຕັ້ງແຂວງໄດ້ຂຶ້ນຜ່ານມະຕິຕົກລົງຂອງທ່ານເຈົ້າແຂວງໆຄຳມ່ວນ ວ່າດ້ວຍການຍົກຍ້າຍຫົວ ໜ້າພະແນກສຶກສາທິການ ແລະກີລາແຂວງໄປຮັບຜິດຊອບໜ້າທີ່ໃໝ່ຢູ່ພະແນກການອື່ນ ໂດຍເຫັນດີຍົກຍ້າຍທ່ານ ສີໄຮ ແກ້ວໄກຖິ່ນ ຫົວ ໜ້າພະແນກສຶກສາທິການ ແລະກີລາແຂວງໄປຮັບໜ້າທີ່ໃໝ່ຢູ່ພະແນກແຮງງານ ແລະສະຫວັດດີການສັງຄົມແຂວງ ແລະຂໍ້ຕົກລົງຂອງທ່ານເຈົ້າແຂວງຄຳມ່ວນ ວ່າດ້ວຍການແຕ່ງຕັ້ງຫົວໜ້າພະແນກສຶກສາທິການ ແລະກີລາແຂວງ ໂດຍເຫັນດີແຕ່ງຕັ້ງທ່ານ ນັນຕະໄຊ ອິນທະສອນ ຮອງຫົວໜ້າພະແນກສຶກສາທິການ ແລະກີລາແຂວງຂຶ້ນເປັນຫົວໜ້າພະແນກສຶກສາທິການ ແລະກີລາແຂວງ, ຈາກນັ້ນພິທີກໍ່ໄດ້ຜ່ານບົດບັນທຶກ ແລະເຊັນມອບ-ຮັບໜ້າທີ່ວຽກງານເພື່ອສືບຕໍ່ປະຕິບັດໜ້າທີ່ ແລະຊີ້ນຳໆພາຂົງເຂດວຽກງານສຶກສາໄດ້ເຄື່ອນໄຫວຢ່າງເປັນປົກກະຕິທັງນີ້ກໍ່ເພື່ອແນໃສ່ຕອບສະໜອງຕາມຄວາມຮຽກຮ້ອງຕ້ອງການຂອງໜ້າທີ່ວຽກງານໃນໄລຍະໃໝ່ໃຫ້ມີປະສິດທິພາບດີຂຶ້ນກວ່າເກົ່າ.

  ສຳລັບພະແນກ ສກຂ ມີຮາກຖານພັກ ແລະໜ່ວຍພັກທີຂຶ້ນກັບຮາກຖານ 7 ໜ່ວຍພັກ, ມີສະມາຊິກພັກທັງໝົດ 191 ສະຫາຍ, ຍິງ 96 ສະຫາຍ, ມີ 13 ຂະແໜງການ ແລະມີ 3 ສູນ, ປະຈຸບັນມີພະນັກງານທັງໝົດ 101 ຄົນ, ຍິງ 45 ຄົນ.

----

ໂດຍ: ມະນີວັນ

แชร์